Ngangisegumbini Lomfutho Futhi Ngilwela Ukuphila

“FUTHA izindlebe zakho! Kubalulekile ukuba ufuthe izindlebe zakho!” Lawa kwakungamazwi okuqala engawezwa ngemva kokuhlinzwa kukapopopo wami. Ngacabanga: “Kuyamangalisa lokho—isisu sami ababesihlinza. Kungani kufanele izindlebe zami zithinteke?”

Kodwa kancane kancane, njengoba ngangiqaphela indawo engizungezile, ngaqaphela ukuthi leli kwakungelona ikamelo lasesibhedlela elivamile. Ngangisekamelweni elide, eliminyene, elifana nesikhali esitshuzayo sasemanzini—igumbi elinomfutho owandisiwe.

Izinkinga Phakathi Nokuhlinzwa

Ngathola ukuthi ukuhlinzwa kwami kwakukukhulu ngokwengeziwe kunangendlela okwakuhloswe ngayo ekuqaleni. Umdlavuza wawedlulele nasesibindini futhi ngangophele kakhulu ngaphakathi. Ngesikhathi ngiphuma endlini yokuhlinzela isilinganiso sami sehemoglobin egazini sase sehle saba ngu-3,6. (Ihemoglobin evamile kumuntu omdala cishe ingu-15 g/100 ml wegazi.) Odokotela besaba futhi babizela ubaba esibhedlela. Naye ungomunye woFakazi BakaJehova futhi wenqaba ukuchitha isinqumo sami sokungafuni ukumpontshelwa igazi.—IzEnzo 15:20, 29.

Ngokuphuthumayo udokotela wami ohlinzayo wafuna imvume yokuba kusetshenziswe igumbi elinomfutho owandisiwe elisesakhiweni sababhukuda ekujuleni kolwandle eDyce, eduze neAberdeen, eScotland. Lokhu kwakuyosiza ekujikeleziseni umoya-mpilo esilinganisweni esincane segazi elalisele emzimbeni wami. Yatholakala imvume. Kwase kulandela uhambo olusheshayo lwamakhilomitha angu-8 ngeambulensi kusukela eAberdeen kuya eDyce lapho ngafakwa khona egumbini elinomfutho olingana nowamamitha angu-15 ngaphansi kogu lolwandle.

Lokhu kwakungokuhlangenwe nakho okusha kubo bonke abahilelekile, njengoba leligumbi ngokuvamile lalisetshenziselwa ukwehlisa umfutho kubabhukudi abasebenza ezakhiweni zikawoyela zasoLwandle Olusenyakatho. Ngokokuqala ngqá lisetshenziswa ekwelapheni kwangemva kokuhlinzwa, abahlengikazi ababili nochwepheshe, bonke beseminyakeni yama-20 yobudala, bahambisana nami ukuya emshinini lapho okwadingeka bahlale kuze kube yilapho wehliswa umfutho. Ngaphandle, ochwepheshe bezomfutho owandisiwe babenakekela ukulawulwa kwesakhiwo.

Egumbini Elinomfutho

Njengoba kwakumpontshelwa umoya egumbini, wawanda umfutho ngaphakathi. Ukuphefumula ngamapayipi anomfutho womoya ophindwe kabili nengxenye kunokuvamile kwakusho ukuthi ngangigcwalisa amaphaphu ami ngomoya-mpilo ophindwe kabili nengxenye kunokuvamile. Ukuxuba lomoya nengxenye yegazi lami ewuketshezi (manje elalisekelwe ngezandisi zomthamo) kwathatha indawo yokuntuleka kwehemoglobin.a

Izinsuku ezimbalwa ezalandela zazinzima ngempela. Izivakashi ezaziphumelele kuphela ekuhlolisisweni kwezokwelapha ezazikwazi ukungena engxenyeni eseduze lapho kwakungehliswa khona umfutho. Imbotshana encane esengxenyeni engaphambili yalesikhali esitshuzayo sasemanzini yayivumela ezinye izivakashi ukuba zingibone, kodwa engangikwazi ukukubona kwakuyiso elilodwa nje!

Umfowethu, naye onguFakazi, wangivakashela isikhathi esifushane egumbini. Lokho kwangiqinisa kakhulu. Ngokufanayo nawo wonke amakhadi abangane bami abaningi abawathumela ngomusa bebonakalisa uthando lwabo nezikhuthazo ezingokomBhalo. Zonke lezikhuthazo zabonakala zifika ngezikhathi engangizizwa ngazo ngibuthakathaka ngokukhethekile.

