Intsha Iyabuza . . .

Kuthiwani Uma Abazali Bami Bengangisekeli Okholweni Lwami?

INTSHA eningi engamaKristu inabazali abangakholwa. Enye intombazane eneminyaka engu-12 ubudala ithi: “Yimina ngedwa engitadisha iBhayibheli emkhayeni wakithi. Futhi umama ufuna ngiyeke ukulitadisha.” Enye inabazali abehlulekayo ukuhola ngokomoya. Lezizimo zingaba uvivinyo lwangempela kosemusha ofuna ukukhonza uNkulunkulu.

Ukuzama ukuba ube umKristu weqiniso ngaphandle kokusizwa nokukhuthazwa abazali bakho kunzima. Kodwa ungaphumelela! Izibonelo eziningi, kokubili ezesikhathi esidlule nesamanje, ziyakufakazela lokho.

Intsha Ethembekile Ezikhathini ZeBhayibheli

Cabangela isibonelo sika-Abela, indodana yombhangqwana wokuqala ongabantu, uAdamu noEva. UAdamu noEva kwakumelwe banikeze izingane zabo ukusekela okuphelele ngokomoya. Kodwa bahlubuka futhi bafulathela uJehova, beshiya izingane zabo ukuba zizibonele ngokwenkolo. Kunokuba azidabukele noma avumele ukuntula kwabazali bakhe ngokomoya ukuba kudambise ukwazisa kwakhe ngezinto ezingcwele, ngokusobala uAbela wafunda lokho ayengase akufunde ngoMdali. UJehova wayekhulumisana namadodana ka-Adamu, uKayini noAbela, futhi uAbela wakha ubuhlobo noNkulunkulu futhi wakhula waba indoda yokholo. “Ngokukholwa uAbela wanikela kuNkulunkulu ngomhlatshelo omuhle kunoKayini, athola ngakho ubufakazi bokuthi ulungile.”—Heberu 11:4; Genesise 4:2-15.

UJosiya ungesinye isibonelo sentsha okwadingeka izenzele ngaphandle kokusekelwa abazali ngokwenkolo. Uyise, iNkosi uAmoni yakwaJuda, wabulawa lapho uJosiya eneminyaka eyisishiyagalombili kuphela ubudala. Lapho isaphila, iNkosi uAmoni “[y]enza okubi emehlweni kaJehova njengalokho enzile uManase uyise; uAmoni wahlabela zonke izithombe ezibaziweyo ayezenzileyo uManase uyise, wazikhonza. . . . kepha yena lowoAmoni wenza amacala akhe aba-maningi.” (2 Izikronike 33:22, 23) Khona-ke, ake ucabange ngesimo esingakhuthazi ngokomoya leso indodana kaAmoni uJosiya okwadingeka akhulele kuso.

Nakuba kunjalo, uJosiya “wenza okulungile emehlweni kaJehova, wahamba ngezindlela zikaDavide uyise . . . waqala ukufuna uNkulunkulu kaDavide uyise; ngomnyaka weshumi nambili [eneminyaka ecishe ibe ngu-20 ubudala] waqala ukuhlambulula uJuda neJerusalema, wasusa izindawo eziphakemeyo, nawoAshera, nezithombe ezibaziweyo, nezithombe ezibunjiweyo.”—2 Izikronike 34:2-4.

UJosiya wawathola kanjani amandla anjalo ngaphandle kosizo lukayise? Wathola ukusekela kwamanye amadoda angokomoya, anjengompristi omkhulu uHilikiya nonobhala wakhe uShaphani. Ithonya labo elihle elingokomoya ababenalo kuJosiya osemusha lamsiza ukuba ‘agcine onke amazwi omthetho.’ (2 AmaKhosi 23:24; 2 Izikronike 34:14-19) LowoMthetho wawudinga ukuba amakhosi azenzele ikhophi yawo futhi awufunde njalo imini nobusuku. (Duteronomi 17:18; Joshuwa 1:8) Ngokungangabazeki ukwenza kanjalo kwaba nengxenye enkulu ekukhuleni kukaJosiya ngokomoya.

Ukuthola Ukusekelwa Namuhla

Nawe ungakhula ngokomoya, ngisho noma ungakutholi ukusekelwa obungathanda ukukuthola kubazali bakho. Ngokuvamile ukusekelwa ungakuthola kubafowenu nodadewenu abangokomoya nakoyihlo nonyoko abasemabandleni oFakazi BakaJehova. (Marku 10:30) Kungase kube nentsha enesimo esingokomoya ebandleni ongase uyenze ibe abangane bakho. Noma kungase kube noFakazi abathile abadala kunawe abangase babe nesithakazelo kuwe. Ngokwesibonelo, omunye oweve eshumini nambili owayengenayise okuthiwa uJerry wayemenywa umdala webandla ukuba aye naye esifundweni seBhayibheli sasekhaya. Ngemva kwesifundo, babevame ukudla okuthile esitolo sokudla okuphekiwe futhi baxoxe. “Waba njengobaba kimi,” kukhumbula uJerry. Namuhla uJerry ushadile futhi ukhonza njengenceku ekhonzayo. Uyakubonga kakhulu ukusekela umdala amnika khona.

