Ukunxanela Kwami UNkulunkulu Kuyaneliswa

NGANGICHITHE iminyaka eyishumi ngifunda ezikoleni zokufundela ubufundisi zaseNingizimu Melika, okwathi eminyakeni emithathu yokugcina yayo ngafunda imfundiso yenkolo nefilosofi kuphela. Kodwa manje othile ongafundile wesigaba esiphansi wayengitshela ukuthi angangisiza ukuba ngiqonde iBhayibheli. Ukudunyazwa kwami imfundo yasesikoleni sokufundela ubufundisi kwangibangela ukuba ngilalele.

Yini eyayingishukumisele ukuba ngifune ukuba umpristi? Nokho kungani iminyaka eminingi ngisezikoleni zokufundela ubufundisi yangishiya nginokunxanela uNkulunkulu okunganelisiwe?

Isizinda Sokuphila Okuphansi

Abazali bami basikhulisela eVallegrande eBolivia singabafana abayisikhombisa. Sasihlala esigodini esivundile, sifuye izinkomo futhi sitshala izitshalo ezinjengommbila, amantongomane, namazambane. Idolobhana lakithi iNaranjal lalisendaweni engayodwa, ngakho angizange ngilithole ithuba lokuya esikoleni. Nokho, ngafunda ukuzifundela nokubhala.

Unyaka ngamunye umpristi wamaRoma Katolika wayehambela idolobhana lakithi ngenxa yomkhosi wenkolo wendawo. Ngangiyazisa indlela ayekhuluma ngayo ngoNkulunkulu. Ngokunye ukuhambela, wamemezela ukuthi kwakuvulwe isikole sokufundela ubufundisi eBolivia ukuze kuqeqeshwe izinsizwa ukuba zibe abapristi. Lapho ngithi ngangifuna ukufunda ngoNkulunkulu, waqala ukuba nesithakazelo kimina. Wathi: “Ungaba njengesitebhisi, usize abantu ukuba bangene ezulwini.”

Ngangilangazelela ukuya kulesikole sokufundela ubufundisi futhi ngithole ulwazi ngoNkulunkulu. Nganginethemba lokuthi okunye kokudideka enganginakho kwakuzophela lapho. Ngokwesibonelo, nakuba umama wami ayengifundise ukuthi izintaba, izimbali, nezihlahla kuyizipho ezivela kuNkulunkulu, wathi futhi uNkulunkulu uthumela abanye abantu esihogweni ukuze bayohlushwa kanzima. ‘UNkulunkulu angaba kanjani uhlobo olunjalo?’ ngizibuza.

Ukuqeqeshwa Esikoleni Sokufundela Ubufundisi

Lesikole esisha sokufundela ubufundisi sasiseTupiza, idolobha elisesigodini esihle. Ngafika khona ngo-1958. Lapho ngisemusha, ngangikuthanda ukukhwela egqumeni lapho ngangizindla khona ngoMdali wethu othandekayo. Nokho, ngadumala ngokuthi ngangingafundi okuningi ngoNkulunkulu kulesikole sokufundela ubufundisi. Lapho babengenalo ngisho neBhayibheli eliphelele, ‘babeneTestamente Elisha’ kuphela. Lapho ngicela ukuthola eliphelele, abaqeqeshi bangitshela ukuthi ngibekezele.

Ngemva konyaka wokuqala, abathathu kuphela bethu abafaneleka ukuba baqhubeke nezifundo. Bonke abanye baphindiselwa emakhaya. Njengoba sasimbalwa kakhulu, sathunyelwa eBuenos Aires, e-Argentina, ukuba siyoqhubeka nezifundo zethu. Lapho ngifika eSikoleni Sokufundela ubufundisi saseSan Miguel, ngazizwa ngesaba kakhulu. Sabukeka siyindawo enkulu kakhulu. ‘Ngokuqinisekile ngizokwazi ukusondela kuNkulunkulu lapha,’ ngicabanga. Safunda isiLatini, isiGreki, isiNgisi, nesiFulentshi, futhi safunda ngokuphila kwalabo iSonto lamaKatolika elalibahlonipha ‘njengosanta.’ Kodwa lezifundo zangishiya nginganelisekile. Imibuzo yami yasala ingaphenduliwe.

