Okuphawulwa Abafundi Balomagazini
Isayensi Ngibhalela ukunihalalisela ngochungechunge lwenu olunezingxenye eziyisithupha oluthi “Isayensi—Ukufuna Kwesintu Iqiniso Okuqhubekayo.” (April 8 kuya ku-June 22, 1993) Izihloko zenu zazingenalo ubandlululo futhi zazifundisa. Njengoba mina siqu ngingusosayensi, ngamangaliswa ukufunda indlela izazi zefilosofi ezingamaGreki, njengo-Aristotle, uPlato, nabanye, eziye zathonya ngayo umcabango wezesayensi.
O. O., United States
Engxenyeni yesithupha yochungechunge lwenu (June 22, 1993), nathi: “Ukubhujiswa kwendawo ezungezile okuye kwabangelwa isayensi kukhulu kakhulu.” Isayensi ayinacala ngokusetshenziswa kabi kwezinto ezisungulile. Icala likohulumeni abasebenzisa izindlela ezisemthethweni ezindala ekulawuleni ukusetshenziswa kwezobuchwepheshe.
C. C. R., United States
Loluchungechunge aluzange luzame ukubeka icala kososayensi kuphela ngezinkinga zendawo ezungezile yomhlaba. Empeleni, umusho owandulelayo waphawula ngokucacile ukuthi isayensi yamane nje “yaba nesandla ekudaleni” izinkinga ezinjalo. Izihloko ezazingaphambili kuloluchungechunge zabonisa ukuthi ososayensi kumelwe bahlanganyele icala nezazi zezombangazwe, osomabhizinisi, nabathengi.—ED.
Ngingedwa Ngiyabonga ngendaba yokuphila kaPepita Abernathy, “Ukuphila Okunenzuzo Nakuba Ngingedwa.” (February 22, 1993) Yangikhalisa. Ngaso sonke isikhathi ngiye ngakuthola kunzima ukushumayela kubangane noma ukusebenza insimu engasabeli kahle. Kodwa uPepita Abernathy washumayela ezingxenyeni ezihlukahlukene zomhlaba ngisho nalapho ayengalwazi ulimi! Manje senginesimo sengqondo esihlukile ngomsebenzi wokushumayela.
J. W., United States
Umculo Ngisanda nje kuqeda ukufunda uchungechunge oluthi “Umculo Wesimanje—Ingabe Uwukuzijabulisa Okungenangozi?” (June 8, 1993) Lapho ngisesikoleni esiphakeme, ngangihlanyiswa umculo onesigqi esinamandla. Imikhuba yami emibi nesimo sengqondo sokuvukela kwakuyimikhiqizo yemiqondo echazwa kulomculo onyanyekayo, onesigqi esibi. Kodwa lapho ngiye ngasondela ngokwengeziwe kuJehova, kuyilapho ngiye ngazonda ngokwengeziwe ngisho nesigqi salowomculo!
L. K., United States
Niye nanikeza thina ntsha iseluleko esiwusizo esisekelwe emithonjeni yamuva nethembekile. Abanye baye bacabanga ukuthi umculo uyamukeleka uma nje ungenakuchazwa njengonesigqi esinamandla noma i-rap, ngisho noma ukhuthaza ukuziphatha okubi, ubudlova, nokusetshenziswa kwezidakamizwa. Lezizihloko ziyiphikisile lemibono engalungile. Manje sonke sesiyayazi indlela yokuba abakhetha ngokwengeziwe lapho sikhetha umculo esiwuthandayo.
F. M., Italy
Indodana yami eyevé eshumini elinambili muva nje yasuswa ekuhlanganyeleni ebandleni lobuKristu. Ngazama ngawo wonke amandla ami ukuyinqanda ekulaleleni umculo we-rap—ngibonisana nayo, ngiyibonisa izimiso zeBhayibheli, ngihlanganyela nayo izihloko ezikhuluma ngalendaba. Kodwa yaqhubeka ilalela umculo we-rap ngasese, inomuzwa wokuthi wawungayithonyi. Nokho, yaqala ukwenza eziningi zezinto ezimbi ezidunyiswa kulomculo. Namanje ngisantengezela ngokomzwelo ngenxa yokuwa kwendodana yami. Ngiyethemba ukuthi bonke abazali abangamaKristu bayobonisa ukwazisa ngalokhu kwaziswa ngokukufunda nokukutadisha nabantwana babo.
G. C., United States
Akukhona nje kuphela ukuthi nibonisa ukuthi iziphi izinhlobo zomculo okufanele zigwenywe kodwa futhi nisekela amazwi enu ngesizathu esingenakuphikiswa, nokho esinobumnene nothando. Sinomuzwa wokuthi isifiso senu esijulile siwukusiza intsha ukuba ilibalekele lelizwe elingcole ngokuphelele.
B. V., France