Ingabe Opopayi Be-TV Abanobudlova Bayalimaza?

Ngumlobeli we-Phaphama! eBrithani

ISIHLOKO esiphambili se-Times yaseLondon sathi: “UBugs Bunny Usolwa Ngenxa Yezimpi Zasesikoleni.” Leliphephandaba labika indlela abanye othisha abazizwa ngayo ngokuziphatha kwentsha okuthiwa ilingisa izigcawu ezinobudlova ezivela kopopayi be-TV.

“Opopayi abaningi banobudlova,” kugomela elinye iphini likathisha-nhloko wesikole sabaqalayo, “futhi ngisho nakuba umuntu olungile enqoba ekugcineni, indlela akwenza ngayo lokhu ayithandeki.” Ingabe uzizwa ngendlela efanayo ngokuthambekela kopopayi be-TV?

Njengoba bebhekene nokuthandwa okwandayo kwezithombe zemidwebo ezenziwa ziphile, esezitholakala kabanzi ngama-video, abazali abaningi bazizwa bekhathazekile. Abanye bahlushwa “ukuthonywa opopayi” kwezingane zabo futhi basola opopayi ngokukhuthaza ubudlova, ukukhohlisa, nokungalaleli.

Kodwa ingaba khona yini ngempela ingozi ekubukeleni opopayi, ngisho nakuba benezigcawu ezithile zobudlova?

Ingabe Ikhona Ingozi?

Ngokweziqondiso ze-BBC (British Broadcasting Corporation), abakhiqizi bezithombe ze-TV kumelwe bayicabangele ngokucophelela imiphumela yanoma yibuphi ubudlova obuvezwa ezinhlelweni zabo, kuhlanganise nopopayi. Umbono wezikhulu uwukuthi “ukushukunyiswa kwemizwelo okubangelwa ubudlova kukhula nekhono lesibukeli lokuzibeka kulesosimo.”

Ngokwendlela abenziwe ngayo, opopayi baveza izimo ezikhangayo; ngakho ingabe ingozi incane? Intsha eningi ekushisekelayo ukubukela opopayi be-TV ngokusobala yenza lokhu ukuze ihleke. Opopayi bayahlekisa. Kodwa ingabe bangenza okwengeziwe? Yebo, kunjalo, njengoba noma yimuphi upopayi engashiya ithonya elihlala njalo. UDkt. Gregory Stores weYunivesithi yase-Oxford watshela umagazini ohlela uhlu lwezinhlelo zethelevishini i-TV Times ukuthi opopayi ababukelwa yizingane bangomunye umthombo ‘wezilwane ezithusayo, izipoki noma izilwane zasendle’ ezigcwele emaphusheni asabekayo ezingane.

Ngokufanayo, ukuhlola okwenziwa uhulumeni waseBrithani okuthiwa yi-Screen Violence and Film Censorship kuphawula ukuthi abantu ingane ebukela nabo isithombe esithile sebhayisikobho bathonya umphumela esinawo kuyo. Ngakho ezinganeni ingozi ingaba sekubukeleni opopayi okungaqondiswa.

Lombiko ofanayo ugomela ngokuthi ojahidada ngokuvamile balingisa izenzo zobudlova abazibukelayo futhi lokho bakwenza “‘ngesisusa’ esithile esingokomzwelo,” izingane ezikhulakhulile ezineminyaka engaba yisihlanu noma eyisithupha ziyokwenza izenzo zobudlova ezizifundile.

Ngakho-ke, abasakazi bayavuma ukuthi kungenzeka ukuba ngemva kwesikhathi esithile, ukubukela ubudlova obuvezwa kuthelevishini kube “nethonya elithuntubeza imizwa noma elilimazayo ikakhulukazi ezinganeni,” kungakhathaliseki ubudala bazo. Lokhu kungazenza zingakwesabi ukuhileleka ebudloveni zona ngokwazo noma kuzenze zingazweli lapho busetshenziswa kwabanye.

