“Ake Uvule Amehlo Akho Ubone”

IZINGANE zakho zibonani? Impi? Ubugebengu? Ukungcola? Ubumpofu? Ukugula? Yiqiniso, lezi izinto ezingokoqobo ezihlale zikhona. Kodwa uye wazifundisa yini ukubheka ngale kwalezi zinto, ekusaseni elimangalisayo elithenjiswe eBhayibhelini? Abazali bakaJoel Pierson oneminyaka engu-9 ubudala baye bakwenza lokhu. Kwaba namuphi umphumela?

Cabangela lokho uJoel akubhala esihlokweni esithi “Ake Uvule Amehlo Akho Ubone.” Lesi sihloko sanikezwa intsha njengesabelo esibhalwayo esifundeni sezikole saseVirginia, e-U.S.A. Phawula indlela indaba kaJoel, eyanyatheliswa ephephandabeni i-Central Virginian ka-August 22, 1996, eyakwambula ngayo ukuthi ithemba lakhe lisekelwe kulokho akufunde eZwini likaNkulunkulu. Wabhala:

“Ake uvule amehlo akho ubone, bonke ubuhle okwakumelwe bube khona.

“Bekungeke yini kwamangalisa ukuvuka ngolunye usuku ekuseni bese uzwa ukuthi ukungcola akusekho? Esikhundleni sokuba kubikwe ukubulala nobugebengu ezindabeni, abantu baphila ngokuthula nangenjabulo.

“Omakhelwane bayabambisana ekusizeni umngane ukuba akhe umuzi wakhe. Eduze, sibona abanye betshala engadini. Akukhona lokho nje kuphela, kodwa izisusa zabo zinhle. Bonke abantu bayasizana. Ngeke kusaba nabantu abampofu, kuyoba nenala yokudla okwanelisa bonke. Akekho oyophinde alambe noma agule. Kunendawo enhle yokubukwa yibo bonke futhi bheka, ingane igibele ingwe! Akuyona nje ingwe kuphela, kodwa zonke izilwane zinokuthula nabantu.

“Ngingathanda ukuhlala endaweni enjena. Ungathanda ukuhlala nami lapho?”

Ingabe ngempela uNkulunkulu uthembisa izibusiso ezinjengalezo ezichazwa uJoel osemncane lapha? Ngokuqinisekile! Siza uvule iBhayibheli lakho futhi ufunde ngalezo zithembiso ezitholakala kumaHubo 46:8, 9; 67:6; 72:16; Isaya 2:3, 4; 11:6-9; 33:24; 65:17-25; Mathewu 6:9, 10; 2 Petru 3:13; IsAmbulo 21:3, 4.