Ingabe Uyawonga Ugesi Noma Uyawusaphaza?
Ngumlobeli we-Phaphama! eBrithani
UGESI olinganiselwa kuma-dollar ayizigidi eziyinkulungwane (amaRandi ayizigidi eziyizinkulungwane eziyisithupha), ongasekela idolobha elingangeChicago, uyasaphazwa e-United States unyaka ngamunye. Kanjani? Izinto ezisebenza ngogesi njengama-computer, imishini ye-fax, ama-VCR, amathelevishini, imishini yokudlala ama-CD ngisho nemishini yokwenza ikhofi zishiywa zixhunywe kugesi. Lokhu kwenzelwa ukuba amawashi azo aqhubeke esebenza, zilondoloze indlela ezihlelwe ngayo—noma nje ukuze zilungele ukusebenza ngokushesha.
Kulinganiselwa ukuthi eBrithani ugesi osetshenziswa minyaka yonke yizinto ezisuke zixhunywe kuwo kodwa zingasebenzi, ubangela amathani ayisigamu sesigidi amagesi abamba ukushisa, ngenxa yokusebenza kwezikhungo eziphehla ugesi. La magesi angena emkhathini futhi angase anezele ekufudumaleni kwembulunga yonke. Iphephandaba laseLondon i-Times lithi: “Kungakhathaliseki ukuthi amakhasimende ayintsha awuthanda kangakanani umbono wokuvikelwa kwemvelo, ambalwa akucabangayo ukuthi ukuphehlwa kukagesi kubangela ukufudumala kwembulunga yonke.”
Ngokuvamile abantu abaqapheli ukuthi lapho zixhunyiwe, izinto eziningi zikagesi zidla ugesi ocishe ulingane neziwudla lapho zisetshenziswa ngokugcwele. Ngokwesibonelo, i-TV esebenzisa i-satellite ingase isebenzise ama-watt angu-15 uma isebenza ngokugcwele bese yonga elilodwa kuphela kulelo nani uma ixhunyiwe nje. Imikhiqizo engekho ezingeni elifanele nayo inengxenye. Omunye umshini wokudlala ama-CD owahlolwa wawusebenzisa ama-watt angu-28 lapho uxhunyiwe nje, kodwa omunye onezici ezifanayo wawusebenzisa ama-watt amabili kuphela. Kodwa manje sekuhlelwe i-chip ye-computer okuthiwa inganciphisa ugesi osetshenziswayo kusuka kuma-watt ayishumi kuya kwelilodwa noma kwangu-0,1. Kwethenjwa ukuthi njengoba umzamo wokunciphisa ukungcola uqhubeka, abakhiqizi emhlabeni wonke bayogcina sebesebenzisa le chip, ebiza amaRandi angu-15, kuyo yonke imishini abayikhiqizayo. Okwamanje, yini ongayenza?
Ungqongqoshe wezemvelo eBrithani uyaphawula: “Amandla kagesi asetshenziswa umshini ngamunye angase abonakale emancane kakhulu. Kodwa makhulu ngoba singabantu abayizigidi ezingu-60 abakhé kulezi ziqhingi [zaseBrithani].” Kusobala ukuthi ngeke zicishwe izinto zasendlini ezinjengeziqandisi. Kodwa kuhle ukujwayela ukucisha izibani ezingadingeki futhi ezinye izinto uzicishe kunokuba uziyeke zixhunywe kugesi. Lokhu ngeke konge imali yakho nje kuphela kodwa kuyosiza ekuvikeleni imbulunga yethu ekungcolisweni okungadingekile.