Indlela Yokusiza Abanezifo Zokuphazamiseka Kwengqondo

Lokho Okukushoyo

Singase singazi ukuthi singamsiza kanjani umngane wethu onenkinga yokuphazamiseka kwengqondo. Singambonisa umngane wethu ukuthi siyamkhathalela. Singambonisa kanjani?

Indlela Lokhu Okungasiza Ngayo

‘Shesha ukulalela.’​—JAKOBE 1:19.

Enye indlela enhle kakhulu yokusiza umngane wethu ukumlalela lapho efuna ukukhuluma. Ungacabangi ukuthi kufanele uphendule yonke into ayishoyo. Menze abone ukuthi umlalele nokuthi uyamkhathalela. Zama ukuqonda indlela azizwa ngayo futhi ungamehluleli. Khumbula ukuthi angasho izinto angaqondile ukuzisho, angase azisole ngazo kamuva.​—Jobe 6:2, 3.

Khuluma ‘ngokududuzayo.’​—1 THESALONIKA 5:14.

Kungenzeka umngane wakho akhathazeke kakhulu noma azizwe eyinto engelusizo lwalutho. Ngisho ungazi ukuthi yini okufanele uyisho, ungamqinisekisa ngokuthi uyamthanda futhi lokho kungamduduza kumenze akhuthazeke.

“Umngane weqiniso ubonisa uthando ngaso sonke isikhathi.”​—IZAGA 17:17.

Msize lapho edinga ukusizwa khona. Mbuze ukuthi ungamsiza kanjani. Uma ekuthola kunzima ukukuchazela ukuthi udinga luphi usizo, ungase umcele ukuba nenze izinto ezithile njengokushaywa umoya. Ungamsiza ngokumyela ezitolo, ukumhlanzela indlu noma umenzele eminye imisebenzi.—Galathiya 6:2.

‘Bekezela.’​—1 THESALONIKA 5:14.

Kungenzeka umngane wakho angafuni ukukhuluma ngezinye izikhathi. Mqinisekise ukuthi uzokujabulela ukumlalela lapho esefisa ukukhuluma. Ngenxa yokuphazamiseka kwakhe, umngane wakho angasho noma enze izinto ezikuzwisa ubuhlungu. Angahoxisa izinhlelo ebeninazo noma acasuke ngokushesha. Zama ukumqonda futhi ube nesineke njengoba umnikeza usizo aludingayo.​—IzAga 18:24.

Usizo Omnikeza Lona Lungawenza Umehluko

“Ngiyaqiniseka ukuthi ngiba khona lapho umngane wami engidinga. Ngisho noma ngingenaso isixazululo sezinkinga zakhe, ngiyazama ukumlalela lapho ekhuluma. Ngezinye izikhathi usuke edinga nje umuntu ozomlalela ukuze azizwe engcono.”​—UFarrah,a onomngane onesifo sokukhathazeka kakhulu, odla nangendlela engafanele nokutholakale ukuthi unesifo sokucindezeleka.

“Omunye wabangane bami onomusa, ongikhuthazayo, wangimema ukuze sizodla isidlo esimnandi naye. Wayenothando futhi wenza kwaba lula ngami ukuba ngiveze indlela engizizwa ngayo. Kwangikhuthaza ngempela lokho!”​—UHa-eun, onesifo sokucindezeleka.

“Ave kubalulekile ukuba nesineke. Lapho umkami engicasula, ngiyazikhumbuza ukuthi yingoba egula hhayi ngoba esuke eqonde ukungicasula. Lokhu kuyangisiza ngehlise umoya futhi ngizwelane naye nakakhulu.”​—UJacob, onenkosikazi enesifo sokucindezeleka.

“Umkami ungisiza kakhulu futhi uyangiduduza. Uma ngikhathazeke kakhulu akangiphoqi ukuba ngenze izinto engingathandi ukuzenza. Ngezinye izikhathi lokhu kusho ukuthi ngeke akwazi ukwenza izinto afisa ukuzenza. Akekho onjengaye ngoba unomusa futhi akazicabangeli yena.”​—U-Enrico, onesifo sokukhathazeka ngokweqile.