AboMdabu BaseMelika NeBhayibheli
SELOKHU abeLungu bahlasela amazwe aseMelika, abaningi baye bazama ukufundisa aboMdabu baseMelika iBhayibheli.
Kusukela ngekhulu le-17, iBhayibheli eliphelele liye lahunyushelwa ezilimini eziyisithupha zamaNdiya aseNyakatho Melika. Elokuqala kwaba iBhayibheli likaJohn Eliot, elanyatheliselwa amaNdiya aseMassachusetts eduze naseBoston neRoxbury, eMassachusetts ngo-1663. Ebhala kuyi-Encyclopedia of North American Indians, uHarvey Markowitz uthi: “Nakuba manje izazi-mlando eziningi zingabaza ukuthi abenzi bamakoloni babeqotho lapho benza isivumelwano [“‘sokuphucula izidlwangudlwangu’ zaseNtshonalanga Nenkabazwe”], ukujula kokuzinikela kuka-Eliot kufakazelwa ukuzikhandla kwakhe iminyaka engu-15 efunda isiMassachusett futhi eklama uhlelo lwamagama lokuloba iBhayibheli. U-Eliot wayebheka lo msebenzi onzima ‘njengomsebenzi ongcwele, okufanele uphathwe ngokwesaba, ngokucophelela nangenhlonipho.’”
Nakuba izingxenye zeBhayibheli zahunyushelwa kwezinye izilimi zaboMdabu baseMelika, kwaphela iminyaka engu-200 ngaphambi kokuba abaphathi be-British and Foreign Bible Society banyathelise elinye iBhayibheli eliphelele, inguqulo yesiCree saseNtshonalanga (ka-1862). Ngokushesha ngemva kwalokho, kwalandela ezinye izinguqulo: eyesi-Inuit saseMpumalanga Arctic (ka-1871); yesiDakota, noma isiSioux saseMpumalanga (ka-1880) neyesiGwich’in, ulimi lwaseMelika olukhulunywa eningizimu ye-Artic (ka-1898).
IBhayibheli lamuva eliphelele liyinguqulo yesiNavajo, eyanyatheliswa ngo-1985 ngemva kweminyaka engu-41 yokulungiselela nokubambisana phakathi kwezinhlangano zeBhayibheli ezimbili. Manje sekunezingxenye zemiBhalo yesiHeberu nesiGreki okungenani ngezilimi zamaNdiya ezingu-46.
Obani Abaye Bahola?
UMarkowitz uthi: “Kuyaphawuleka . . . ukuthi umsebenzi wokuhumusha iBhayibheli uye wenziwa ngokuyinhloko amaProthestani.” Lo mlobi uqhubeka athi ngaphambi koMkhandlu Wesibili WeVatican (ngo-1962), iSonto LamaKatolika “lavimbela ukusakazwa kweBhayibheli kubantu abavamile, likholelwa ukuthi abantu abavamile abanakho . . . ukuqeqeshwa okufanele ukuze bakwazi ukuchaza imibhalo ngokunembile.”
Okwamanje, izinhlangano zeBhayibheli ezihlukahlukene zihileleke okungenani emikhankasweni engu-20 yokuhumushela ezilimini zaboMdabu baseMelika abaseNyakatho Melika, kuhlanganise isiCheyenne, isiHavasupai, isiMicmac nesiZuni. Kulungiselelwa isizwe samaNavajo inguqulo entsha YemiBhalo YesiGreki. Kusahunyushwa ezinye izinguqulo zamaNdiya aseMelika Ephakathi neseNingizimu.
OFakazi BakaJehova abahlangene nanoma iyiphi inhlangano yamaProthestani. Nokho, bamatasa baya kubo bonke aboMdabu baseMelika, futhi ngenxa yalokho, aboMdabu baseMelika abaningi bayawamukela amaqiniso eBhayibheli aphathelene ‘namazulu amasha nomhlaba omusha,’ okuyohlala kukho ukulunga. (2 Petru 3:13) OFakazi basebenzisa amaBhayibheli atholakala ngezilimi zomdabu zamazwe aseMelika. Basebenzisa nezincwadi zeBhayibheli ezihunyushwa yi-Watch Tower Society ngezilimi eziningi zaboMdabu baseMelika, ezihlanganisa isi-Aymara, isiCree, isiDakota, isiGuarani, isi-Inuktitut, isi-Iroquois, isiNavajo, isiQuechua, nezinye izilimi ezingu-9.—Bheka i-Phaphama! ka-September 8, 1996.
[Isithombe ekhasini 25]
Elithi “Jehova” litholakala kumaHubo 68:4 eBhayibhelini lesiNavajo