Ingabe Bewazi?

Kungani amaJuda ayenesithakazelo kangaka ohlwini lwawo lozalo?

▪ Imibhalo yohlu lozalo yayibalulekile ekutholeni ubuhlobo besizwe nobomkhaya. Yayidingeka futhi ekunqumeni ukuthi izwe namafa kuhlukaniswa kanjani. Okwakubaluleke ngokukhethekile uhlu lozalo lukaMesiya othenjisiwe. AmaJuda ayazi kahle ukuthi uMesiya kwakumelwe avele ohlwini lozalo lukaDavide esizweni sakwaJuda.—Johane 7:42.

Ngaphezu kwalokho, isazi seBhayibheli, uJoachim Jeremias, sithi “njengoba izikhundla zokuba umpristi noma umLevi zazitholwa ngefa . . . kwakubaluleke kakhulu ukuba uhlu lozalo luhlale lumsulwa lungangcolisiwe.” Abesifazane bama-Israyeli ababeshadela emindenini yabapristi kwakufanele banikeze ubufakazi bokuthi bazalwa kuphi ukuze ubupristi buhlale “bungangcolisiwe futhi bumsulwa.” Ngosuku lukaNehemiya, yonke imindeni yamaLevi ayibange isafaneleka njengamaLevi lapho ‘befuna uhlu lwamagama ayo ukuze bathole obala uhlu lwayo lozalo, kodwa bengalutholi.’—Nehemiya 7:61-65.

Ngaphezu kwalokho, uMthetho KaMose wawuthi “akukho ndodana engumlanjwana” noma “umAmoni noma umMowabi ongangena ebandleni likaJehova.” (Duteronomi 23:2, 3) Ngenxa yalesi sizathu, uJeremias uyanezela, “kwakufanele indoda iveze ubufakazi bozalo olumsulwa ukuze ithole amalungelo omthetho, futhi leli qiniso liqinisekisa isiphetho sethu sokuthi . . . ngisho nomIsrayeli ovamile wayebazi okhokho bakhe futhi wayekwazi ukusho ukuthi ungowasiphi isizwe kweziyishumi nambili.”

AmaJuda ayeluhlanganisa futhi alugcine kanjani uhlu lwawo lozalo?

▪ Abalobi bamaVangeli uMathewu noLuka banikeza uhlu lozalo lokhokho bakaJesu oluningiliziwe . (Mathewu 1:1-16; Luka 3:23-38) Ezinye izincwadi zohlu lozalo ziye zagcinwa. Ngokwesibonelo, umbhali ongumJuda, uthi ngoHillel, urabi wangesikhathi sikaJesu: “Kwatholakala umqulu wohlu lozalo eJerusalema, ubhalwe ukuthi uHillel uyinzalo kaDavide.” Encwadini yaso ethi The Life, isazi-mlando sangekhulu lokuqala uFlavius Josephus, sathi okhokho baso babengabapristi futhi uhlangothi lukanina “lunegazi lasebukhosini.” Sathi lokhu kwaziswa sakuthola “kulotshwe ezincwadini zomphakathi.”

Encwadini yakhe ethi Against Apion, uJosephus uthi isizwe sakhe sasinikeza “amadoda anobuntu obuhle” umsebenzi wokugcina imibhalo yemindeni yabapristi. I-Jewish Encyclopedia ithi: “Kubonakala sengathi kwakumiswa izikhulu ezikhethekile ukuba ziphathe le mibhalo, futhi kukhulunywa ngenkantolo eyamiswa eJerusalema yokuphendula imibuzo mayelana nohlu lozalo.” AmaJuda angewona abapristi ayebhalisa emadolobheni oyise. (Luka 2:1-5) Ngokusobala abalobi bamaVangeli bayihlola le mibhalo yomphakathi. Kubonakala sengathi imindeni yayizigcinela izinhlu zozalo.