Ukushumayela—Ilungelo Eliphakeme
1 Inkonzo yezindaba ezinhle iyilungelo eliphakeme uJehova asinike lona. (Roma 15:16; 1 Thim. 1:12) Ingabe uyibheka ngaleyondlela? Akufanele sivumele ukuhamba kwesikhathi noma ukuhlekwa abanye kunciphise ukubaluleka kwayo kithi. Ukuphatha igama likaNkulunkulu kuyilungelo eliphakeme elitholwa abambalwa kuphela. Singakukhulisa kanjani ukwazisa kwethu lelilungelo?
2 Ukushumayela isigijimi soMbuso akusenzi sithandwe yizwe. Abaningi babheka umsebenzi wethu ngokunganaki noma ngokungakhathali. Abanye bawenza inhlekisa futhi bamelane nawo. Ukuphikiswa okunjalo kungavela kwesisebenza nabo, omakhelwane, noma ngisho namalungu omkhaya. Kubo singase sibonakale sikhohlisiwe futhi siyiziwula. (Joh. 15:19; 1 Kor. 1:18, 21; 2 Thim. 3:12) Izinkulumo zabo ezidumazayo ziklanyelwe ukudambisa intshiseko yethu futhi zisenze sehlise umfutho noma siyeke ilungelo lethu eliphakeme. Imibono ephambene ithuthukiswa uSathane, oye ‘waphuphuthekisa ingqondo yabangakholwa, ukuze kungasi kubo ukukhanya kwevangeli.’ (2 Kor. 4:4, NW) Usabela kanjani?
3 Kubalulekile ukukhumbula ukuthi ukushumayela kwethu ngoMbuso kuwumsebenzi obaluleke kakhulu noma ubani wethu angawenza namuhla. Sinesigijimi esisindisa ukuphila esingatholakali nganoma iyiphi enye indlela. (Roma 10:13-15) Ukuvunyelwa uNkulunkulu, hhayi umuntu, yikhona okubalulekile. Umbono ophambene wezwe ngomsebenzi wethu wokushumayela awusivimbeli ukuba simemezele izindaba ezinhle ngesibindi.—IzE. 4:29.
4 UJesu walazisa kakhulu ilungelo lakhe lokwenza intando kaYise. (Joh. 4:34) Wazinikela ngokukhethekile enkonzweni futhi akazange avumele iziphazamiso noma abaphikisi ukuba kumdikibalise. Ukushumayela isigijimi soMbuso kwakuthatha indawo yokuqala njalo ekuphileni kwakhe. (Luka 4:43) Siyalwa ukuba silingise isibonelo sakhe. (1 Pet. 2:21) Ngokwenza kanjalo, sikhonza ‘njengezisebenzi kanye noNkulunkulu.’ (1 Kor. 3:9, NW) Ingabe silisebenzisa ngokugcwele lelilungelo? Ingabe siyazifuna izikhathi zokuhlanganyela izindaba ezinhle nabanye kokubili ngendlela ehleliwe nangokwethukela? NjengoFakazi BakaJehova, kufanele njalo sihlale sikulungele ‘ukuvuma obala igama lakhe.’—Heb. 13:15, NW.
5 Ukuhlanganyela kwethu enkonzweni kunqunywa ikakhulukazi isimo sethu sengqondo. Ingabe sikwazisa ngokujulile konke lokho uJehova asenzele khona? Ingabe ezinhliziyweni zethu siye salwakha uthando ngoJehova olusishukumisela ukuba senze konke esingakwenza enkonzweni yakhe? Ukuzindla ngezibusiso esizijabulelayo manje nangalokho uJehova asithembise khona esikhathini esizayo kusisiza ukuba sikhule othandweni lwethu ngoMdali. Lolothando lusishukumisela esenzweni—ukuphikelela nokuwenza njalo umsebenzi wokushumayela ngoMbuso ngezinga elivunyelwa izimo zethu. Intshiseko yethu iyonikeza ubufakazi bothando lwethu ngoJehova nomakhelwane bethu.—Marku 12:30, 31.
6 Sibonisa ukuthi into siyazisa kakhulu kangakanani ngalokho esikwenzayo nesikushoyo ngayo. Silazisa ngempela yini ilungelo lethu lokushumayela ngoMbuso? Ingabe siyayidumisa inkonzo yethu? Ingabe sizimisele ukuphikelela kulomsebenzi obalulekile naphezu kokuphikiswa? Uma silazisa kakhulu lelilungelo elimangalisayo, ngempela siyoshiseka futhi siwenze ngomphefumulo wonke.—2 Kor. 4:1, 7.