Okuphawulwa Abafundi Balomagazini
Ukuba Umama Ngokwesivumelwano Esihlokweni senu esithi “Ukuba Umama Ngokwesivumelwano—Ingabe KungokwamaKristu?” (March 8, 1993), nicaphune uLevitikusi 18:20 (NW) njengothi: “Akumelwe ukhiphele isidoda sakho kumfazi womngane wakho.” Nokho, i-King James Version imane nje ithi: “Ungalali nomkamakhelwane wakho ngokobulili.” I-New English Bible ne-New American Standard Bible zifundeka ngendlela efanayo. Niguqula imiBhalo. Ekuqaleni lalithini iZwi likaNkulunkulu?
S. S., United States
Izinguqulo eziningi ziyalifingqa lelivesi. ‘I-New World Translation’ ilihumusha ngokwezwi nezwi, njengoba kwenza ‘i-NIV Interlinear Hebrew-English Old Testament’ ‘ne-Interlinear Hebrew/Greek English Bible.’ Lena yamuva ihumusha lelivesi kanje: “Futhi awuyukunikeza imbewu yakho yokuhlangana ngokobulili kumkamakhelwane wakho.”—ED.
Izinyembezi Isihloko esithi “Kungani Sichiphiza Izinyembezi?” (September 22, 1992) sangishukumisa ngokujulile. Esikhathini eside bengilokhu ngifuna ukwazi isizathu sokuba sikhale nokuthi iyini indima yezinyembezi. Ngenxa yalesihloko esibhalwe kahle, ekugcineni sengiyaqonda. Sangenza ngaba nomuzwa ojulile wokubonga uJehova ngenxa yendlela emangalisayo asidala ngayo.
F. G., Portugal
Isikole Sasekhaya Ngifuna ukunibonga kakhulu ngesihloko esithi “Isikole Sasekhaya—Ingabe Sikufanele?” (April 8, 1993) Njengamanje ngifundisa ekhaya ababili kubantwana bami abane. Ezikhathini eziningi abanye baye bangitshela ukuthi ngibavikela kakhulu abantwana bami. Ngakho-ke ukungathathi-hlangothi kwenu kulendaba kwaziswa kakhulu.
B. W., United States
Indaba Yokuphila Okuhlangenwe nakho kukaMarlene Pavlow okunesihloko esithi, “Ukusondela KuNkulunkulu Kwangisiza Ukuba Ngiphumelele” (March 22, 1993), cishe kwakuyisihloko esikhuthaza kunazo zonke engake ngazifunda. Ngayithanda indlela ethembekile neqondile achaza ngayo ukuphila kwakhe. Njengoba ngake ngaba nezinkinga ezifanayo, ngazizwa ngisondelene noMarlene. Nginibonga kakhulu ngokuba nezihloko ezinhle kangaka zabantu abavamile abafana nathi. Kungenza ngikholelwe ukuthi likhona ithemba uma kunabanye abanenjabulo nobuhlungu obufana nobethu.
R. H., United States
Angikaze ngifunde isihloko esangithinta kakhulu kangaka. Ngokwezwi nezwi, sichaza ukuphila kwami siqu. Sasiyilokho kanye engangikudinga!
K. B., New Zealand
Ukwenza Abantu Bajabule Ngibhalela ukunincoma ngesihloko esithi “Ingabe Ungathanda Ukujabulisa Abangane Bakho?” (April 22, 1993) Njengomculi oyimfunda-makhwela, ngazuza kakhulu kuso. Abangane bami bavame ukungimema ukuba ngizobajabulisa emibuthanweni yobungane ngokudlala nangokubaculela. Ukusikisela kwenu okuphathelene nokwenza amaphepha abhalwé amazwi engoma nokuhilela izilaleli ekuculeni kwakukuhle kakhulu!
P. S. S. M., Brazil
Izilwane Ezingabangane Esihlokweni esithi “Ingabe Umntanakho Ufuna Ukuba Nesilwane Esingumngane?” (January 22, 1993), naphawula: “Amakati afuywayo, ngonyaka athelela abesifazane abakhulelwe abalinganiselwa ku-3 300 ngesifo se-toxoplasmosis, okuphumela esilinganisweni sokufa kwabantwana abangakazalwa esingamaphesenti angu-15.” Ngokuphathelene nomunye umthombo othembekile, isilinganiso sokuthathelwana kwalesifo sincane kakhulu. Ingabe aniyenzi ihaba ingozi yokufuya ikati?
K. T., Japan
Lamazwi obhekisele kuwo ayecashunwe ‘kuyi-U.S.News & World Report.’ Nakuba kuyisibalo esincane kuphela ngokuqhathaniswa sabesifazane abakhulelwe abathelelwa izifo ngamakati, ‘i-Wellness Letter’ eyanyatheliswa iYunivesithi yaseCalifornia eBerkeley isaxwayisa abesifazane abakhulelwe ngokuthi ‘bangasondelani kakhulu nekati.’ Ngenhlanhla, kuyivela kancane ukuba lesifo sithathelwane ngokuthinta nje ikati. ‘I-Wellness Letter’ ithi: “Ngokuvamile lesifo sithathelwana kakhulu lapho uthinta indle yekati, njengalapho uyilahla.”—ED.