Imfumbe Yokundiza Kwesinambuzane Iyaxazululeka

SEKUYISIKHATHI eside ososayensi bexakekile ukuthi izinambuzane, ezinemizimba esindayo namaphiko alula, zikwazi kanjani ukuzigcina emoyeni. Lezi zidalwa ezincane zibonakala zingazinaki izimiso ezivamile zokundiza. Manje abacwaningi eCambridge University, eNgilandi, sebetholile ukuthi izinambuzane zisenza kanjani lesi simangaliso esibonakala singenakwenzeka.

Ukuze bafunde ngokundiza kwezinambuzane, ososayensi babophela intambo kakotini kuyi-hawkmoth base beyibeka emhubheni womoya. Bafutha intuthu engenabuthi emhubheni baphawula indlela intuthu ehamba ngayo njengoba inundu ishaya amaphiko ayo. Kamuva, bakha umshini omkhulu ngokuphindwe kashumi kunesinambuzane owawunyakazisa izimpiko zawo ngokunensa ngokuphindwe ngekhulu base bebukisisa imiphumela eyase ibonakala kalula. Bathola ukuthi lapho inundu iqala ukushaya amaphiko ayo, kudaleka umsinga emsukeni wephiko. Umphumela wokuncipha komoya phezu kwamaphiko ubangela ukuba isinambuzane sidonsekele phezulu. Uma umsinga uphela, inundu ibingalahlekelwa yilokho kudonsekela phezulu bese iwela phansi. Kunalokho, umoya obhenguzayo ugijima ngonqenqema olungaphambili lwephiko uye esihlokweni salo, bese kuthi ukudonsekela phezulu okuba umphumela wokushaya kwephiko, okulingana nesisindo senundu esisodwa nengxenye, kuvumele isinambuzane ukuba sindize kalula.

Onjiniyela bezindiza base bazi kakade ukuthi izindiza ezinamaphiko athi awabe onxantathu (delta-wing aircraft [zibizwa kanjalo ngenxa yokuthi iphiko lifana nohlamvu lwesiGreki u-Δ]) zikhipha umsinga ezihlokweni zamaphiko azo, obangela ukuba zidonsekele phezulu. Kodwa njengoba sebazi ukuthi kwenzeka kanjani ukuba umsinga ubangele izinambuzane ezibhakuzisa amaphiko zidonsekele phezulu, sebefuna ukuthola ukuthi bangasisebenzisa kanjani lesi simanga ekuklameni ophephela nezindiza ezinophephela emhlane.