Zashonaphi Zonke Izinhlanzi Ezingama-cod?
IZINHLANZI ezingama-cod zaziziningi emanzini kangangokuthi “isikebhe sasingagwedleki phakathi kwazo.” Washo kanjalo umhloli wamazwe uJohn Cabot ngo-1497 njengoba ayechaza enye yezindawo zokudoba enezinhlanzi eziningi kakhulu emhlabeni i-Grand Banks yaseNewfoundland. Ngasekupheleni kwawo-1600 inani lezinhlanzi ezingama-cod ezazidotshwa ngonyaka eNewfoundland lase lifinyelele cishe emathanini angu-100 000. Phakathi nekhulu leminyaka elalandela, umkhiqizo waphindeka kabili.
Nokho, namuhla isimo siye sashintsha ngokuphawulekayo. Inani lezinhlanzi ezingama-cod liye lehla kangangokuthi ngo-1992 uhulumeni waseCanada uye wakuvimbela ukudotshwa kwezinhlanzi e-Atlantic, kwashiya abantu abalinganiselwa ku-35 000 befuna umsebenzi kwezinye izimboni. Ngo-1997 ukuvinjelwa kokudoba kusaqhubeka. Kodwa zashonaphi zonke izinhlanzi ezingama-cod?
Phakathi nawo-1960, amaviyo ezikebhe zokudoba ezizwe zonke ahlangana ogwini lwaseNewfoundland ezodoba inqwaba yezinhlanzi ezingama-cod. Ngo-1968 abadoba ngamanetha basemazweni angaphezu kwayishumi nambili babedoba amathani ezinhlanzi angu-800 000 ngonyaka ogwini lwaseNewfoundland. Lokhu kwakusiphinda kathathu isilinganiso sezinhlanzi ezazidotshwa ngonyaka ekhulwini leminyaka elingaphambili.
Nakuba amanzi abanda kakhulu, ukwanda kwezimvu zamanzi, nokuthutha kwezinhlanzi ezingama-cod kungenzeka kwaba nengxenye ekuncipheni kwenani lezinhlanzi ezingama-cod, icala elikhulu ngenhlekelele yezinhlanzi ezingama-cod kumelwe libekwe ebugovwini bomuntu. “Kalula nje—ukudoba ngokweqile,” kusho esinye isazi sezilwane zasemanzini.
Liyini ikusasa lezinhlanzi ezingama-cod zase-Atlantic? Abanye bayangabaza ukuthi kunezinhlanzi ezisencane ezanele ukuba zikhule, zizale ezinye, futhi zigcwalise uhlobo lwazo. I-Evening Telegram yaseSt. John yaphawula: “Imboni endala kunazo zonke yaseCanada, yokudoba izinhlanzi ezingama-cod e-Atlantic, iyochuma kuphela ezincwadini zomlando.” Nokho, likhona ithemba!
IBhayibheli lisiqinisekisa ukuthi ngokushesha, ezweni elisha lokulunga elithenjiswe nguNkulunkulu, ngeke bube khona ubugovu. (2 Petru 3:13) UJehova “uyochitha labo abachitha umhlaba” futhi enze izwe nolwandle kugcwale ukuphila kube isibusiso kulabo abafuna ukumkhonza futhi bamjabulise.—IsAmbulo 11:18.
[Imithombo Yesithombe ekhasini 31]
© Tom McHugh, The National Audubon Society Collection/PR
Mountain High Maps® Copyright © 1995 Digital Wisdom, Inc.