Imihlangano Isishukumisela Emisebenzini Emihle
1 Izici ezimbili ezibalulekile zokukhulekela kwethu ziwukuya emihlanganweni yebandla nokuhlanganyela enkonzweni yasensimini. Lokhu kokubili akuhlukani. Kuyathonyana. Imihlangano yobuKristu isishukumisela emisebenzini emihle, omuhle kunayo yonke umsebenzi wokushumayela ngoMbuso nokwenza abafundi. (Heb. 10:24) Uma besingayeka ukuya emihlanganweni, ngokushesha besingayeka nokushumayela ngenxa yokuthi besingeke sishukumiseleke ukukwenza.
2 Emihlanganweni yamasonto onke, sithola imfundo engokomoya eklanyelwe ukusishukumisela ukuba sishumayele. Sikhunjuzwa njalo ngokuphuthuma kwezikhathi, okusiqhubezela ukuba siyise kwabanye isigijimi seBhayibheli esinikeza ukuphila. Siyakhuthazwa futhi siqiniswe ukuze sikhuthazele emsebenzini wokushumayela. (Math. 24:13, 14) Ngokuwasebenzisa ngokugcwele amathuba okuphendula emihlanganweni, sikujwayela ngokwengeziwe ukukhuluma nabanye ngokholo lwethu. (Heb. 10:23) Ngokubhalisa eSikoleni Senkonzo Esingokwasezulwini, sithola ukuqeqeshwa okusenza sibe izikhonzi eziphumelelayo futhi sithuthukise amakhono ethu okufundisa.—2 Thim. 4:2.
3 Indlela Imihlangano Yenkonzo Esishukumisela Ngayo Ukuba Sishumayele: Sonke sikhuthazwa ukuba sibheke ukwaziswa okukuyi-Nkonzo Yethu YoMbuso kusengaphambili. Lokhu kwaziswa kuyagcizeleleka ezingqondweni zethu uma sesiseMhlanganweni Wenkonzo futhi sibona imiboniso yezintshumayelo. Uma sisenkonzweni yasensimini, singakhumbula okwashiwo yi-Nkonzo Yethu YoMbuso, sikhumbule imiboniso eyenziwa, ngaleyo ndlela sinikeze ubufakazi obuphumelela ngokwengeziwe. Lokhu kuye kwenzeka kubamemezeli abaningi.
4 Ukuze basebenzise abakufunde eMihlanganweni Yenkonzo, abanye benza amalungiselelo okuba basebenze nabanye enkonzweni. Abamemezeli basuke besawakhumbula kahle amaphuzu angasebenziseka ensimini futhi bashukumiseleka ukuba bazame ukuwasebenzisa ngoba lemihlangano ibakhuthaza ukuba bahlanganyele emsebenzini wokushumayela masonto onke.
5 Ayikho into engathatha indawo yemihlangano yobuKristu, lapho sihlangana khona nesikhulekela nabo futhi sishukunyiselwa emisebenzini emihle. Ukuze inkonzo yethu ichume, kufanele njalo sibe khona emihlanganweni yebandla. Kwangathi singabonisa ukwazisa ngaleli lungiselelo elimangalisayo elivela kuJehova ngokuba “singakuyeki ukubuthana kwethu ndawonye.”—Heb. 10:25.