Inkululeko Engokwenkolo EBulgaria
Amabhasi ayisithupha avela eBulgaria, ayethwele izihambeli ezingaphezu kuka-300 ezazize eMhlanganweni Wesigodi “Wabathandi Benkululeko,” atheleka ezinkundleni zomhlangano ezingaphandle kwaseThessalonica, eGreece, ngoLwesine ebusuku, ngoJuly 11, 1991. Ngenxa yempi yangaphakathi eYugoslavia engumakhelwane nokuphazamiseka kwesimo eyakubangela kulendawo, lezihambeli zazingakwazanga ukuthola izimvume zazo zokuhamba kwaze kwaba semzuzwini wokugcina.
NgoLwesithathu ntambama izisebenzi zasezindlini zamanxusa eSofia, eBulgaria, zahlala isikhathi esengeziwe ukuze kulungiswe lezimvume. Ngakho, amabhasi akwazi ukuthatha izihambeli ezingxenyeni ezihlukahlukene zeBulgaria ngesikhathi esifanele ukuze aziyise endaweni yomhlangano ngobusuku bangaphambi kokuba umhlangano uqale ngoLwesihlanu, ngoJuly 12.
Ngalesosikhathi, oFakazi BakaJehova babevinjelwe eBulgaria, ngakho yeka injabulo okwaba yiyo ngabo ukujabulela ngokukhululekile ubunye bobuKristu ezweni laseGreece elingumakhelwane! Ihholo elalisendaweni yomhlangano wesigodi, linesiteji esihlotshiswe ngokukhangayo (elibonakala esithombeni), lalilungiselelwe izivakashi zaseBulgaria. Yeka indlela lezivakashi ezazijabule futhi zibonga ngayo ngokuba nesimiso esingokoqobo siqhutshwa ngolimi lwazo siqu! Okwakunomehluko kwakuyidrama engokweBhayibheli. Inkulumo yemizuzu engu-15 ewukufishaniswa kwedrama yanikezwa ngesiBulgaria, khona-ke izihambeli zabe sezihlangana nabafowabo abangamaGreki ukuze zibone ukudlalwa kwayo.
Okwakuvelele ngomhlangano wesigodi wesiBulgaria kwakuyinkulumo yobhapathizo ngoMgqibelo ekuseni. Inani eliphakeme labangu-342 laba khona, futhi abangu-39 babhapathizwa (abanye babo ababonakala ngenhla bemile). Izihambeli zazijatshuliswe futhi ukukhululwa, ngolimi lwazo, kwencwajana engangomagazini ethi Imimoya Yabafileyo—Ingakusiza Noma Ingakulimaza? Ingabe Ikhona Ngempela? nencwadi ethi INcwadi Yami Yezindaba ZeBhayibheli.
Kodwa injabulo enkulu kakhulu yayilindele lezihambeli ngokushesha ngemva kokuba ziphindele emakhaya eBulgaria. NgoJuly 17, esikhathini esingaphansi kwesonto ngemva komhlangano wesigodi, imisebenzi yoFakazi BakaJehova yavunyelwa ngokomthetho eBulgaria! Ngokuphawulekayo, enyangeni elandelayo abamemezeli bamabandla eBulgaria baba nesilinganiso samahora angu-21,2 enkonzweni yabo. Yeka indlela esingajabula ngayo ngokuthi inkululeko engokwenkolo iyajatshulelwa nakwelinye futhi izwe laseMpumalanga Yurophu!