Ukuthatheka Ngenxa Yezingelosi
“‘Sonke’ sinezingelosi ezisiqondisayo, ezisinakekelayo . . . Uma singazihluphi futhi siziphatha njengezingane kuzo, sizethembe ngokuphelele, sizithande futhi sizazise ngokuthobeka, khona-ke ziyosithululela inala yezibusiso. Zidlala nathi. Ziyasinakekela. Ziyasiphulukisa, ziyasithinta, ziyasiduduza ngezandla ezifudumele ezingabonakali, futhi ngaso sonke isikhathi zizama ukusinikeza lokho esikufunayo.”—Ithathwe encwadini ethi “Angel Letters.”
UZOVUMA ukuthi lo mbono odumile ngezingelosi uyathakazelisa. Umbono abanye abawubiza ngokuthi “ingokomoya elisha,” uthi ngamunye wethu unikezwe okungenani ingelosi eyodwa, ukuba isiduduze futhi isivikele ezingozini. Kuthiwa ingelosi yakho inamandla futhi inothando. Akudingeki ukuba uzithobe kuyo noma uyikhonze, futhi ngeke ilokothe ikwahlulele noma ikujezise. Ihlale ikusekela, ikhathalela inhlalakahle yakho futhi izimisele ukufeza zonke izifiso zakho. Abaningi namuhla bazikholelwa ngobuqotho lezi zinto.
Nokho, ukukholelwa ezingelosini akukusha. Ziye zafeza indima enkulu ezinkolelweni zabantu ezingokwenkolo kusukela emandulo. Lokhu kubonakala emisebenzini yobuciko. Imifanekiso yamakherubi, uhlobo oluthile lwezingelosi, yayihlobisé itabernakele nethempeli lamaJuda lasendulo. Kunemifanekiso yezingelosi ehlobisé amasonto namathempeli kulo lonke eLobukholwa. Iminyuziyamu igcwele imidwebo nezithombe zezingelosi.
Ukuduma Kwezingelosi
Ezikhathini zamuva nje, izingelosi ziye zaduma kakhulu kwamanye amazwe. Amabhayisikobho avame ukuveza izingelosi zingabantu abaye bafa base bebuya beza emhlabeni bazokwenza izenzo ezinhle. Kwenye ibhayisikobho, izingelosi zisiza iqembu labadlali be-baseball elihlulwayo. Kwenye, ingelosi enakekelayo isiza ibhungu elithile ukuba liziphindiselele kumbulali wentombi yalo. Isihloko sezingelosi ezingabasizi siyachuma nasezinhlelweni ezidumile zethelevishini e-United States.
Izingoma ezikhuluma ngezingelosi zandile. Phakathi namashumi eminyaka amuva nje e-United States, ingoma eyodwa kweziyishumi ezidumile ikhuluma ngengelosi. Phakathi nawo-1990, kwase kuvulwe “izitolo eziphambili zezingelosi,” ezingaphezu kuka-120 eMelika. Lezi zitolo zidayisa izithombe ezincane zezingelosi, imihlobiso nezincwadi—ngisho nezinto zokuthulisa izingane ezihlotshiswe ngezithombe zezingelosi. Kunemihlangano namapheshana okuthiwa afundisa abantu ukuthi bangaxhumana kanjani nalezi zidalwa zaphezulu. Omagazini, amaphephandaba nezinhlelo zezingxoxo zilandisa ngabantu abaxhumana nezingelosi.
Amakhulu Ezincwadi
Bese kuba khona izincwadi. Esinye isitolo sezincwadi esikhulu eNew York City sinezincwadi ezingaphezu kuka-500 ezikhuluma ngezingelosi, ikakhulukazi izingelosi ezinakekelayo. Izincwadi ezinjalo kuthiwa zibonisa abafundi ukuthi bangaxhumana kanjani nezingelosi ezibanakekelayo, bazi amagama azo, bakhulume nazo ukuze zibasize. Lezi zincwadi zinezinganekwane eziningi ezikhuluma ngendlela izingelosi eziye zazibonakalisa ngayo lapho zidingeka, ziqhelisa abantu emigwaqweni ukuze bangashayiswa yizimoto, zelapha izifo ezibulalayo, ziduduza abasosizini futhi zivikela amasosha empini. Izingelosi ezinjalo zenza lezi zinkonzo “ngaphandle kokulindela uphawu lokuphenduka, ukuguquka noma ukwethembeka ezinkolelweni ezithile.” Kodwa “ukuxhumana” okunjalo kwanamuhla akubakhuthazi abantu ukuba bashintshe ukuphila kwabo. Labo abathi baye bahlangabezana nezenzakalo ezinjalo ngokuvamile basala nje benomuzwa wenjabulo kuphela.
Esikhathini sokucindezeleka nezinhlekelele, le mibiko ingase ibonakale iyizindaba ezinhle kakhulu. Kodwa ingabe zingathenjwa? Ingabe kunendaba?
[Amazwi acashunwe esihlokweni ekhasini 4]
Abaningi banomuzwa wokuthi baye bathintana nezingelosi uqobo