“Kwenzeka kanjani ukuba uNkulunkulu abe nguZiqu-zintathu?” ngibuza omunye wabaqeqeshi. Waphendula ngokuthi ngisho nezazi zemfundiso yenkolo ezidumile ezifana noThomas Aquinas wase-Italy wekhulu le-13 leminyaka azizange zikwazi ukuchaza izinto ezifana nalezo. Nangalesosikhathi ngangingakaze ngilibone iBhayibheli eliphelele, ngakho ngabuza omunye woprofesa ‘ngeTestamente Elidala.’

“Lelo ngelamaProthestani kuphela,” esho.

Ngazibuza ukuthi lokhu kwakungenzeka kanjani, njengoba ngangazi ukuthi uJesu wayevamile ukucaphuna kulo. Ngakhungatheka futhi ngacindezeleka.

Ngokuhamba kwesikhathi, abayisithupha bethu bakhethwa ukuba babe abefundisi abaseyizimfundamakhwela, futhi senza izifungo zokuba ngabamsulwa, abampofu, nabalalelayo. Ngemva konyaka sifunda njengezimfundamakhwela, saya esikoleni sokufundela ubufundisi esiseCórdoba, e-Argentina. Lapho sasigqoka kuphela izivatho zenkolo, ezazihlanganisa ingubo emnyama ende nokhololo omhlophe, kanye nerosari nesiphambano esikhulu esinomfanekiso kaKristu. Ngagcwala ithemba; manje ngokokuqala ngqá, ngangizothatha izifundo zemfundiso yenkolo.

Ukudumala Okwengeziwe

Izifundo zemfundiso yenkolo zazinesifundo sokucusumbula, esibheka iBhayibheli njengencwadi efana nezinye izincwadi. Ngadumala ngokuba imibuzo yami eminingi namanje yayingakaphendulwa. Ngaba umngane oseduze wombhishobhi. “Kwenzeka kanjani ukuba iBhayibheli lithi uJesu wayesesihogweni?”a ngimbuza. (IzEnzo 2:31) Kodwa wamane nje wawubalekela umbuzo wami.

Kwakunemibuzo eminingi futhi ephathelene nokuziphatha eyayingikhathaza. Ngabuza isazi esithile semfundiso yenkolo ngokushaya indlwabu nangobulili phakathi kwabantu abangashadile. Kunokuba sibhekisele kulokho iZwi likaNkulunkulu elikushoyo ngokuphathelene nalokhu, sasishisekela imiqondo yamuva yezazi zemfundiso yenkolo ezidumile zaseParis. Sangibonisa enye yezincwadi zazo. “Zithi lezizinto azisona isono,” sisho. “Akumelwe ukhathazeke.” Kodwa lempendulo ayizange ingenelise.

Ngolunye usuku ngangizibukela izincwadi nje emtatsheni wezincwadi walesikole sokufundela ubufundisi lapho ngazithola sengivule incwadi ethile ebhalwe ngesiFulentshi. Yayicaphune iHubo 42:2, elithi: “Umphefumulo wami womela uNkulunkulu.” Ngacabanga buthule ‘Phela, yiyo impela indlela engizizwa ngayo lena.’ Ngokushesha ngemva kwalokho, lapho ngivakashele ekhaya, ngaya emzini wezindela osedolobheni eliseduze laseVallegrande. Esitolo esidayisa izincwadi lapho ngabona iBhayibheli eliphelele—inguqulo yesiNácar-Colunga. Kwakungokokuqala ngqá ukuba ngibone iBhayibheli eliphelele. Ngingakholelwa nakancane ukuthi ngangingalithola, ngabuza ukuthi ngangingalithenga yini. Yeka ukujabula enganginakho lapho ngiphuma kulesositolo neBhayibheli lami siqu ngilifake ekhwapheni!

