Lokho Ikusasa Elikuphethe Ngempela
ABATHANDI abaningi bezindaba eziqanjiwe zesayensi banelukuluku lokufuna ukwazi, isifiso soshintsho emphakathini wesintu, nesithakazelo esikhulu esikhathini esizayo. Kuningi iBhayibheli elikushoyo ngesikhathi esizayo, kodwa umbono walo ngekusasa lomuntu awufani nakancane nalokho okucatshangwa abalobi bezindaba eziqanjiwe zesayensi.
Izindaba eziqanjiwe zesayensi zinemibono ehlukahlukene eyinqwaba ngalokho isikhathi esizayo esingase sibe yikho. Kodwa ungakudela yini ukuphila kwakho ngenxa yalemibono? Ungakusekelaphi ukukhetha kwakho? Lezi zimo, noma izenzakalo ezihleliwe, azinakuba iqiniso zonke. Eqinisweni, njengoba zonke zihilela ukucabangela—indaba eqanjiwe—ungasho ngokuqinisekile yini ukuthi ezinye zazo zingase zibe iqiniso? Ngokunokwenzeka azikho eziyiqiniso kuzo.
Azifezeki
Kakade, izenzakalo eziningi zezindaba eziqanjiwe zesayensi azifezeki. Ngayiphi indlela? Ngokuthi lezo ezikhuluma ngendlela isayensi engahlahla ngayo indlela eyisa empucukweni engcono lapha emhlabeni azizange zifezeke. Njengoba zingeyona neze impucuko ethuthukile, izimo ezingokoqobo zanamuhla zingokuphambene. Umlobi waseJalimane uKarl Michael Armer uyaphawula: “Ikusasa liye lasikhungathekisa.” Ubhekisela “ekusongelweni kwembulunga yonke ngokubulawa nge-athomu, izinhlekelele zendawo ezungezile, indlala, ubumpofu, izinhlekelele zamandla, [kanye] nobuphekula obuxhaswa uhulumeni.”
Ngamanye amazwi, ikusasa lomhlaba nelomkhaya wesintu elichazwa ezindabeni eziningi eziqanjiwe zesayensi alinakuba ngokoqobo. Ngokuphambene, njengoba izimo ziwohloka emhlabeni, isimo sesintu siyawohloka. Naphezu kwanoma iyiphi intuthuko engokwesayensi noma yezobuchwepheshe, emhlabeni wonke umphakathi wesintu ubhekana nobugebengu, ubudlova, ubumpofu, ukuzondana kwezinhlanga, nokuwohloka komkhaya okwengeziwe.
Eminye imizamo yesayensi iye yanezela kakhulu ezinkathazweni zesintu. Ake ucabangele izibonelo ezimbalwa: ukungcoliswa ngamakhemikhali komoya wethu, amanzi, nokudla; inhlekelele yaseBhopal eNdiya, lapho ingozi esikhungweni sezimboni yakhipha khona igesi enobuthi, kwafa abantu abangu-2 000 futhi kwalimala abangaba ngu-200 000; ukuncibilika kwesikhungo samandla enuzi eChernobyl e-Ukraine, okwaphumela ekufeni kwabantu abaningi nasekwandeni komdlavuza nezinye izinkinga zempilo endaweni ebanzi.
Ukuhlala Ngaphandle Emkhathini?
Izindaba eziningi eziqanjiwe zesayensi ezikhuluma ngekusasa zinikeza indlela yokuphuma osizini lokuphila nokuhluleka kwamasu abantu emhlabeni ngenye indlela. Ziguqulela umthandi wazo ezimweni zokucatshangelwa ngaphandle emkhathini. Abantu abasebenzisa imikhumbi-mkhathi ehamba phakathi kwemithala ukuze kwakhiwe kwamanye amaplanethi nakwezinye izingxenye zendawo yonke kuyizihloko ezandile. Abantu abanjalo babangela ukuba abaningi bazizwe njengomuntu owabhalela umhleli wephephandaba elithile laseNew York: “Ikusasa lesintu lixhomeke ekuhloleni umkhathi.”