Ngosuku lwesihlanu ngisegumbini, udokotela ophethe isakhiwo waxoxa nami. Ngokusobala wayekhathazekile futhi wachaza: “Sekunomoya-mpilo omningi kakhulu manje egazini lakho.” Ngenxa yalokho, ngokusobala umnkantsha wami wawungasasebenzi. Wathi igazi lami lase linezimpawu zokopha okunganqamuki, futhi kwakulindeleke ukuba leligazi elincane elalisele laliyophuma ngenxa yokwehluleka kwesimiso sokuvimbela ukopha. (Ngalesikhathi ihemoglobin yami yayehle kakhulu ingasabaleki ngemishini. Yayingaba ngu-2,6.)

Abahlengikazi bakhala izinyembezi. Ngenza konke okusemandleni ukuze ngibaqinisekise futhi ngashiyela umphumela ezandleni zikaJehova.

Ukwehliswa Komfutho—Impumelelo!

Ngeziyalezo zikadokotela, inqubo yokwehlisa umfutho yaqaliswa ngokushesha. Abahlengikazi base beqala ukubonisa imiphumela emibi ebangelwa ukuba ngaphansi komfutho isikhathi eside kangaka; izinsuku ezintathu kwakuyisikhathi eside kunazo zonke esake sachithwa lapho ngaphambili. Lolu kwase kuwusuku lwesihlanu kakade kithi sonke! Manje kwadingeka ukuba silinde ezinye izinsuku ezimbili ukuze kwehliswe umfutho kancane kancane.

Ngokulandelayo kwangena udokotela, wayebonakala ejabule kakhulu futhi wathi: “Ngesizathu esithile esingaziwa, isilinganiso sakho sehemoglobin siye sathi ukukhuphuka.” Wayekholelwa ukuthi umnkantsha wamathambo wawusuqalile futhi ukusebenza. Ngachichima injabulo.

Isonto elilodwa ngemva kokuhlinzwa, ekugcineni ngaphuma egumbini nginesilinganiso sehemoglobin esingu-4,6 futhi ngathuthelwa ekamelweni eliseduze ukuze ngilindele iambulense eyayizongiyisa ekamelweni labasesimweni esibucayi eAberdeen. Ngiselapho, omunye woFakazi esikanye nabo wafika nomagazini ayebathole eHholo LoMbuso ebusukwini obungaphambili. Isihloko esingaphandle esasithi “Izinqumo Zokwelashwa—Ubani Okumelwe Azenze?” (kuPhaphama! yesiNgisi kaJuly 8, 1984) safika ngesikhathi esifanele! Ngasisebenzisa ukuze ngibonise isizathu sesinyathelo engangiye ngasithatha.

Kancane kancane ihemoglobin yami yakhuphuka ngaphezu kuka-5, futhi ngakhishwa ohlwini lwabantu abasesimweni esibucayi. Ngangingelashwa ngalutho ngaphandle kokudla okumnandi nokuhle. Manje umzimba wami wawuzenzela umsebenzi ophawulekayo ngokwawo. Njengoba isilinganiso sami sehemoglobin sasingu-7,8, ngakhishwa ngosuku olulandelayo.

Ngenxa yobude besikhathi esidingekayo ngokuvamile ukuze umuntu alulame kuloluhlobo lokuhlinzwa, nganikezwa isikhathi esiyizinyanga ezintathu zokungayi emsebenzini ukuze ngithole amandla. Isilinganiso sami sehemoglobin manje safinyelela ku-15,3, futhi ngaphinde ngathola isisindo samakhilogremu angu-9,5.

Yeka indlela engiye ngajabula ngayo kuleminyaka edlule ngokuthi ngisebenzise ukuphila kwami okungcono ukuze ngiqhubeke ngihlanganyela ukholo lwami nabanye! Ngimbonga kakhulu uJehova, uMsekeli wokuphila, kanye nezisebenzi zokwelapha ezinomusa ezanginika ukwelashwa okunjalo kokuzivumelanisa nezimo ngokuphumelela kangaka.—Njengoba ilandiswa uDoreen Strachan.

[Imibhalo yaphansi]

[Isithombe ekhasini 21]

By Courtesy of Grampian Health Board

[Umthombo Wesithombe ekhasini 20]

UDoreen, isonto elilodwa ngemva kokukhululwa esibhedlela