Ngaya ekhaya ngicula futhi ngishaya ikhwela. Lapho ngifika, ngaqala ukufunda iHubo 42, eliqala ngalamazwi: “Njengendluzele ilangazelela amanzi emifula, kanjalo umphefumulo wami ulangazelela wena-Nkulunkulu. Umphefumulo wami womela uNkulunkulu, uNkulunkulu ophilayo.” Ngacabanga, ‘mhlawumbe manje, ukunxanela kwami uNkulunkulu kuzokwaneliswa.’ Kodwa ngokushesha ngaqaphela ukuthi ngangizodinga usizo ukuze ngithole izimpendulo emibuzweni yami ezivela eBhayibhelini. Izifundo zami zasesikoleni sokufundela ubufundisi zehluleka ukunikeza usizo olunjalo.

Ngo-1966, ngatshelwa ukuthi isikole esiphakeme sokufundela ubufundisi esifundisa ngemfundiso yenkolo nefilosofi kuphela sase sivuliwe ngaseCochabamba ezweni engazalelwa kulo iBolivia nokuthi ngangizodluliselwa khona. Kulesikole sokufundela ubufundisi kwakufundisa abapristi abakhuluma iSipanishi abasebasha, izazi zemfundiso yenkolo zanamuhla, futhi sasinomtapo wezincwadi omuhle. ‘Mhlawumbe manje ngizozithola izimpendulo zemibuzo yami,’ ngicabanga.

Ngokuvamile ngangibuza imibuzo, enjengokuthi: “Kungenzeka kanjani ukuba uMariya abe unina kaNkulunkulu?” Nokho, abaqeqeshi babengenasithakazelo emibuzweni enjalo. Kunalokho, babekhathalela kakhulu ifilosofi yobuKhomanisi. Ngesinye isikhathi ngahlangana nokhadinali, kodwa wayenesithakazelo esikhulu ekungixoxeleni ngokuhlangenwe nakho kwakhe kwaseMpini yeZwe II kunasekuphenduleni imibuzo yami.

Ngemva kokuqeqeshwa iminyaka eyishumi esikoleni sokufundela ubufundisi, ngacela ukuthatha iholide lonyaka ngingekho esikoleni ukuze ngibe ngaphandle futhi ngihlangane nabantu. Ngangifuna ukubona ukuthi kunjani ukukhuluma nabantu ngezindaba ezinhle. Ngokushesha ngaqaphela ukuthi ngangingasoze nganeliswe imizi yezindela, ngakho ngacela ukuba ngikhululwe ezifungweni zami. Kamuva ngashada nowayeyindelakazi, uPorfiria. Sahlala edolobheni laseSanta Cruz, eBolivia.

Isivakashi Esithile Esangimangaza

Ngolunye usuku onyakeni olandelayo, ngangizihlalele nje egcekeni lapho owesifazane esasiqashe kuye ayebhaka khona isinkwa kuhhavini obaswa ngezinkuni. Indoda ethile yama esangweni. Ngacabanga ukuthi yayinengxoxo ethile yebhizinisi nalo wesifazane, ngakho-ke ngamemeza: “Ngena!” Yangena, futhi yahlala eduze kwami. Nakuba yayigqoke kahle, ngokubukeka kwayo ngangibona ukuthi yayikhulele esizindeni sokuphila okuphansi. Okwangimangalisa ukuthi yaqala ukukhuluma nami ngeBhayibheli.

Kamuva ngathola ukuthi igama lalendoda lalingu-Adrian Guerra nokuthi wayengomunye woFakazi BakaJehova. Akungithathanga isikhathi eside ukuba ngiqaphele ukuthi wayengakwazi ukufunda kahle. Ngangizimisele ukuzivikela kuyena, kodwa angizange ngizizwe ngesaba. Ngacabanga, ‘Phela, mina ngazi isiLatini nesiGreki. Ngiye ngafunda imfundiso yenkolo futhi ngachitha iminyaka eminingi ngixoxa ngefilosofi nezazi zemfundiso yenkolo nababhishobhi.’ Angizange ngimqhoshele noma ngimdelele, kodwa angizange nje ngilindele ukufunda noma yini kuye.

