Uthando LobuKristu Lubhekana Nentaba-mlilo

NGUMLOBELI WE-PHAPHAMA! ECAMEROON

KWABA nokuqhuma okukhulu ngonyaka odlule ezweni laseNtshonalanga Afrika eCameroon. INtaba iCameroon iyintaba-mlilo engamamitha angu-4 070 ukuphakama ngaphezu kogu lolwandle. Kubikwa ukuthi lokhu kuqhuma—okungokwesihlanu ekhulwini lama-20—kwakukukhulu ukwedlula konke osekwake kwenzeka kuze kube manje.

Ekuqaleni le nhlekelele yahlasela ngoMgqibelo ntambama, ngo-March 27, 1999. Ofakazi bokuzibonela edolobheni laseBuea, elisemthambekeni wale ntaba, babika ukuthi izindonga, izindlu, ngisho nezihlahla zazindindizela ngamandla. Ngobusuku obulandelayo, cishe seligamenxe ihora lesishiyagalombili, ukundindizela okunamandla, okubi nakakhulu kwagasela yonke indawo. Kwezwakala eDouala eqhele ngamakhilomitha angu-70. Isihloko esikhulu sephephandaba i-Messager langoLwesibili, ngo-March 30, 1999, samemezela: “Ukuqhuma Kwentaba ICameroon—Abantu Abangu-250 000 Babhekene Nomlilo.” Laqhubeka lathi: “Umhlaba uye wazamazama izikhathi ezingu-50 ezinsukwini ezimbili; kakade sekuvuleke imigodi emine; amakhulu ezindlu acekeleke phansi; isigodlo sikamongameli eBuena sesiyizicucu.”

KunoFakazi BakaJehova abangu-80 abahlala eBuea. Izindlu eziningi zashabalala ngokuphelele, kuhlanganise nendlu eyayisetshenziswa njengeHholo LoMbuso. Nokho, abekho abafa.

Ukusebenza Kothando LobuKristu

Ngokushesha uthando lobuKristu lwaqala ukusebenza lulungisa umonakalo owawubangelwe yile ntabakazi ethukuthele. Kwamiswa ikomiti yokunikeza usizo, iNdikimba Ebusayo YoFakazi BakaJehova yathumela izimali ezazidingeka kakhulu, futhi ngothando amakhulu oFakazi anikela ngesikhathi sawo, amandla nezimali zawo.

Amabandla oFakazi BakaJehova athumela ukudla. Omunye uFakazi wanikela ngezitini zikasimende ezingu-1 000. Omunye wahlela ukuba kuthengwe uphahla lukathayela ngamanani aphansi. Kanti omunye wahamba ngezinyawo amakhilomitha angu-16 ukuze ayogawula izingodo. Insizwa eyayizongele imali ukuze ikhokhe ilobolo, yawuhlehlisa umshado futhi yasebenzisa leyo mali ukulungisa umshini wayo oyisaha. Yanikela ehlathini, lapho yachitha khona amasonto amathathu igawula izingodo ezanele ukwakha indlu ephelele! Abazalwane abasebasha abangamaKristu nabanamandla, bazithwala ngamakhanda lezi zingodo baziyisa endaweni eqhele ngamakhilomitha angu-5, lapho zazilayishwa khona elolini.

Ukwakha kwaqala ngo-April 24 lapho izisebenzi zokuzithandela ezingu-60 zihlangana endaweni okwakwenzeke kuyo inhlekelele. Ngezimpelasonto ezalandela, lelo nani landa lafinyelela kubantu abangu-200. OFakazi abathathu abanomsebenzi wokuziphilisa wesikhathi esigcwele bafika ekupheleni kosuku futhi bakha kwaze kwaba phakathi kwamabili. UFakazi waseDouala wayeya emsebenzini wakhe wokuziphilisa ekuseni; ehamba ngesithuthuthu sakhe ibanga elingamakhilomitha angu-70 eyosebenza kuze kube phakathi kwamabili ngaphambi kokubuyela ekhaya. Kwaqedwa izindlu eziyisithupha esikhathini esingaphansi kwezinyanga ezimbili. Phakathi naleso sikhathi, iBandla LaseBuea laqhubeka liqhuba imihlangano emzini othile, nakuba inani lababebakhona emihlanganweni lalicishe liliphinde kabili inani lamalungu ebandla.

Phakathi nale nkathi efanayo, ikomiti enikeza usizo yakhipha amaphilisi angaphezu kuka-40 000 okuhlanza amanzi angcolile futhi yanakekela impilo yabantu abacishe babe yishumi ababeguliswa izifo zokuphefumula ezazibangwe isisi esinokungcola nomlotha wentaba-mlilo. Basabela kanjani labo ababona lolu thando lobuKristu?

Uthando LobuKristu Luyanqoba

Ngemva kokubona enye indlu eyayakhiwe abazalwane, indoda esebenzela i-Provincial Delegation of Agriculture yathi: “Le ndlu iwubufakazi obukhulu ngokwayo . . . , ukubonakaliswa kothando.” Uthisha othile wathi: “Ngiyaqala ukubona into enje ekuphileni kwami. . . . Ngempela lolu uphawu lobuKristu beqiniso.”

Labo abazuza ngokuqondile nabo babengawuvali umlomo. UTimothy, oneminyaka engu-65 futhi ogulayo, wabhala: “Njalo lapho sibuka indlu yethu entsha, kuhlengezela izinyembezi zenjabulo. Silokhu simbonge njalo uJehova ngalokho asenzele kona.” Umfelokazi ongeyena omunye woFakazi BakaJehova wasala dengwane nezingane zakhe ezine lapho umuzi wakhe ubhidlika. Khona-ke, labo ababeqashiwe ukuba bazosiza bantshontsha impahla yakhe yophahla. Izisebenzi zokuzithandela ezingoFakazi zamsiza. Wathi: “Ngiswele amazwi okubonga. Inhliziyo yami ichichima injabulo.” U-Elizabeth, inkosikazi yomdala ongumKristu, waphawula: “Ngiyajabula ngoba kunothando enhlanganweni kaJehova. Kuyabonakala ukuthi sikhonza uNkulunkulu ophilayo.”

Ukuqhuma kwentaba-mlilo kwakukukhulu, kodwa akukwazanga ukucisha uthando lobuKristu lwalaba bazalwane. Njengoba umphostoli uPawulu aphefumulelwa ukuba abhale, “uthando alupheli nanini.”—1 Korinte 13:8.

[Izithombe ekhasini 16]

Amathantala odaka olushisayo adala umonakalo omkhulu

[Isithombe ekhasini 17]

Izisebenzi zokuzithandela zasebenza kanzima zilungisa izindlu ezibhidlikile

[Isithombe ekhasini 16, 17]

INtaba iCameroon