Zazithola Kanjani Izinsiba Ezithandeka Kangaka?
AMAFEFE ANESIFUBA ESINSOMI ayizakhamuzi ezivamile zaseAfrika ephakathi neseningizimu. Avame ukuqhwakela emithini noma ezintanjeni zocingo eduze komgwaqo. Lokhu kuwanikeza indawo enhle yokuthungatha izinambuzane nokunye ukudla endaweni ezungezile.
Uma uhamba unqamula eBotswana noma eZimbabwe, ungase ubone umudwa wezinsiba eziluhlaza ngokugqamile njengoba eyodwa yalezinyoni indiza inqamula umgwaqo. Njengoba igama layo lesiNgisi elithi roller libonisa, ngezinye izikhathi zigabisa ngezinsiba zazo ezimibalabala ngombukiso wokushwibeka nokuphenduphenduka emoyeni. Umfanekiso walenyoni ohambisana nesihloko nesenezelo ngophiko lwayo kwembula imibala egqamile yefefe. Izinsiba zezimpiko ziyinhlanganisela yemibalabala yokuluhlaza okwesibhakabhaka kanye nomnyama nonsundu. Yeka ukuthi lokhu kuphambana kahle kanjani nesifuba esinsomi izihlathi ezisawolintshi, isiphongo esimhlophe, nesiqhova esiluhlaza okotshani ngokuphaphathekile! Lokhu kuphakamisa umbuzo obalulekile: Zazithola kanjani izinsiba ezithandeka kangaka?
Uma uhlola izinyawo zefefe, uzophawula ukuthi imbozwe ngamazenga, hhayi izinsiba. Ingabe izinsiba zazo zazivelela ngengozi zisuka emazengeni esilwane esihuquzelayo, njengoba izazi zokuziphendukela kwemvelo zifundisa?
Nokho, cabangela ukuthi usiba luyisimangaliso sobunjiniyela. Ukusuka esiqwini sosiba kunezinhlu zamagatsha ezinsiba. “Uma kungenzeka ukuba amagatsha amabili ahlangene ahlukane—futhi kudingeka amandla amakhudlwana ukudonsa ulwebu losiba lwehlukane—aphinde ahlangane futhi njengoziphu ngokudonsa usiba ngamachopho eminwe,” kuchaza incwadi yesayensi ethi Integrated Principles of Zoology. “Yebo, inyoni yenza lokhu ngomlomo wayo.”
Ingabe lamakhulukhulu “oziphu” abasebenza kahle avela ngengozi? Ingabe ososayensi banabo ubufakazi bokuthi izenga laziphendukela ngokoqobo laba usiba? “Kuyamangalisa ngempela,” kuvuma incwadi eshiwo ngenhla, “ukuthi nakuba izinyoni zanamuhla zinakho kokubili amazenga (ikakhulu ezinyaweni zazo) nezinsiba, alikho izinga eliphakathi kwalokhu kokubili eliye latholakala phakathi kwalezinto zombili kokubili emivubukulweni yasendulo noma ezinhlotsheni eziphilayo.”
Ngokuqinisekile izinsiba ziphethe ubufakazi bukaNjiniyela Omkhulu oyingcweti futhi ekuhlanganiseni imibala ethandekayo. Izidalwa ezinjefefe elinesifuba esinsomi zibalwa phakathi ‘kwezinyoni ezindizayo’ ‘ezidumisa igama likaJehova,’ uNkulunkulu weqiniso.—IHubo 148:7, 10-13.
[Umthombo Wesithombe ekhasini 16]
National Parks Board of South Africa