Sinjani Isimilo Namuhla?
Ngolunye usuku ekuseni ngo-April 1999, ukuthula kwaphazamiseka edolobheni laseLittleton, eduze naseDenver, eColorado, e-U.S.A. Abasha ababili ababegqoke amajazi amnyama bangena esikoleni esiphakeme sendawo baqala ukudubula abafundi nothisha. Futhi baqhumisa namabhomu. Kwafa abafundi abangu-12 nothisha, futhi kwalimala abangaphezu kuka-20. Ekugcineni laba bahlaseli baphetha lesi sibhicongo ngokuzibulala. Babeneminyaka engu-17 nengu-18 kuphela ubudala futhi bezizonda ngokujulile izinhlanga ezithile.
NGOKUDABUKISAYO, isibonelo okukhulunywe ngaso ngenhla siyinsakavukela. Amaphephandaba, umsakazo nethelevishini kubika izenzakalo ezifanayo emhlabeni wonke. Ngokwe-National Center for Education Statistics, ngo-1997 kwabikwa izenzo zobudlova ezihilela ukusetshenziswa kwezikhali ezilinganiselwa ku-11 000 ezikoleni zaseMelika. EHamburg, eJalimane, ngo-1997 imibiko yezenzo zobudlova yenyuka ngamaphesenti ayishumi, futhi abamangalelwa abangamaphesenti angu-44 kwakuyintsha eneminyaka engaphansi kuka-21.
Ukonakala kwezazi zezombangazwe nezikhulu zikahulumeni kuyinto evamile. Umbiko owenziwa ngo-1998 ukhomishane we-European Union (EU) u-Anita Gradin wembula ukuthi izindleko zokonakala kuyi-EU ngo-1997 ziye zalinganiselwa emaRandini ayizigidi eziyizinkulungwane ezingu-8,6. Lokhu kwakuhlanganisa yonke into kusukela ekuchitheni izinhlawulo zezimoto kuya ekukhwabaniseni izimali zokuxhasa abalimi noma ezinye izimali ze-EU. Ukubolekisa ngezindodla zemali nokushushumbisa izikhali nezidakamizwa kwakuvunyelwe, futhi izisebenzi ze-EU zazifumbathiswa yizinhlangano zezigebengu ukuze zingathi vú. Wonke amalungu eKhomishane ye-EU ashiya izikhundla ngo-1999.
Nokho, akubona kuphela abasezikhundleni eziphakeme emphakathini abakhohlisayo. Umbiko weKhomishane ye-EU omayelana nezisebenzi ezingekho emthethweni wembula ukuthi umkhiqizo wamazwe e-EU ongamaphesenti angu-16 uhlanganisa imali evela emabhizinisini angabhalisiwe futhi angayikhokhi intela. ERussia kubikwa ukuthi imali eyenziwa ngokungemthetho ingamaphesenti angu-50 aleyo ngqikithi. Ngaphezu kwalokho, e-United States, i-Association of Certified Fraud Examiners yabonisa ukuthi izinkampani zaseMelika zilahlekelwa ama-dollar ayizigidi eziyizinkulungwane ezingu-400 (amaRandi angaba izigidi zezigidi ezingu-2,5) minyaka yonke ngenxa yezisebenzi ezeba imali noma impahla.
I-Internet ibilokhu isetshenziswa abanukubezi bezingane abaningi abafuna ukuyengela izingane nentsha ezenzweni zobulili ezingemthetho. Ngokusho komkhulumeli waseSweden we-Save the Children, kuyanda ukukhathazeka ngenxa yezithombe zobulili ezingcolile zezingane ezikuyi-Internet. ENorway ngo-1997, le nhlangano yalunywa indlebe izikhathi ezingu-1 883 mayelana nezingozi zezithombe zobulili ezingcolile ezikuyi-Internet. Ngonyaka owalandela inani lamacebiso anjalo lenyuka lacishe lafinyelela ku-5 000. Eziningi zalezi zinto zikhiqizwa emazweni lapho ohulumeni noma iziphathimandla zendawo zingenakukwazi khona ukulawula lezi zenzo ezenyanyekayo.
Ingabe Kwakungcono Esikhathini Esidlule?
Abantu abaningi namuhla abethuswa isimo esibi sesimilo emhlabeni, bangase balangazelele umoya wokubambisana komphakathi owawujatshulelwa abazali noma obabamkhulu babo osukwini lwabo. Mhlawumbe bake bezwa kuthiwa abantu babephila ngokuthula ngaleso sikhathi futhi bekwazisa ukwethembeka nezinye izici zokuziphatha okuhle kuyo yonke imikhakha yomphakathi. Kungenzeka abantu abadala babekhuluma ngesikhathi lapho abantu babekhuthele besizana, izibopho zomkhaya ziqinile nentsha inomuzwa wokulondeka futhi isiza abazali epulazini noma emashabhu.
Lokhu kuholela emibuzweni ethi: Ingabe ukuziphatha kwabantu kwakungcono ngempela esikhathini esidlule? Noma kumane nje kuwumuzwa wesifiso ophendukezela izinkumbulo zethu zezinsuku esezadlula? Ake sibone ukuthi izazi-mlando nabanye abahlaziyi bezenhlalo yomphakathi baphendula kanjani.
[Ibhokisi ekhasini 3]
Incazelo Yesimilo
Kulezi zihloko, igama elithi “isimilo” libhekisela ezimisweni zokuhle nokubi endleleni yabantu yokuziphatha. Lokhu kuhlanganisa ukwethembeka, ukuba neqiniso nezindinganiso eziphakeme zokuziphatha ngokobulili nezinye izindaba.