Ukusabela Komunye Umfundi Esihlokweni SePhaphama!
Ukuphila NeDOWN’S SYNDROME
IPHAPHAMA! yesiNgisi ka-August 8, 1989, yayinesihloko esimayelana nentombazane egama layo linguSuzy eyazalwa ineDown’s syndrome. Lesosihloko sachaza uthando olukhulu, umzamo, nokubekezela uSuzy akuboniswa ngabazali bakhe, udadewabo, nomfowabo. Esabela kulesosihloko, omunye wesifazane eSpokane, eWashington, wabhalela iPhaphama! incwadi elandelayo:
“Ngemva kokufunda iPhaphama! ka-August 8, kwamane kwadingeka ukuba nginibhalele. Ngifuna ukunibonga ngokukhipha isihloko esikhuluma ngentombazanyana enguSuzy. Kungumuzwa ongajwayelekile enginawo ngoba nami ‘ngingumzali’ kamama wami ‘owusana,’ ngakho ngazizwa ngiyisihlobo sikamama kaSuzy. Ngithanda ukuba nonke nazi ngenye yezinto eziningi abanye bethu ababhekene nazo namuhla, nendlela esikhuthazeka ngayo ngomsebenzi eniwenzayo ekusisizeni ukuba sibhekane nakho.
“Ngathinteka kakhulu ngentombazanyana enguSuzy eneDown’s syndrome kangangokuthi ngakhala. Ngiye ngabazwela kakhulu abantwana abanjalo nabazali, njengoba ngiye ngazi abaningana. Njengoba ngangifunda ngobunzima bukaSuzy ekuphileni, ngakhalela umama wami. Mina ngokwami ngiyinkosikazi esikhulile eseminyakeni yama-70, futhi ngiye ngabona ukuphila kukamama kushintsha ngokuphelele manje.
“Okokuqala ngimkhumbula ewumuntu osemusha omuhle, onakekelayo, othandwayo, nokhaliphile. Manje useminyakeni yama-90. Ngenxa yokuhlaselwa uchungechunge lwesifo sokugogeka umzimba, ngiye ngambuka ewohloka ngokomzimba eba nomzimba okhubazeke ngendlela edabukisayo, kodwa izitho zakhe ezibalulekile zisebenza cishe ngendlela evamile.
“Ukugogeka kwakhe umzimba kokuqala okuphawulekayo kwamenza wangakwazi ukulinganisa incwadi yakhe yamasheke, ukubhala uhlu lokudla okuzothengwa, njll. Esikhathini esingangonyaka owodwa, lesisimo sase sibe sibi kangangokuthi wayengasakwazi ngisho nokufudumeza ukudla okulula noma okuncane.
“Unyaka nengxenye kamuva, okunye ukugogeka okukhulu kwamenza wangakwazi ukuhamba, ukwenza izinto, ukukhuluma, futhi wangakwazi ukubamba umchamo. Wayesefinyelele ezingeni lokuphila ‘lobusana’ ngokwesibili, futhi ngangimbona eyilo. Kudingeka ukuba afunzwe, anabukeliswe njengengane, futhi aphakanyiswe embhedeni abekwe esihlalweni sabakhubazekile.
“Umama wayengakwazi ukukhuluma nathi ukuze asitshele ayekucabanga, ayekuzwa, ayekufuna noma ayekufisa. Kodwa safunda ukuxoxa ngamehlo, ukumoyizela, nangezinyembezi! Ubuso bakhe babukhanya ngokoqobo lapho ngimtshela okuthile okuthakazelisayo engangikuzwe eHholo LoMbuso loFakazi BakaJehova engihlanganyela kulo, noma uma abanye abazalwane lapho beye bamthumelela umlayezo, noma mhlawumbe okuthile engangikufunde kuPhaphama! noma INqabayokulinda okuthakazelisa ngokukhethekile.
“Lapho ngimshiya, ngokuvamile amehlo akhe ayehlengezela izinyembezi, futhi wayengivalelisa ngokumane abeke izindebe zakhe esihlathini sami. Nokho, lapho ngemva kokuvakasha ngithi, ‘Mama, ihora lesikhombisa, futhi kufanele ngiye esifundweni eHholo LoMbuso,’ wayemoyizela futhi athi, ‘yebo,’ ngokunqekuzisa ikhanda, futhi angiqabule eqinisa. Khona-ke wayengibuka njengoba ngiphuma emnyango futhi wayengivalelisa emoyizela ngokunyakazisa iminwe yakhe ngendlela omunye wabazukulu bakhe ayemfundise ngayo.
“Usuku lweHalloween lwaluzofika ngokushesha ngemva kokuba elaliswe esibhedlela sabakhubazekile. Ngamthola esekamelweni lemidlalo yokuzilibazisa njengoba ngangizombona ngolunye usuku. Kwakhwezwa izihlalo zabakhubazekile, zaba zine etafuleni ngalinye elide, futhi phezu kwazo kwendlalwa zonke izindwangu ezidingekayo ukuze kwenziwe izingubo zeHalloween. Laphaya kwakuhlezi uMama enobuso obunjengobomntwana oneminyaka emine ubudala lowo ngaphandle kokuphimisela owayethi: ‘Angifuni ukukwenza lokho, futhi ngeke ngikwenze!’