Yiqiniso, ukuhlola umkhathi kuyaqhubeka ngokundiza kwemikhumbi-mkhathi eduze komhlaba nokucitshwa kwamathuluzi okuhlola umkhathi. Kodwa kuthiwani ngokuhlala emkhathini? Nakuba kukhulunywa kabanzi ngokuya kwabantu emkhathini isikhathi eside, okwamanje awekho amacebo asebenzayo okuhlala enyangeni noma kunoma imaphi amaplanethi aseduze—kungasakhulunywa ngeminye imithala. Ngempela, imizamo yomuntu yokuhlala emkhathini ayiyona into eyokwenzeka ngokoqobo esikhathini esizayo esiseduze. Futhi izinhlelo zamanje zasemkhathini zamazwe ahlukahlukene zimba eqolo kangangokuba ziyancishiswa noma ziyekwe.
Iqiniso liwukuthi ikusasa lesintu, ikusasa lakho, alikho kunoma ikuphi ukuhlola umkhathi okugqugquzelwa abantu. Ikusasa lakho likhona lapha emhlabeni. Futhi lelo kusasa ngeke linqunywe ososayensi, ohulumeni babantu, noma abalobi bemidlalo. Kungani singaqiniseka kangaka?
Ngoba ikusasa liyonqunywa uMdali womhlaba, uJehova uNkulunkulu. Futhi ayikho indaba eqanjiwe yesayensi engafana nezithembiso ezinikezwa iBhayibheli. Kuleyo ncwadi—iZwi eliphefumulelwe likaNkulunkulu, aye walidlulisela esintwini—uyasitshela ukuthi liyoba njani ikusasa lesintu. (2 Thimothewu 3:16, 17; 2 Petru 1:20, 21) Ithini?
Ikusasa Lomkhaya Wesintu
IZwi likaNkulunkulu liyibeka ngokusobala injongo yoMdali yokuwulungisa ngokuphelele umphakathi wesintu ngohulumeni omusha ophethwe uJesu Kristu. EBhayibhelini lowo hulumeni wasezulwini ubizwa ngokuthi uMbuso kaNkulunkulu.—Mathewu 6:9, 10.
Ngokuqondene nalowo Mbuso isiprofetho esiphefumulelwe sikaDaniyeli 2:44 sithi: “Ezinsukwini zalawomakhosi [akhona namuhla] uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso [yanamuhla], wona uqobo ume phakade.”
Ngaphansi kokuphefumulelwa amandla asebenzayo kaNkulunkulu, umphostoli uPetru naye wabhala ngokuphila esikhathini esizayo emhlabeni ngaphansi koMbuso kaNkulunkulu. Wathi: “Kukhona amazulu amasha [uMbuso kaNkulunkulu wasezulwini] nomhlaba omusha [umphakathi omusha wesintu ngaphansi kwalowo Mbuso] esikulindele ngokwesithembiso [sikaNkulunkulu], futhi kukho kuyohlala ukulunga.”—2 Petru 3:13.
Kuyoba njani ukuphila kwalabo abanelungelo lokuphila emhlabeni ngaphansi kokubusa koMbuso kaNkulunkulu wasezulwini? Isithembiso soMdali yilesi: “‘[UNkulunkulu] uyosula zonke izinyembezi emehlweni aso, futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.’ Futhi Lowo ohlezi esihlalweni sobukhosi wathi: ‘Bheka! Ngenza zonke izinto zibe zintsha.’ Futhi, uthi: ‘Loba, ngoba lamazwi akholekile futhi ayiqiniso.’”—IsAmbulo 21:4, 5.
Ikusasa elithenjiswa uMdali liyamangalisa. Lihluke ngokuphelele ezimweni eziqanjwe abalobi bezindaba eziqanjiwe zesayensi noma ososayensi, izimo ezivame ukuphawuleka ngabantu nezindawo okuyinqaba nokungamaphupho. AmaKristu eqiniso abeka ukholo ezithembisweni eziqinisekile zikaNkulunkulu ngekusasa. Ngempela, enza okwengeziwe. Adela ukuphila kwawo ngenxa yazo.
