Amathuluzi Okukhulekelwa KukaSathane—Izidakamizwa Nomculo Onesigqi Esinamandla
UCARL A. RASCHKE, umqondisi we-University of Denver Institute of Humanities, wabhala: “Akulona iphutha ukuthi izidakamizwa, [umculo] onesigqi esinamandla, isihluku, nobudlova obunonya konke sekube amafulege athusayo aphephezela phezu komonakalo osesintwini njengoba sesingena emashumini amathathu eminyaka yeNkathi kaSathane.” Wabuye wathi: “Ungase usho uthi umculo we-rock onesigqi esinamandla ungamathe nolimi nokukhulekelwa kukaSathane njengomculo wevangeli ebuKristwini. Bambalwa kakhulu abantu abaphendukela ebuKristwini ngenxa nje yokulalela umculo wevangeli emsakazweni. Kodwa umculo onesigqi esinamandla unamandla kakhulu. Wenza lemisebenzi engajabulisi izingane esezingene kuyo ibe ngevumelekile.”
Isahlulelo esinzima lesi njengoba simelene nalokho iningi lentsha yanamuhla ekuthatha ngokuthi ukuzilibazisa okuvamile ezinkingeni zokuphila kwanamuhla—ngomculo onesigqi esinamandla nezidakamizwa. Ingabe lezizinsolo zifanele? Kungenzeka yini ukuthi izidakamizwa nomculo onesigqi esinamandla kube izimpawu zokukhulekela uSathane? Cabangela amazwi alabo abaye babhekana ubuso nobuso nobudlova babakhulekeli bobusathane nalabo abaye bakhuluma nabo.
“Umlayezo osusa usinga osemculweni onesigqi esinamandla, njengoba kungase kungamangalisi, ‘ungowenkolo’—ngomqondo wokuthi umemezela amandla aphakeme angamele indawo yonke. Nokho, lamandla awayena uNkulunkulu,” kubhala uRaschke, encwadini yakhe ethi Painted Black. “Uklanywe . . . iDemoni Elikhulu ngokwalo.” Ngaphezu kwalokho, wathi: “Amandla nobudlova bobusathane kuyinto abasha abangasenathemba, futhi abanonembeza abangakhulanga ngokwanele, abangaya kalula kuyo. . . . Intsha enezinkinga futhi ephathwa kabi, ngenxa yobubi eye yabhekana nabo, ikholelwa ukuthi laMandla Aphakeme kumelwe ukuba mabi. Isigqi esinamandla siyayiqinisa ‘lenkolelo’ bese siyifaka emculweni.”
Ngokusho kukaDkt. Paul King wase-University of Tennessee, owethula ubufakazi phambi kwesiShaya-mthetho sase-United States mayelana nomculo onesigqi esinamandla, uma intsha eningi ephazamisekile ikhetha umculo iyaye “ikhethe izihloko ezingavumelekile zobudlova, inzondo, ukuvukela, ubulili obuyingcaca, ukuphathwa kabi kwabesifazane, nokudunyiswa kukaSathane. Lapho indlela yokuphila yomuntu omusha ihlanganisa nezidakamizwa, kungenzeka kakhulu enze lokhu kukhetha.” Umculo onesigqi esinamandla ukhazimulisa futhi ugqamise amandla obubi, kusho uKing. Emculweni onesigqi esinamandla, “izenzo ezimbi ziphakanyiselwa emazingeni aphezulu emakhonsathini,” esho.
Cabangela imiphumela yomlayezo oyisinyelela womculo onesigqi esinamandla eye yaba nayo ezindabeni ezilandelayo.
Ngonyaka odlule eNew Jersey, e-U.S.A., abafana ababili abaneminyaka engu-15 babulala ngonya inja yakubo efuyiwe yohlobo lweLabrador okwakuthiwa uPrincess. “Kwakuwumhlatshelo owawenzelwe uSathane,” besho. Lenja bayibamba ngeketango, bayikhahlela yaze yafa, bakhipha ulimi lwayo base beyolusebenzisa ekukhulekeleni kobusathane. Isidumbu salenja esicwiyiwe basilengisa ngehhuku elikhulu ejalidini lakwamakhelwane. Izimpawu zokukhulekelwa kukaSathane zatholakala ekhanda lalenja, kwaqoshwa nophawu lwe-pentagram (inkanyezi enamachopho amahlanu enesiyingi—okuwuphawu lokukhulekelwa kukaSathane) enhlabathini ngaphansi kwesidumbu senja. Ngobusuku eyabulawa ngabo, babelalele iDeicide (okusho ukuthi ukubulawa kukaNkulunkulu), okuyiqembu lesigqi esibulalayo, umholi walo oqhosha ngokuzwisa izilwane ubuhlungu futhi azibulale.