Wacela ukuzwa umbono wami embuzweni othi, Kungani ububi buye banda kangaka kulelizwe? Saxoxa ngalokhu, wayesecela ukuba ngimbonise iBhayibheli lami. Ngalesosikhathi ngase ngithenge iBhayibheli elalisanda kukhishwa i-Jerusalem Bible yamaKatolika. Wangicela ukuba ngifunde isAmbulo 12:12, esithi: “Kodwa kuwena, mhlaba nolwandle, iyeza inkathazo—ngokuba udeveli wehlele kini enolaka, azi ukuthi izinsuku zakhe zibaliwe.”

“Ngokuqinisekile lokho kubhekisela esikhathini lapho kuqala isono,” ngiphikisa. Wangicela ukuba ngifunde umongo wendaba, emavesini 7-10, athi impi ezulwini yaqala lapho uKristu eba iNkosi, futhi ngenxa yalokho uSathane nezingelosi zakhe baphonswa phansi emhlabeni. “Izimo ezimbi esizibonayo manje ziwumphumela wolaka olukhulu lukaDeveli,” kuchaza u-Adrian. “Kodwa singajabula ngokuthi uKristu manje useyiNkosi nangokuthi izinsuku zikaDeveli zibaliwe.”

Kwangijabulisa ukufunda lokhu eBhayibhelini lami. Kodwa futhi kwangimangaza ukuthi lendoda ephansi, emamatheka kahle kangaka, ingahlala nje lapho ingichazele ngomusa imiBhalo.

Ukunxanela Kwami UNkulunkulu Kuyaneliswa

U-Adrian wangishiyela izincwadi ezithile futhi wathembisa ukubuya. Ngajabula lapho engivakashela ngokulandelayo, futhi ngaqala ukumbuza imibuzo eyayingidide isikhathi eside, enjengokuthi: “UNkulunkulu angaba kanjani uZiqu-zintathu?” nothi, “Kungani uJesu ayesesihogweni?” Wasebenzisa insiza-kufunda yeBhayibheli ebizwa ngokuthi IQiniso eliholela ekuPhileni okuPhakade, futhi wangicela ukuba ngifunde eBhayibhelini lami siqu imibhalo ekhonjiwe elapho eyayiphendula imibuzo yami eBhayibhelini lami siqu. Ngazizwa nginjenge-burro (imbongolo noma isiwula). Ngafunda ukuthi igama likaNkulunkulu uYahweh, noma uJehova, nokuthi akayena uZiqu-zintathu, nokuthi isihogo siyithuna futhi uJesu wayengezwa lutho lapho izingxenye zezinsuku ezintathu.—IHubo 16:10; UmShumayeli 9:10; Isaya 42:8.

Ngangivame ukubuza esikoleni sokufundela ubufundisi ngokuphila kwangemva kokufa futhi ngangitshelwa ukuthi izulu lifana nesonto elikhulu lapho bonke beyokuma futhi bathandaze ngaphambi kukaNkulunkulu. ‘Yeka ukuthi kuyoba yisicefe kanjani!’ ngicabanga. Kodwa manje, njengoba ngangichazelwa ngesithembiso seBhayibheli sokuphila phakade emhlabeni oyipharadesi, ukuba nokholo kwami kokuthi uNkulunkulu unothando ngesintu kwavuselelwa.—IHubo 37:9-11, 39; IsAmbulo 21:3, 4.