Umlutha “kaBugs Bunny” noma “uTom and Jerry,” okungenzeka ukuthi wabona labo balingiswa eminyakeni eminingi edlule ebhayisikobho, kungenzeka manje ungumzali futhi ngokucindezela nje inkinobho, angase avule i-TV ukuze abone imifanekiso yabo yamahlaya yanamuhla. Kodwa izindinganiso sezishintshile. Becabangela inhlalakahle yezingane zabo, ngokuqinisekile abazali bayofuna ukuhlola lokho okuqukethwe opopayi ababukiswa namuhla.

Cabangela indaba yesithombe okuthiwa i-“Teenage Mutant Ninja Turtles.” Labalingiswa bezithombe zebhayisikobho zaseMelika babebhekwa njengabanobudlova ngokweqile ezibukelini eziningi zaseYurophu. Ngenxa yalokho, ngaphambi kokuba ibonise loluchungechunge olubukeziwe lopopayi eBrithani, i-BBC yakhipha ezinye izigcawu. Yasula ngisho negama elithi “Ninja” ngoba libhekisela emaqhaweni aseJapane. Kunalokho, yawabiza ngokuthi “Teenage Mutant Hero Turtles.”

Noma kunjalo, abazali baveza ukukhathazeka okuthile. Omunye umama watshela iphephandaba i-Scotsman ukuthi: “Izingane zithatheka kalula. Nginengane eneminyaka emihlanu ezishisekelayo lezizimfudu. Lapho ngiyoyilanda esikoleni uthola zonke izingane enkundleni yemidlalo zizama ukukhahlelana.”

Ukukhathazeka kwabazali nothisha kuhlanganyelwa ngokungalindelekile abanye abanikazi bezitolo zamathoyizi. Esinye isitolo saseBrithani samemezela ukunqatshelwa kokuthengiswa kwalamaqhawe ayizimfudu ngenxa yokwesaba ukuthi izingane “zizohlukumezana ngokukhahlelana ngendlela ye-karate futhi zizifake engozini yokufa ngokucasha emapayipini ahambisa indle.” Ingabe zikhona ezinye izingozi?

Izingozi Ezicashile

Lichaza ukuhlobana kopopayi bama-“Turtles” nokuthengiswa kwemikhiqizo ehlobene nabo elinye iphephandaba lathi “mhlawumbe kuyithuluzi elithengiswayo elenzelwe izingane eliphumelela ngokungabazisa kakhulu kunawo wonke.” Nakuba ukuhlobana okunjalo kungekusha, “okusha ngalama-Turtles ubukhulu” bebhizinisi lawo.

Kulesisimo abathengisi abagunyaziwe bazimisele ukuthengisa imikhiqizo yama-Turtle engaba ngu-400, njengezincwadi zopopayi nezikipa entsheni esiyizigqila zakho. Khona-ke uma ukubukela opopayi kuheha izingane ukuba zifune lezizinto ngalendlela, kumelwe ukuthi izigcawu ezizibukelayo zalabopopayi abafanayo ngokuqinisekile zinethonya elithile! Nokho, abanye bangase bathi lokuthambekela okusha akuhlali isikhathi eside.

Ngisho nakuba ukuthambekela okunjalo kungaphikeleli, opopayi bakudala abathandwayo bahlala bethandwa. “Ama-Mutant Turtles angase athandwe abuye adlule, kodwa u-Tom and Jerry uyohlala ethandwa njalo,” kusho i-Times yaseLondon. Ngakho kungase kudingeke ukuba uzibuze imibuzo ethile. Ingabe ukubukela opopayi abanjalo ekhaya lakho kubonisa izingane zakho ukuthi uvumelana nazo zonke izenzo ezivezwayo? Kuthiwani ngezigcawu zokuphathwa kwezilwane ngonya? Yiqiniso, ungase ucabange ukuthi opopayi abanakufaniswa nokuphila okungokoqobo. Kodwa ingabe uyazi ukuthi manje kwenzekani kopopayi? Inqubo okuthiwa i-animatronics!

