Ukwakheka Kwegobolondo
INGABE wake waqaphela ukuthi kulula kanjani ukuqhephula umucu kashoki? Kodwa manje, ake uzame ukuqhephula igobolondo leabalone ebomvu. Ngokunokwenzeka uzodinga isando ukuze uliqhephule. Kanti igobolondo leabalone lenziwe ngento efanayo naleyo eyenza ushoki—icalcium carbonate. Kumane kuwukuthi nje igobolondo lihlanganiswe ngendlela ehlukile. Eqinisweni, lihluke kangangokuthi lingamelana nokuhlephuka ngokuphindwe ka-40 kunoshoki.
Iabalone ikwazi kanjani ukwakha ngalendlela yobuciko? Ososayensi baseYunivesithi yaseWashington eSeattle, eU.S.A., baye badalula enye yezimfihlo zalomnenke wasolwandle. Iabalone isebenzisa igobolondo layo elilodwa elisandishi njengodonga lokuvikela ezintweni ezingaphandle. Ukuze liqine, igobolondo likhula ngezingwengwezi. Ungwengwezi olungaphandle lumahhadlahhadla futhi alubushelelezi. Kodwa ungwengwezi olungaphakathi, olubizwa ngokuthi inacre, lucwazimula ngobuhle obukhanyayo, futhi kulapho ukuqina kwegobolondo.
Ososayensi baseWashington baye bathola ukuthi lolungwengwezi olungaphakathi “lunento efana nesitini nosimende eyelakanyiswe yaba isicaba,” kuphawula iScience News. Njengoba cishe ziwububanzi obuyingxenye yesigidi yemitha kuphela, lezitini ezincane zihlanganiswe ngosimende owenziwa yiabalone ngokwayo, okokunameka okunamandla kangangokuba ososayensi basazama ukukuqonda. Ososayensi bathi izingwengwezi “zezitini” ezincane zimelana nokushayeka ngokugudleka ezingwengwezini eziseduze. Ngesikhathi esifanayo, izingwengwezi zikasimende ngandlela-thile zihlanganisa izimfa ezivelayo “ngemisipha” ekhethekile. Kukonke, igobolondo lingase libe nezindlela ezinhlanu zokuvimbela ukuphuka!
Ososayensi bahlabeke umxhwele ngegobolondo eliqine ngokuphawulekayo leabalone kangangokuthi bazama ukusebenzisa amasu afanayo ekwakheni usimende oqinile. Uma bephumelela, ngokungangabazeki bayohalaliselwa. Yeka ukuthi kudabukisa kanjani ukuthi uMklami Omkhulu, omsebenzi wakhe bazama ukuwulingisa, akuvamile ukuba anikwe udumo ngokuhlakanipha kwakhe okungenakuqhathaniswa!—Jobe 37:14.