Isikole Esisha E-Afrika

Ngumlobeli we-Phaphama! eNigeria

NGO-JULY 1990 kwafundwa incwadi eyabangela injabulo enkulu phakathi kwezisebenzi zokuzithandela ezingaphezu kuka-400, ezingoFakazi BakaJehova, ezihlala futhi zisebenze ehhovisi legatsha le-Watch Tower Society e-Igieduma, eNigeria. ISikole Sokuqeqeshelwa Inkonzo, esaqaliswa e-United States ngo-1987, sasiza e-Afrika, futhi amakilasi okuqala ayezoqhutshelwa e-Igieduma!

Ezinyangeni ezalandela, umkhaya waseBethel walungiselela ikilasi lokuqala.a Abafundi nabafundisi babezodinga izindawo zokulala. Amakamelo ezivakashi akhona ayengeke anele; kwakudingeka amanye amakamelo engeziwe angu-15. Ngakho laboFakazi baqala ukusebenza beguqula amakamelo okubeka impahla abe amakamelo okuhlala akhangayo. Lokhu kwakuhlanganisa ukufaka ama-tile phansi, ukupenda izindonga, nokufaka amakhethini. Umnyango wokubaza wakha futhi wafaka imibhede, amakhabethe, namadeski. Ekugcineni, kwafakwa izihlalo, izibani zokutadisha, namashalofu ezincwadi. Lamashalofu agcwaliswa izincwadi ezingokwaseZulwini.

Ngaphezu kwalokho, ikamelo lokuzijabulisa lomkhaya laguqulwa laba ikilasi nomtapo wezincwadi wabafundi. Elinye lamakamelo okulala omtholampilo laba ihhovisi lesikhashana labafundisi futhi lafakwa amadeski, amatafula, nezinye izinto zasehhovisi. Phakathi nalesosikhathi, njengoba izindaba zalesikole esisondelayo zazaziswa kulo lonke izwe emihlanganweni yesifunda neyesigodi yoFakazi BakaJehova, kwafika amakhulu ezicelo ezivela kulabo ababengase bafaneleke njengabafundi.

Ngesonto lokuqala lika-February 1992, konke kwakumi ngomumo. Abafundisi ababili, uMichael Purbrick noPeter Nicholls, base befikile bevela eBrithani ukuzofundisa ikilasi lokuqala. Ngaphezu kwalabafundi abangu-22, kwafika futhi nabathathu ababezoba abafundisi, u-Isaiah Mnwe, u-Isaiah Olabode, noPius Oparaocha. Laba kwakungoFakazi baseNigeria ababezoqeqeshelwa ukufundisa amakilasi ayezolandela.

Injongo Yalesikole

Kuyo yonke iBethel, kwakukhona umoya wokulangazelela nenjabulo. Ngani? Ngenxa yomphumela ozuzisayo lesikole esasizoba nawo emsebenzini wokwenza abafundi eNigeria. Esikhathini eside esidlule uJehova wabikezela ukuthi wayeyolungiselela ‘izipho ezingabantu.’ (IHubo 68:18, NW) Wakwenza lokhu ngezikhathi zabaphostoli, ngisho nanjengoba umphostoli uPawulu abhala kweyabase-Efesu 4:8-11. Namuhla, uJehova usalungiselela izipho ezingabantu. ISikole Sokuqeqeshelwa Inkonzo siyilungiselelo lothando lokuhlomisa amanye alamadoda ukuze asingathe imithwalo yemfanelo eyengeziwe enhlanganweni.

Kulelizwe, kunoFakazi abangaphezu kuka-160-000 emabandleni angaphezu kwangu-3 000. Amanye alamabandla anomdala oyedwa noma ababili kuphela nezinceku ezikhonzayo ezimbalwa. Amanye amabandla anamasimu amakhulu lapho izindaba ezinhle zingashunyayelwa khona kabanzi. Ngakho, kunesidingo esikhulu samadoda afanelekayo ukuze angaholi nje kuphela emsebenzini wokushumayela kodwa futhi ukuze aluse umhlambi futhi afundise emabandleni.