I-“animatronics” ubuhlakani bama-electronic obenza izinto ezingelona iqiniso zopopayi zibonakale zingokoqobo, zibe ngokoqobo kangangokuthi izibukeli zikuthole kunzima ukuhlukanisa phakathi kopopayi neqiniso. “Ukusetshenziswa kwe-animatronic kuyakholeka uma ukubonela eduze,” kubika i-Sunday Times Magazine, “kangangokuthi ngisho nezibukeli ezingabaza kakhulu, ezijwayele amasu angelona iqiniso ezithombe zebhayisikobho, aziphazanyiswa imbotshana yokukhohlisa noma ukushwabana kwesikhumba okwenziwe.” Izigcawu zobudlova ezivezwa ngalendlela zishaqisa ngendlela engokoqobo.

Cabangela futhi izindinganiso zokuziphatha opopayi banamuhla abazinikeza isizukulwane esilandelayo. Abalingiswa abavezwa kweminye imidlalo yopopayi emisha ethandwayo “bangopopayi abawumkhaya ocunulayo olevuzayo, ongamavila ‘nezehluleki,’” kubika i-Times yaseLondon. Bakhanga “ngokwengxenye ngenxa yokungahambisani ngempela neziphathimandla ezikhona.”

Yebo, bazali, ningase nikhathazeke ngokufanele lapho nicabangela ukubukela kwezingane zenu opopayi. Khona-ke, yini eningayenza?

Nqabelani ‘Ukuzijabulisa Okunobudlova’

Hlaziyani izinzuzo nezingozi zokuzijabulisa okuhleliwe. Becabangela inhlalakahle yomkhaya, abanye abazali baye bakhetha ukungabi nayo i-TV. Abanye basiza izingane zabo ukuba zihlaziye ubuhle nobubi bezinhlelo ezivunyelwe ukuzibukela. “Lapho ingane (noma ngisho nomuntu omdala) ihlonyiswe ngokwengeziwe ukuba ikwazi ukubukela opopayi, isikhangiso, noma izindaba ngokucusumbula nangokuhlaziya ngokucophelela, kulapho iyozuza ngokwengeziwe emithonjeni yezindaba,” kuchaza i-Independent yaseLondon. Ngokuqinisekile abazali basesimweni esingcono kakhulu sokusiza izingane zabo ukuba zenze lokhu.

Ukuhlola kwamuva nje kokuhileleka kwethelevishini ekuphileni komkhaya kwagxila ezindleleni ezimbili ezingafani zokufundisa. Eyokuqala ihilela ukubonisana nokuchaza, kuhlanganise nokwenza ingane izizwe ifeza okuthile. Enye ngokuyisisekelo isebenzisa isijeziso nezinsongo. Imiphumela yabonisani?

Izingane ezinabazali ababezisongela ngokuzijezisa zazibonisa ukuthanda “izinhlelo zethelevishini ezingenabungane,” kuyilapho “izingane ezinomama abalaya ngokuyinhloko ngokubonisana nazo nangokuchaza zazingazithandi kakhulu” izigcawu ezinjalo. Ngakho, abazali abakhathalelayo bachazela izingane zabo ukuthi kungani kungahlakaniphile ukubukela opopayi abanobudlova. Kodwa khumbulani, izingane zizalwa zingabalingisi, futhi lokhu kubeka umthwalo wemfanelo onzima kubazali wokugwema ukubukela ubudlova ngenjongo yokuzijabulisa. Uma nibubukela, izingane zenu ngeke zibone phutha ngokububukela nazo ngokwazo.

Ungase ubuze, ‘Ngingazigcina kanjani-ke izingane zami zijabulile?’ Nakhu okunye ukusikisela: Kungani ningafuni indlela yokuzijabulisa ngokubukela izithombe zezilwane ezingokoqobo? Ingabe nihlala eduze kwesiqiwu sezilwane noma ipaki lezilwane eningalivakashela njengomkhaya? Uma kungenjalo, njalo ningakhetha ama-video ezilwane zasendle afanelekile eningawabukela ekhaya.

Ngokudabukisayo, akekho phakathi kwethu okwamanje ongabalekela ubudlova balelizwe esiphila kulo. Kodwa kungakhathaliseki ukuthi sibancane noma sibadala, uma sifuna, singakhetha ngokuhlakanipha ukugwema ukubukela noma yini ekhuthaza ubudlova.

[Isithombe ekhasini 12]

Ingabe opopayi bakhuthaza ubudlova?