Ngemva kokuhambela okumbalwa, ngolunye usuku u-Adrian wafika nomuntu wakwelinye izwe, amethula ngokuthi ungumbonisi webandla. “Ubuza imibuzo eminingi kakhulu,” esho, “ngicabange ukuthi lesithunywa sevangeli sizokwazi ukukusiza kangcono kakhulu.” Kodwa mina ngangithanda u-Adrian, futhi ukuba khona kwalesithunywa sevangeli kwangishayisa ngovalo. Ngakho ngaqhubeka ngifunda iBhayibheli no-Adrian. Ngaqala ukuya emihlanganweni eHholo LoMbuso futhi ngathola ukuthi izinkulumo zeBhayibheli zazifundisa kakhulu.

Ukunqoba Ukwesaba Kwami

Ngokuhamba kwesikhathi u-Adrian wangikhuthaza ukuba ngikuhlanganyele nabanye lokho engangikufundile. Emihlanganweni yabo oFakazi BakaJehova bakhuthazwa ukuba bafundise endlini ngendlu. Eqinisweni, ngaqaphela ukuthi isihloko seBhayibheli u-Adrian ayesicabangele nami ekuqaleni, esiphathelene nembangela yobubi obandayo, sasiyisihloko sengxoxo esasisetshenziswa oFakazi BakaJehova eBolivia ngaleyonyanga ngo-1970. Ngaphawula ukuthi ukuqeqeshwa ayekutholile u-Adrian kwamhlomisela ukuba akhonze uNkulunkulu kangcono ngaphezu kwalokho iminyaka eyishumi yokuqeqeshwa kwami eyayingihlomise ngakho! Nokho, wawungethusa umqondo wokuvakashela abantu emakhaya abo. Kwakuhluke kakhulu ekushumayeleni kubantu abeza esontweni.

Ngesikhathi esilandelayo u-Adrian ezofunda nami, ngacasha endlini ngenza sengathi angikho ekhaya. Kumelwe ukuba wasola ngoba walinda ngokubekezela ingxenye yehora egcwele ngaphambi kokuba ahambe. Kodwa akazange angidele; okwangimangalisa ukuthi wabuya ngesonto elilandelayo. Kancane kancane, uthando lwami ngoJehova lwaqina ngokwengeziwe, futhi ngakunqoba ukwesaba kwami. Mina nomkami sabhapathizwa ngo-1973. UPorfiria waba iphayona, ekhonza isikhathi esigcwele emsebenzini wokushumayela futhi eqhuba izifundo zeBhayibheli. Waqhubeka kwaze kwaba sosukwini afa ngalo ekuqaleni kuka-1992.

U-Adrian waba umfundi oqephuzayo, futhi sekuyiminyaka eminingi manje, ngilokhu ngikhonza njengomdala ebandleni. Sobabili no-Adrian siyaqhubeka sishumayela izindaba ezinhle zoMbuso kaNkulunkulu endlini ngendlu. Muva nje ngahlangana nowesifazane othile owathi: “Kwakumelwe uhlale esontweni. Ngabe wenza izinto eziningi ezinhle khona.”

Ngambuza ukuthi wayenganginikeza yini iBhayibheli lakhe. Lapho enginika, ngambonisa uJeremiya 2:13, ochaza indlela u-Israyeli alenqaba ngayo iZwi likaNkulunkulu. Uthi: “Bangishiyile, umthombo wamanzi aphilileyo, bazigumbele imithombo, imithombo evuzayo, amanzi angenakuhlala kuyo.”

“Into efanayo iye yenzeka ngokuphathelene nesonto,” ngimtshela. “Ukuzama ukwanelisa ukunxanela kwabantu uNkulunkulu ngezimfundiso zobuKatolika eziphikisana neBhayibheli kufana nokuzama ukukha amanzi emthonjeni ovuzayo.” Ngempela, kwaba kuphela ngesikhathi ngiqala ukufunda iBhayibheli noFakazi BakaJehova lapho ukunxanela kwami uNkulunkulu kwaneliswa khona.—Njengoba ilandiswa uHugo Durán.

[Umbhalo waphansi]

[Isithombe ekhasini 15]

Mina no-Adrian sishumayela izindaba ezinhle zoMbuso ndawonye