Ikusasa Eliqhakazile Lezingane
KUWORLD Summit for Children, abaholi abaningi bezwe bakhuluma ngokuqiniseka ngekusasa. Babikezela “inkathi entsha” yezingane, “ukuzinikezela okusha ezidingweni zezingane.” Bakhuluma “ngobunye benjongo obusha” obunikeza ‘ukuphila kumfelandawonye womhlaba onobunye nokuzimisela’” ukuze kusizwe izingane.
Lawo amazwi amahle. Kodwa ukuthi izizwe zizohamba ibanga elingakanani ekufinyeleleni imigomo yazo kusazobonwa. Kubalulekile ukuphawula ukuthi zingakapheli izinyanga ezinhlanu ngemva kwalomhlangano, izizwe zalwa empini yasePersian Gulf eyabonakala ingenye yeziyizindleko kakhulu—amaRandi ayizigidi eziyizinkulungwane ezingu-168—futhi neyonakalisa indawo ezungezile ukwedlula noma yini enye. Ngenxa yemiphumela yangemva kwayo amakhulu ezinkulungwane zabantu baseIraq naseKuwait baphoqeleleka ukuba bashiye amakhaya abo. Izinkulungwane zabhubha—kwelinye iqophelo amakhulu abantu usuku ngalunye—bebulawa indlala, ukungavikeleki, ukungondleki kahle, kanye nezifo. Cishe abangu-8 kwabayishumi kwakungabesifazane nezingane.
Kwabikezelwa Omaye
Abafundi beZwi likaNkulunkulu bayaqaphela ukuthi izinkinga ezikhathaza izingane zomhlaba zabikezelwa cishe iminyaka eyizinkulungwane ezimbili edlule. IBhayibheli laprofetha ‘ngalezinsuku zokugcina’:
◻ “Kuyakuba-khona . . . nezifo eziwumqedazwe.”—Luka 21:11, NW.
◻ “Kube-khona indlala.”—Mathewu 24:7.
◻ “[Abantu bayoba] ababhubhisa umhlaba.”—IsAmbulo 11:18.
◻ “Isizwe siyakuvukela isizwe, nombuso uvukele umbuso.”—Marku 13:8.
◻ “Kuzakuvela izikhathi ezinzima; ngokuba abantu bazakuba-ngabazithandayo, nabangathandi okuhle.”—2 Thimothewu 3:1-3.
IBhayibheli futhi labikezela ukuthi isikhathi siyeza ngokushesha lapho izizwe ziyocabanga ukuthi zenza impumelelo eyanele ekuchibiyeleni izinkinga zesintu kangangokuba ziyomemezela: “Ngukuthula nokuhlala kahle.”—1 Thesalonika 5:3.
Ikusasa Eliqhakazile
Nokho, lesosimemezelo empeleni siyoba uphawu lwesikhathi sokungenela kukaNkulunkulu ezindabeni zesintu. NgoMbuso wakhe wasezulwini, uNkulunkulu uyosusa lesimiso sezinto esikhona futhi alethe umhlaba omusha wokuthula kweqiniso kanye nokulondeka okuhlala njalo, kwezingane kanye nabantu abadala.—IzAga 2:21, 22; Daniyeli 2:44; Mathewu 6:10.
Ngaphansi kwelungiselelo elikhazimulayo loMbuso kaNkulunkulu, “abakhé khona abayikusho ukuthi: Ngiyagula.” (Isaya 33:24) Ukungondleki kahle kuyoba into yesikhathi esidlule: “Kuyakuba-khona inala kakolweni ezweni esiqongweni sezintaba.” (IHubo 72:16) Ngisho nempi ngeke isaba khona, ngoba iBhayibheli liyathembisa: “[UJehova] uphelisa ukulwa kuze kube-semikhawulweni yomhlaba.”—IHubo 46:9.
Kodwa kuthiwani ngazo zonke izingane—kanye nabanye—asebefile kakade ngenxa yokungondleki kahle, izifo, noma ezinye izimbangela? IZwi likaNkulunkulu eliphefumlelwe lithi: “Kuyakuba-khona ukuvuka kwabafileyo, okwabalungile nokwabangalungile.”—IzEnzo 24:15.
Lapho esemhlabeni, uJesu Kristu wabonisa ukuthi ukuvuselwa ekuphileni emhlabeni ezweni elisha likaNkulunkulu kwakuyohlanganisa nabancane. Ngokwesibonelo, lapho intombazane eneminyaka cishe engu-12 ubudala ifa, “babekhala bonke beyililela.” Kodwa-ke, ebamba isandla sentombazane uJesu wathi kuyo: “Ntombazana, vuka!” Ukulandisa okungokomlando kuthi: “Yavuka khona-lapho; wayala ukuba inikwe ukudla.” Basabela kanjani abazali bayo? IBhayibheli liyabika: “Bajabula kakhulu.”—Luka 8:40-42, 49-56, qhathanisa neNW; Marku 5:42.
Kwesinye isenzakalo, uJesu wahlangana nodwendwe lomngcwabo olwaluhilela umfelokazi owayeshonelwe indodana yakhe okuwukuphela kwayo. UJesu ‘wasondela, wathinta uhlaka; abaluthweleyo base bema. Wayesethi: Nsizwa ngithi kuwe: Vuka! Ofileyo wavuka, waqala ukukhuluma; [uJesu] wamnika unina.’ Labo ababeseduzane “bamdumisa uNkulunkulu.”—Luka 7:11-16.
Kanjalo, ngaphansi kokubusa okulungileyo kukahulumeni woMbuso kaNkulunkulu, izingane, kuhlanganise nalezo ezivusiwe, ziyoba nekusasa eliqhakazile kakhulu. Bayokwazi ukukhulela ezweni lokulunga nokuthula elihle kakhulu, elilondekile, elichumayo, kangangoba uJesu ulibiza ngokufanelekile ngokuthi “iParadisi.”—Luka 23:43.
[Isithombe ekhasini 9]
Ezweni elisha likaNkulunkulu, izingane ziyokhula zilondekile, zinempilo, futhi zijabulile