Unayo Yini—I-fritillary Engadini Yakho?

UMA unayo, ubuhle bayo buzokuhlaba umxhwele. Yini i-fritillary? Enye yezinkulungwane zezinhlobo ezihlukahlukene zezimvemvane ezihlobisa umhlaba wethu futhi ingenye yezinhlobo ezingaphezu kuka-750 ezitholakala e-United States naseCanada. Lena eboniswe lapha, i-great spangled, yathwetshulwa engadini esendaweni evundile yasemaphandleni aseVirginia. I-great spangled inezinto ezibenyezela njengesiliva ngaphansi kwephiko langemuva. Umlimi wayetshale ngamabomu indinyana yezimbali zasendle ezikhula zibe zinde futhi zihehe izimvemvane—kwakukhona ama-rudbeckia aphuzi ne-phlox enyaluthi.

Uma ungathanda ukuheha izimvemvane zize engadini yakho, zama ukutshala indinyana yezimbali zasendle. Mhlawumbe ungathenga iphakethe lembewu yezimbali zasendle eziyokhula zibe nemibalabala emihle njengeyomdwebi ukuze udonse lezizilwanyana ezikhangayo zize kuwe. Uma uhlala engxenyeni yezwe efanelekayo, isikhotha se-buddleia siyoletha izimvemvane njengozibuthe. Bese uthola ikhamera nezipopolo, uzijabulise!