Gcina Umbono Olinganiselayo Ngomculo
IMBONI yezomculo namuhla iyibhizinisi elingenisa izindodla zemali. Abaculi bodumo nabagqugquzeli babo bathola imali eshisiwe. Nokho, kuyiqiniso ukuthi ukuphila kwabanye abaculi bodumo kuye kwahambisana nokuntula injabulo, ukufa ngaphambi kwesikhathi nokuzibulala. Futhi kuye kwaboniswa kaningi ukuthi omunye umculo ubangela ukuwohloka ngokokuziphatha, ngokomzwelo nangokomoya futhi ungaholela ekuziphatheni okunobudlova nonya.
Nokho, kufanele sibe nombono olinganiselayo ngomculo. Nakuba kunokuningi okubi nokuyingozi ngalolu hlobo lobuciko, omunye umculo ungathuthukisa ukuphila komuntu futhi ulethe injabulo nokwaneliseka ngezinga elithile. Ungasiqinisa ngokomzwelo nangokomoya. Cabangela izibonelo nje ezimbalwa.
Amahubo angu-150 eBhayibheli awumsebenzi wobuciko—izinkondlo, izingoma ezingcwele nemithandazo. Namuhla abantu bajabulela ukuwafunda ngezilimi eziningi. Nokho, amaHeberu asendulo ayengawafundi nje amahubo; ayewahlabelela. Ngokuvamile ayehambisana nomculo omnandi lapho enza kanjalo—okwakuyindlela enamandla yokuhlobanisa ukuhlakanipha kukaNkulunkulu wawo, uJehova, ngamaphimbo kanye nemizwelo abaculi abaqeqeshiwe ababeyishukumisa kwabalalele. Kunokuba kube umculo ovamile noma oyisidala, kubonakala sengathi izinga nohlobo lomculo wamaHeberu laliphakeme kunelezizwe ezaziwazungezile ngaleso sikhathi.
Kamuva, amaKristu ekhulu lokuqala ayehlabelela amahubo nezinye izingoma ezingcwele ukuze adumise uNkulunkulu futhi athobe nemizwelo ekhathazekile. Kanjalo umculo wawuthuthukisa ukuphila kwawo. Futhi ngokuhlabelela izingoma ezisekelwe eBhayibhelini, ayegxilisa ezinhliziyweni zawo ulwazi ngoNkulunkulu, ayeludinga ukuze luqondise ukuphila kwawo.—Mathewu 26:30; IzEnzo 16:25.
AmaGreki asendulo ayekholelwa ukuthi umculo uthuthukisa ubuntu babantu futhi uphelelisa indoda noma owesifazane. Kuleli zwe lekhulu lama-20, eligcizelela imfundo kwezesayensi, ezomnotho nezengqondo, ngokuvamile ukuthuthuka kwabantu ngokomzwelo besebenzisa ubuciko akushaywa mkhuba.
Linganisela
Ukulalela umculo omnandi kungazuzisa futhi kujabulise. Nokho, umuntu angakujabulela ngisho nakakhulu ukudlala insimbi yomculo noma ukuhlabelela neqembu labangane. Ukwazi umculo kungase kuvule amathuba amakhulu enjabulo.
Yiqiniso, njengazo zonke ezinye izinto ezinhle ekuphileni, kunesidingo sokulinganisela, sokwahlulela okunengqondo nokukhetha kule ndaba yokuzijabulisa. Lokhu akulona nje iqiniso emculweni umuntu awukhethayo kuphela kodwa futhi nasesikhathini asichitha ewulalele noma ewudlala.
Uma uhlobo oluthile lomculo luqala ukuba nethonya elibi emizwelweni yakho, ezenzweni nasebuhlotsheni bakho nabanye, khetha olunye uhlobo oluhlukile. Vikela izindlebe zakho ukuze zivikele imizwelo yakho, kanjalo kuvikeleke nenhliziyo kanye nengqondo yakho!
Lokhu kuyiqiniso ikakhulukazi uma sikhuluma ngezosha. Zingase ziqale ukukulolonga ngokuvumelana nezifiso zalabo abangenawo umbono onjengowakho ngokuphila nokuziphatha, abangase bakhuthaze indlela yokuphila yokungamhloniphi uNkulunkulu neyokuziphatha okubi. Kwezinye izimo ngisho nesihloko sengoma singashukumisa imizwa engafanele.
IZwi likaNkulunkulu, iBhayibheli, liyala labo abafuna ukumthokozisa ukuba “[bethule] imizimba [yabo] ingumhlatshelo ophilayo, ongcwele, owamukelekayo kuNkulunkulu, uyinkonzo engcwele ngamandla [abo] okucabanga.” (Roma 12:1) Ngokusobala, imizwelo yethu iyingxenye yalowo ‘mhlatshelo ophilayo.’ Ngakho uma sithola ukuthi ngenxa yokushukunyiswa amandla omculo, imizwelo yethu iqala ukusithibeza ukwahlulela okunengqondo nokuhluzeka kwethu futhi iphambukisa izenzo zethu, khona-ke yisikhathi sokushintsha imikhuba yethu yokulalela umculo. Khumbula: Amandla omculo angathonya inhliziyo nengqondo yakho—ngendlela eyakhayo noma embi!
[Ibhokisi/Isithombe ekhasini 10]
Ukuthuthukisa Ikhono Lokufunda
“Ucwaningo lubonisa ukuthi ukuzwa umculo oyimvunge emnandi njalo kungathuthukisa ikhono lokufunda lomntwana. Kodwa emakhaya amaningi, akunamculo abantwana abawuzwayo.”—Audio, March 1999.