Injongo yeSikole Sokuqeqeshelwa Inkonzo iwukuqeqesha abazalwane ukuze banakekele lemithwalo yemfanelo. Ngemva kokuthweswa iziqu, abanye balabafundi baqala umsebenzi wobuphayona obukhethekile noma umsebenzi wokujikeleza, okuyizici zenkonzo ezinesidingo esikhulu eNigeria. Abanye baphindela emabandleni abo ukuze banikeze usizo nesikhuthazo kubazalwane basendaweni. Yeka isibusiso amadoda anjalo afaneleka kahle ayiso emabandleni awakhonzayo!

Ukuqeqeshwa Okuyingqayizivele

Nakuba iSikole Sokuqeqeshelwa Inkonzo siwuphiko lwe-Watchtower Bible School of Gilead, eqeqeshela izithunywa zevangeli inkonzo yakwamanye amazwe, uhlelo lwaso lwezifundo luyingqayizivele. Phakathi nalesikole esithatha amasonto ayisishiyagalombili, abafundi batadisha iBhayibheli ngokujulile. Ngokucophelela bacabangela izimfundiso eziningi zeBhayibheli, kuhlanganise neseluleko esiphathelene nemithwalo yemfanelo yokwalusa neziqondiso zokusingatha izinkinga ekuphileni kwamaKristu. Bafunda nalokho imiBhalo ekufundisayo ngokuphathelene nezindaba zokuqondisa, zokwahlulela, nezokuhlela. Bathola ukuqeqeshwa okukhethekile ekukhulumeni obala futhi bathola nokunakekelwa komuntu siqu okuvela kubafundisi abakhathalelayo, ababasizayo ekuthuthukeni kwabo okungokomoya.

Sekukonke, umfundi ngamunye uthola izabelo zasekilasini ezingu-45, futhi uzuza ekufundisweni kwasekilasini kwamahora angu-256. Ngaphezu kwalokho, usebenzisa amahora angu-140 enza umsebenzi wesikole namahora angu-14 ebhala ukuhlolwa.

Nakuba incwadi eyinhloko kuyiBhayibheli, abafundi bacelwa ukuba beze esikoleni namakhophi omuntu siqu angu-16 ezinye izincwadi, izinsiza-kufunda zeBhayibheli ezinyatheliswe yi-Watch Tower Society. Phakathi nesikhathi sesikole, abafundi babuye bacwaningisise kwezinye izincwadi ezitholakala emtatsheni wezincwadi waseBethel onakho konke okudingekayo. Ngokusobala, kudingeka ukuba babe abafundi abahle.

Ngaphandle komsebenzi wesikole, abafundi basebenza imizuzu engu-45 usuku ngalunye komunye weminyango yaseBethel eyisishiyagalombili: ukuhlanza, endlini yokudlela, ukunakekela amagceke, ukucoca amakamelo okulala, ekhishini, elondolo, emnyangweni wezokuthumela, nasemnyangweni wamaloli. Bashintshashintsha imisebenzi ukuze kuthi ekupheleni kwalezifundo zamasonto ayisishiyagalombili, ngamunye abe esenokuhlangenwe nakho kuyo yonke leminyango. Omunye umfundi waphawula: “Ukusebenza kwami eminyangweni ehlukene kwangenza ngaqonda ukuthi uJehova ungumqondisi walomsebenzi.” Omunye wathi: “Abengamele bakulungele ukufundisa nokuqondisa ngothando.” Omunye futhi waphawula: “Umsebenzi waseBethel ungokuthile wonke umuntu okufanele akunambithe futhi abone ukuthi kuhle.”

Labazalwane basabela kanjani ekuqeqeshweni abakuthola? Omunye wathi: “[Kwakuyi]sikole esiphambili kunazo zonke.” Omunye wababaza ngentshiseko: “Yeka ilungiselelo elibabazekayo!” Benezinhliziyo ezigcwele injabulo nokwazisa, abafundi bekilasi lokuqala babhala lokhu encwadini: “Isinqumo sethu . . . siwukugxilisa ukuphila kwethu esigijimini sezindaba ezinhle.”