“Ngasondela ngemva kwakhe ngathi: ‘Sawubona, Mama,’ futhi njengoba ngangigoba futhi ngimqabula esihlathini, ngagigitheka (ukuze ngifihle izinyembezi) ngamhlebela endlebeni: ‘Bakulethe lapha ukuze wenze izinto zeHalloween.’ Ephenduka ngekhanda ukuze angibheke, wayenokukhazimula kwengane egangile okukhulu emehlweni, emoyizela. Khona-ke wasonta sonke isimo sobuso bakhe, ebonisa ukwenyanya okuphelele! Futhi kwakuba kanjalo lapho kufika iholide ngalinye. Wayengakholelwa kulawo maholide, nezizinda zawo zobuqaba, futhi nakhu lapha ayekhona, esimweni sakhe esilinganiselwe, ebambelele ezinkolelweni zakhe.
“Ezinyangeni eziyisishiyagalombili ezidlule, kwagadla okunye ukugogeka komzimba okukhulu, kumenza abe sesimweni sokuquleka isikhathi eside (coma) futhi kuqalisa nokungasebenzi kwezinso. Nakuba kunjalo, zonke ezinye izitho ezibalulekile zazikahle. Ngemva kwezinsuku ezinhlanu, udokotela wakhe wayengakukholelwa ukululama ayekwenzile. Ekuqaleni, wayengaboni namunye wethu. Kodwa manje, ngezinye izikhathi, uyasabela lapho simqabula. Siyamuzwa ecindezela kancane izindebe zakhe ezihlathini zethu.
“Kulezinyanga eziyisishiyagalombili ezidlule umama ubefana nengane esanda kuzalwa, engumuntu ophilayo nophefumulayo kodwa ongakwazi ukuziphilela ngokwakhe. Usana ngezinye izikhathi luyenqaba ukudla, kodwa engxenyeni yehora kamuva ludle, ngokukhala kwalo, lubonisa ukuthi lulambile noma ludinga ukunakekelwa. UMama akanayo indlela yokusazisa ngalokho akufunayo noma akudingayo. Abahlengikazi namalungu omkhaya kwadingeka ukuba bafunde ukuthi kungani ngezinye izikhathi egcina ukudla emlonyeni isikhathi eside kodwa engakugwinyi. Ngosizo lukadokotela, siye sathola ukuthi lokhu kungenzeka ukuthi kubangelwa ukulinda kwakhe ukuba abhodle, ngenxa yokugogeka kwakhe kohlangothi, izicubu zakhe azisebenzi ngezinye izikhathi. Uma ephanga futhi egwinya ngaphambi kokuba kulungele, uyobindwa.
“Ekunikezeni ukunakekela okuhle osaneni (othile onjengoSuzy noma umama) umuntu kufanele azifundise. Yeka ukuthi uSuzy wayenenhlanhla kanjani ukuba abe nomkhaya onjalo onakekelayo nonothando! Sizizwa sinenhlanhla ngokuthi sikhuliswe abazali esiye sabajabulela. Lapho sikhula, uMama wayesifundela izihloko ezivela ezincwadini zeWatch Tower ezimayelana nokusikisela kwezempilo nezinye izihloko eziningi ezithakazelisa umkhaya. Wayengikhuthaza ukuba ngisebenzise ukwaziswa okunjalo ekubhaleni izihloko nasekunikezeni izinkulumo esikoleni.
“Ngakho manje thina bantwana singumzali, futhi uMama ungumntwana. Kungani ngakhala lapho ngifunda ngoSuzy? Kungani ngiye ngabukeza okwakwenzeka kumama wami osekhulile endabeni yentombazanyana enguSuzy? Ngicabanga ukuthi kungenxa yokuthi ngizizwe nginobuhlobo nonina. Futhi, ngizizwe ngokunzenzakalelayo nginothando olujulile nokwazisa ngoBaba wethu osezulwini, uJehova uNkulunkulu, lowo ngothando lwakhe ngathi sonke oye wenza ilungiselelo lokuthi intombazanyana enhle uSuzy nomama wethu ngolunye usuku, ezweni elisha likaNkulunkulu emhlabeni oyipharadesi, baphelele njengoba ahlosa ukuba isintu sibe njalo.—Mathewu 6:9, 10; IsAmbulo 21:4, 5.
“Ngethemba ukuthi ngolunye usuku, ePharadesi elizayo, imikhaya yethu yomibili iyohlangana futhi ibe ndawonye nabanye abanjengathi. Mhlawumbe ngalesosikhathi siyokhala izinyembezi zenjabulo, kanye nentokozo enkulu nokuhleka, siyisa ukubonga nodumo kuMdali wethu, uJehova, neNdodana yakhe, uJesu Kristu, uMhlengi wethu.”—Inikelwe.