ECalifornia, izithandani ezimbili ezevile eshumini nambili, ngokusho kwabangane bazo, ezazithatheke kakhulu ngokukhulekela uSathane zabulala ngesihluku unina wentombazane ngokumgwaza nokumshaya ngesipanela. Kuyo leyondawo, omunye osemusha wathandaza kuSathane, wabe esedubula uyise wambulala. Amaphoyisa ayehlola lendaba athola ukuthi umculo onesigqi owawuyimbangela. “Ngokuyisisekelo, lomculo ukufundisa ukuthi akumelwe ulalele abazali bakho, nokuthi kufanele uphile ngendlela othanda ngayo,” kusho esinye isikhulu samaphoyisa.
ENgilandi izisulu zokudlwengula kweqembu okuwuchungechunge ziye zabikela amaphoyisa ukuthi omunye wabadlwenguli wayebhalwe emzimbeni izimpawu zeqembu lomculo onamazwi anemiyalezo yokudlwengula nobudlova.
E-Arkansas, e-U.S.A., omunye osemusha wasemaphandleni wazama ukubulala abazali bakhe ngokubabhonya ngomshiza bese ebaqoba ngommese omkhulu. Amaphoyisa athola kusidlala-makhasethi sakhe ikhasethi elalicushwe ukuba lidlale ingoma yeqembu lomculo onesigqi esinamandla ethi, “Altar of Sacrifice,” enamazwi aklabalasayo athi: “Umpristi omkhulu ulindile, uphethe ummese ngesandla, echitha igazi elimsulwa. Umhlatshelo kaSathane, ukufa kwasemkhosini, sabela kuyo yonke imiyalo yakhe. Ngena endaweni kaSathane . . . Funda amazwi angcwele okudumisa athi, ‘Dumisa uSathane.’”
Uma kuziwa emagameni ezinye izingoma ezihlatshelelwa amalungu aklabalasayo amaqembu omculo onesigqi esinamandla—ngokuvamile abalandeli abahlabelela sakuhlanya behambisana nawo emakhonsathini, noma alalelwe emakhasethini amahora ngamahora—zinamuphi umphumela entsheni esathonyeka kalula? Ngokwesibonelo, cabangela lamazwi: “USathane inkosi yethu uqondisa ngasinye isinyathelo sethu sokuqala emonakalweni omubi,” nathi “Chitha igazi, liyeke ligeleze lize kimi. Bamba isandla sami uyeke ukuphila kwakho . . . Ulichithile igazi. Umphefumulo wakho ukimi.”
“Uma sikwamukela ukuthi izithombe ezingcolile zingamshukumisa umuntu oxhaphaza izingane ngokobulili,” kubhala uCarl Raschke, “kungani kungenakuphethwa ngokuthi amazwi aklabalasayo athi bulala, cwiya, nweshula, zwisa ubuhlungu, bhubhisa angamenza ngempela umuntu onobuchopho obungasebenzi ukuba enze zona kanye lezozenzo?”
Kuwumbono wabacwaningi nomaphi ukuthi ukusetshenziswa kabi kwezidakamizwa nokukhulekelwa kukaSathane kuhambisana ncamashí. Owayekade engumseshi uDavid Toma ukhala ngokuthi “akakaze ahlangane nomkhulekeli kaSathane ongazisebenzisi izidakamizwa.” Ukusetshenziswa kwezidakamizwa, kubika umagazini i-’Teen, kusenza sibe sibi kakhulu isimo sabantu abasha “abaphendukela ekukhulekeleni udeveli, okwenza kube nzima kakhulu ukuhlukanisa ukuthi yini ngempela engokoqobo nalokho okubonakala kungokoqobo uma kubhekwa ngombono wokuluthwa izidakamizwa nophuzo oludakayo.”
“Umculo onesigqi esinamandla uhambisana ncamashí nokusetshenziswa kakhulu kwezidakamizwa njengoba kunjalo ngezindawo zokugembula nabagembuli,” kusho uRaschke. “Umuntu omusha osephila ngamakhemikhali ungena empilweni yokweqisa, isihluku, ukweba nokweqisa ngokobulili—konke okugcizelelwa ukuklabalasa nokumpongoloza kwalamaqembu omculo onesigqi esinamandla.”
Ngokungangabazeki, osemusha uba isisulu sikaSathane esithonyeka kalula uma ukucabanga okuhluzekile kuphuma engqondweni yakhe bese endaweni yako kungena ububi nobudlova.
[Amazwi acashunwe esihlokweni ekhasini 8]
Umuntu uba isisulu sikaSathane esithonyeka kalula uma ukucabanga okuhluzekile kuphuma engqondweni bese endaweni yako kungena ububi nobudlova
[Isithombe ekhasini 7]
Uyigcwalisa ngani ingqondo yakho?