Ukuphawula Okuvela Ensimini

Phakathi nengxenye yokuqala ka-1992 neka-1993, kwaqhutshwa amakilasi okuqala amane eSikole Sokuqeqeshelwa Inkonzo eNigeria. Encwadini yokwazisa eyabhalelwa iNdikimba Ebusayo, abafundi bekilasi lesibili babhala: “Ngempela, asikaze sibe sesikoleni esingcono kunalesi. Lezifundo zingcono kakhulu kunezifundo zaseyunivesithi. Ngakho sikuthola kulula ukuvumelana noWilliam Phelps ukuthi ‘ulwazi lweBhayibheli ngaphandle kwezifundo zasekolishi luyigugu kakhulu kunezifundo zasekolishi ngaphandle kweBhayibheli.’ Kukho konke lokhu, isithakazelo senu esiqotho kithi sisobala. Ngakho sizimisele ukwenza umsebenzi wesikhathi esigcwele ube umsebenzi wethu wokuphila.”

Labafundi abathweswa iziqu baye bamukelwa kanjani ezabelweni zabo ezintsha? Umbonisi othile ojikelezayo wabhala incwadi ngokuphathelene nabafundi ababili bekilasi lokuqala abakhonza njengamaphayona akhethekile: “Manje imihlangano iyakhanga, iyakhuthaza, iyajabulisa, futhi inenjongo. Imisebenzi enkonzweni yasensimini iyanda . . . Ibandla lichichima injabulo . . . Lapho ngixoxa nabazalwane abathile ngokuphathelene nalamaphayona akhethekile, umbonisi owengamele waphendula ngezinyembezi zenjabulo, ethi: ‘Siyambonga uJehova nenhlangano yakhe ngokuthumela abasizi abanengqondo nabaphumelelayo ebandleni lethu.’”

Ubani Ofanelekayo?

Ukuba khona eSikoleni Sokuqeqeshelwa Inkonzo kunoma yiliphi izwe kuyilungelo lenkonzo elimangalisayo, isibusiso esimangalisayo esivela kuJehova. Ngokungangabazeki, lokhu kuqeqeshwa kusiza abafundi ukuba bathuthukise izinga labo njengamadoda angokomoya futhi kubahlomisele ukuba basetshenziswe uJehova ngokugcwele ngokwengeziwe.

Ngokuqondakalayo, izimfuneko ziphakeme. Ukuze bafaneleke, abafaka izicelo kumelwe ukuba sebekhonze njengabadala noma izinceku ezikhonzayo ebandleni lobuKristu okungenani iminyaka emibili. Ukunakekela okukhethekile kunikezwa labo abasenkonzweni yamaphayona avamile. Bonke kumelwe babe abangashadile futhi abaneminyaka ephakathi kwengu-23 nengu-50. Kumelwe ukuba abazange basolwe ikomiti yokwahlulela noma basuswa ekuhlanganyeleni phakathi neminyaka emihlanu edlule. Abafaka izicelo kufanele bakwazi ukufunda, ukubhala, nokukhuluma isiNgisi ngokushelelayo, futhi badinga ukuba sesimweni esihle sempilo, bangadingi ukunakekelwa noma ukudla okukhethekile.

Ngokuphawulekayo, labo abazenza batholakale kumelwe bakulungele, bazimisele, futhi bakwazi ukukhonza nomaphi lapho bengase badingeke khona. Lokhu akudingi nje kuphela isifiso esinamandla sokwenza intando kaNkulunkulu kodwa futhi umoya ka-Isaya, owazinikela ngokuzimisela ukuze enze umsebenzi okhethekile, ethi: “Nangu mina; ngithume mina.”—Isaya 6:8.

Ingabe unomoya ofanayo? Ingabe usesimweni sokulwela ukufanelekela lelilungelo lenkonzo? Labo abaye benza kanjalo abazisoli. Omunye umfundi owathweswa iziqu kulesikole manje okhonza njengombonisi wesifunda wabhala: “Kimina, iSikole Sokuqeqeshelwa Inkonzo sasiyisipho esingenakuqhathaniswa. Siye sabonakala siwumvuthwandaba wokuphila kwami okungokomoya. Ukube benginethuba lokuphinde ngiphile ukuphila kwami, bengingeke ngikhethe inkambo ehlukile.”

[Umbhalo waphansi]

[Izithombe ekhasini 16, 17]

Abafundisi u-Isaiah Mnwe noPius Oparaocha

Izifundo zasekilasini

Iqembu lengxoxo lasekilasini

Ukucwaninga emtatsheni wezincwadi

[Izithombe ekhasini 18]

Ukusebenza eLondolo naseMnyangweni Wezokuthumela