Ingabe bakhona abadala kunawe abaye bezwakalisa isifiso sokukusiza ngandlela-thile? Khona-ke kungani ungavumi? Futhi uma kungekho ozwakalise lesosifiso, thatha isinyathelo sokuqala sokuhlakulela ubuhlobo obuhle. Ungase uzame ngisho nokuya komunye wababonisi bebandla lakini. Mhlawumbe udinga othile ozokuqhubela isifundo seBhayibheli noma akusize ukuba ulungiselele izabelo zeSikole Senkonzo EsingokwaseZulwini.a Noma kungenzeka ukuthi umane nje udinga ubudlelwane obuthile bomkhaya. Ngokuqondakalayo, ungase ube novalo lokwenza izidingo zakho zaziwe ngalendlela. Kodwa khumbula, abadala bebandla baye bamiselwa ukunakekela izidingo ezingokomoya zabo bonke ebandleni—kuhlanganise nezentsha. (1 Petru 5:2) Bangaba usizo ngempela.

Ukuhlakulela Ukusekelwa Ekhaya

Ingabe-ke lokhu kusho ukuthi akukho lutho ongalwenza ukuze uthuthukise isimo ekhaya? Akunjalo neze. Ngokwesibonelo, cabanga ngoJoe osemusha. Uchaza ubungako bokusekelwa okungokomoya akuthola kubazali bakhe ngokuthi “kulinganiselwe.” Nokho, uJoe uyavuma ukuthi kungenzeka ukuthi uye waba nengxenye ekungamsekelini kwabo. Kanjani? Nokho, kubonakala sengathi lapho uJoe eqala ukutadisha iBhayibheli noFakazi BakaJehova, wenza umzamo omncane wokusebenzisa ayekufunda ekuphileni kwakhe siqu. Ngakho waqhubeka engabalaleli abazali bakhe. Ngokulindelekile, ababonanga sizathu sokuba bona ngokwabo batadishe iBhayibheli, kungasaphathwa eyokukhuthaza yena ukuba afunde iBhayibheli ngokwengeziwe.

Kuthiwani ngawe? Uma abazali bakho bengakholwa, ingabe izenzo zakho zibanika isizathu sokukholelwa ukuthi uzimisele ngokuthi ufuna ukukhonza uNkulunkulu? Abafazi abangamaKristu batshelwa ukuba bazuzele ekukholweni amadoda abo angakholwa ngenkambo yabo enhle. Ingabe nabazali bakho ngendlela efanayo ‘bangazuzwa ngaphandle kwezwi’ uma ungase ubalalele futhi ubahloniphe? (1 Petru 3:1; Efesu 6:1-3) Uma kunjalo, ingabe bebengeke bakusekele ngokwengeziwe?

Khona-ke, kuthiwani uma abazali bakho bengamaKristu kodwa bengenzi konke okumelwe bakwenze ukuze bakusize futhi bakukhuthaze? Kungakhathaliseki ukuthi siyini isizathu sabo, ungenza okukhulu ekuthuthukiseni ekhaya lakini isimo esihle esingokomoya ngokubeka isibonelo esihle. (1 Thimothewu 4:12) Lapho sekuyisikhathi sokuya emihlanganweni yobuKristu, gqoka futhi ulungele ukuhamba. Ngokuzithandela yenza imisebenzi yasekhaya eyengeziwe ukuze nabazali bakho balunge kusenesikhathi. Kwazi bani? Mhlawumbe ukushisekela kwakho imihlangano kungase kubathelele.

Ingabe abazali bakho masonto onke bakuqhubela isifundo seBhayibheli sasekhaya? Uma kungenjalo, kungani ungabaceli ngendlela enomusa ukuba benze kanjalo, ungababeleseli noma ukhononde. Lapho isifundo siqhutshwa, musa ukubenza basebenze kanzima bezama ukukwenza ukuba unikeze ukukhulumela; lungiselela kahle futhi uhlanganyele. Yenza ingxenye yakho ekusenzeni sibe yisikhathi esijabulisayo. Babonge ngokukuqhubela isifundo. Lokhu kungase kunikeze abazali bakho isikhuthazo esidingekayo sokuqhuba isifundo njalo.

Kuthiwani uma kunokusabela okuncane emizamweni yakho? Musa ukudikibala. (Galathiya 6:9) Zwakalisa obala uthando lwakho ngoNkulunkulu neqiniso leBhayibheli. Musa ukuphelelwa intshiseko yakho noma umuzwa wokuphuthuma ekusizeni abanye ukuba bafunde ngoNkulunkulu. Qhubeka ‘uzakhela ekukholweni okungcwele kakhulu, ukhuleke ngomoya ongcwele.’ (Juda 20) Osemusha okuthiwa uLaverne wenza lokho kanye. Uthi, “ngiye nganquma ukungakuvumeli ukuba ubaba angivimbele ekufundeni ngeqiniso. Ngakho ngizifundela iNqabayokulinda kunokuba ngibukele iTV.b Futhi ngifunda umbhalo weBhayibheli njalo ekuseni. Ngiyakwazi ukuya emsebenzini wokushumayela ngokuba ngihambe nabanye abazalwane nodade abangamaKristu.”

Bonisa ukuzimisela okufanayo. Ungavumi ukuba ukuntuleka kokusekelwa ekhaya kukudikibalise. Hlala uqinile ezinkolelweni zakho. Uma kungenzeka, sondela eduze kontanga abanesimo esingokomoya nabadala kunawe ebandleni. Kodwa kungakhathaliseki ukuthi uyasekelwa noma cha, zimisele ukulondoloza ubungane bakho noNkulunkulu. Ungathembela kuye ukuba akusekele—Qhathanisa neHubo 119:116.

[Umbhalo waphansi]

[Isithombe ekhasini 19]

Amalungu ebandla avuthiwe angasiza ngokuba nesithakazelo kuwe