Kungani engenza lokho ngokholo olungaka? Ngoba iZwi likaNkulunkulu liwatshela ukuthi ‘leli themba aliholeli ekudumazekeni,’ njengoba ‘uNkulunkulu engenakuqamba amanga.’ Eqinisweni, ‘akunakwenzeka ngoNkulunkulu ukuba aqambe amanga.’ (Roma 5:5; Thithu 1:2; Heberu 6:18) Njengoba uJoshuwa, inceku kaNkulunkulu, asho esikhathini eside esidlule: “Akuphuthanga nento eyodwa kuzo zonke izinto ezinhle azikhuluma uJehova uNkulunkulu wenu ngani; kwenziwa konke kini, akuphuthanga nento eyodwa kukho.”—Joshuwa 23:14.
Izindaba eziningi eziqanjiwe zesayensi ziveza imibono yalesi simiso esibi esidala. Kanjani? Izindaba eziqanjiwe zesayensi zaqala enkathini okuthiwa eyokukhanyiselwa, lapho abantu abaningi babenqaba igunya elivamile futhi bekholelwa ukuthi umuntu angazinqumela ikusasa lakhe siqu. Babeyisola ngokufanele inkolo yezwe ngenxa yezinkathazo eziningi zomphakathi, kodwa balahla neqiniso ngobukhona bukaNkulunkulu kanye nenjongo yakhe. Babedunyazwe indlela izinto ezazihamba ngayo ngakho-ke bafuna eminye imibono.
Nokho, imibono yabantu, kungakhathaliseki ukuthi icatshangwe kahle kangakanani, inokulinganiselwa. UMdali wethu uthi: “Njengamazulu ephakeme kunomhlaba, kanjalo izindlela zami ziphakeme kunezindlela zenu, nemicabango yami kunemicabango yenu.”—Isaya 55:9.
Ukuthola Iqiniso Elingokwesayensi
Ezweni elisha likaNkulunkulu, ukunxanela kwesintu ulwazi okungokwemvelo kuyokwaneliswa ngokwengxenye ulwazi lweqiniso olungokwesayensi. Asiyikubakhona isidingo sokusungula imibono, ngoba izimo ezingokoqobo ziyokhanga futhi zifundise ingqondo ngendlela eyakhayo, eyiqiniso.
Khona-ke abaningi bayoyiqonda indlela usosayensi odumile u-Isaac Newton ayezizwa ngayo lapho ezifanisa “nomfana odlala ogwini lolwandle, . . . kuyilapho ulwandlekazi lweqiniso lulokhu lufihlekile ngaphambi [kwakhe].” Ngokungangabazeki, ezweni lakhe elisha, uNkulunkulu uyoqondisa abantu abathembekile ekutholeni izinto eziningi ezishukumisayo.
Yebo, ukucwaninga okungokwesayensi ngaleso sikhathi kuyosekelwa ngokuphelele eqinisweni, njengoba uJehova ‘enguNkulunkulu weqiniso.’ Usimema ukuba sifunde endaweni yomuntu yasemhlabeni nasezilwaneni. (IHubo 31:5, NW; Jobe 12:7-9) Imizamo eqotho engokwesayensi eqondiswa uNkulunkulu weqiniso ngokuqinisekile iyoba isici esithakazelisayo sesimiso esisha sikaNkulunkulu. Khona-ke udumo lwazo zonke izinto ezisunguliwe, ezitholiwe, nentuthuko emangalisyo ekuphileni komuntu nezimo zokuphila ngeke lunikezwe noma imuphi umuntu, kodwa luyonikezwa uMdali wendawo yonke, uJehova uNkulunkulu.
Kulelozwe elisha elisondela ngokushesha, bonke abantu abalalelayo bayokhazimulisa uNkulunkulu ngenxa yokukhathalela nokuqondisa kwakhe kothando. Bayomkhonza ngenjabulo enkulu futhi bayosho kuye njengoba kuchazwe kusAmbulo 4:11: “Uyakufanelekela, Jehova, yebo Nkulunkulu wethu, ukwamukela inkazimulo nodumo namandla, ngoba wadala zonke izinto, nangenxa yentando yakho zaba khona futhi zadalwa.”
[Isithombe ekhasini 9]
Ikusasa lesintu lisemhlabeni