Lapho IAIDS Ingaselona Usongo

Ngobusuku bango-October 3, 1984, uKyle Bork osemncane wazalwa ngaphambi kwesikhathi ngamasonto ayisikhombisa. Amaphaphu akhe amancane ayengakulungele neze ukusebenza ngendlela, khona-ke wathuthelwa esiBhedlela Sabantwana saseOrange County esikude ngamakhilomitha angama-56, lapho kwakutholakala khona imishini yokunakekela izingane ezinjalo ezigula kakhulu.

Udokotela wachaza ukuthi igazi likaKyle lalizodinga ukuba lenezelwe ngokumpontshelwa igazi; kungenjalo wayezofa noma kanjani. Nakuba kwakunzima kakhulu ngabazali, bama beqinile esinqumweni sabo esisekelwe eBhayibhelini sokungavumeli umntwana wabo ampontshelwe igazi. (Genesise 9:4, 5; Levitikusi 17:10-14; IzEnzo 15:28, 29) Udokotela wayeqonda futhi ebambisene nabo. Nokho, wathi, uma isimo siba sibi kakhulu, wayezothola imvume yasenkantolo futhi ammpompele igazi.

Ngokuphawulekayo, uKyle wabonisa ukululama kancane kancane, futhi ngosuku lwesishiyagalolunye, wakhishwa emshinini wokuphefumula. Ezinsukwini ezimbili kamuva abazali bamthatha baya naye ekhaya, futhi wakhula waba umntwana ojabulayo, nophile saka, njengoba ungase ubone esithombeni. Kodwa lokho akukhona ukuphela kwendaba.

Ngonyaka odlule izindaba zethelevishini eLos Angeles zabika ukuthi iningi labantwana ababesesiBhedlela Sabantwana saseOrange County cishe ngesikhathi uKyle ayelapho ngaso babethole iAIDS egazini elonakele. Isibhedlela sasizama ukuthintana nemikhaya yabantwana abacishe babe yizi-3 000 ukuze bahlolwe ukuthi banalo yini igciwane leAIDS.

Ngokushesha, abazali bakaKyle bashayela isibhedlela ucingo ukuze baqiniseke ukuthi wayengazange yini ampontshelwe igazi bona bengazi. Ngokushesha, isibhedlela sabashayela ucingo sibaqinisekisa ngokuthi wayengazange athole nelincane igazi futhi wayengekho engozini yokuthola iAIDS. “Sawa ngamadolo ethu ngokoqobo sambonga uJehova,” kuchaza abazali, “ngokusinikeza imithetho yakhe elungile namandla okugcina ubuqotho bethu lapho sibhekene novivinyo olunjalo.”