Okuphawulwa Abafundi Balo Magazini
Ukukhetha Umngane Womshado Siyabonga ngokukhathalela kobubaba enasibonisa kona thina esisebasha esihlokweni esithi “Umbono WeBhayibheli: Indlela Yokukhetha Umngane Womshado.” (October 8, 1999) Ukungabi nalwazi kwenza intsha eningi igijimele emshadweni, iphambanisa ukuthatheka nothando lweqiniso. Ngingamane ngizihlalele ngedwa kunokuba ngishade nomuntu engingafanelani naye.
S.R.M., Brazil
Ngineminyaka engu-40 ubudala futhi angikaze ngishade. Ngithandaza kuJehova nsuku zonke ukuba ngithole umngane womshado, futhi ngizama kanzima ukuhlakulela izimfanelo ezidingekayo ukuze ngibe nomshado ophumelelayo. Kwakukhuthaza kakhulu ukufunda ukusikisela kokufuna umuntu oqinile ngokomoya, umuntu onemigomo efana neyakho futhi ozimisele ukuhlakulela izithelo zomoya kaNkulunkulu. Ngiyabonga kakhulu ngokuqinisa ukuzimisela kwami ukuqhubeka ngilindele uJehova.
E. F., United States
Amahlolamvula Sekuyiminyaka ngibuka amahlolamvula aseYurophu akha izidleke ngikuvulandi wami. Afika ngo-May futhi anyamalale ngokungazelelwe ngo-August. Ngenxa yesihloko esithi “Ihlolamvula—Alishiywa Yilutho” (October 8, 1999), manje sengazi okuningi ngalezi zidalwa ezithakazelisayo.
A. D., Germany
Indaba Yokuphila Sekuyiminyaka engaphezu kweyishumi ngingumshumayeli wesikhathi esigcwele futhi bengihlale nginogqozi lokunibonga ngezihloko ezibhalwe kahle. Okuhlangenwe nakho kwezithunywa zevangeli kuye kwaba usizo kakhulu kimi. Bengilokhu ngifuna ukuba yisithunywa sevangeli nami. Okuhlangenwe nakho okunjengokukaWillem noGré van Seijl (“Izenzakalo Ziye Zangishiya Ngimangele,” October 8, 1999) kungisiza ukuba ngilondoloze isifiso sami sokukhonza kwelinye izwe.
P. K., United States
Ngesikhathi ngifunda lesi sihloko, ngangicindezeleké kakhulu. Ngezinye izikhathi ngiba nomuzwa wokuthi ngeke ngize ngiyifinyelele imigomo yami engokomoya. Kuye kwaba nzima futhi ukulondoloza isimo sengqondo esiqondile ngomsebenzi wami njengomshumayeli wesikhathi esigcwele. UWillem noGré babenombono omuhle, wokulindela okuhle naphezu kwezithiyo, futhi uJehova wayibusisa imizamo yabo. Lokho kwangenza ngaphinde ngazethemba ukuthi nami ngingayifinyelela imigomo yami uma ngizigcina nginokholo oluqinile.
K. C., United States
Ukuba Namahloni Ngiyabonga kakhulu ngesihloko esithi “Intsha Iyabuza . . . Kungani Nginamahloni Kangaka?” (October 22, 1999) Ngineminyaka engu-17 ubudala futhi lesi sihloko sacishe sangenza ngacabanga ukuthi sibhalelwe mina. Sachaza yona kanye indlela engizizwa ngayo. Bengijwayele ukuzwa kuthiwa ngiyaqhosha. Kodwa iqiniso lokuthi umuntu othile akakhulumi kakhulu njengabanye alinikezi isizathu sokuba umahlulele lowo muntu.
R. R., Germany
Ngenxa yesifo esingathi sína esangiphatha ngiseyingane, ngizizwa ngihlukanisiwe nabanye abantu. Lesi sihloko sangisiza ukuba ngiqaphele imizwa yami futhi ngithole indlela yokunqoba lesi simo. Ngizolwela ukuba nabangane ebandleni lakithi.
J.F.F., Brazil
Inani Eliyiphutha! Ngihlale ngizijabulela izihloko zenu futhi zihlale zinembile. Nokho, esihlokweni esithi “Ukubuka Okwezwe,” isihlokwana esithi “Ukukhonza Izimoto” (September 8, 1999) sathi “Kulinganiselwa ukuthi okwamanje kunezimoto ezingaba yizigidi ezingu-40 ezisetshenziswa e-United States.” Inani elinembile lingaphezulu kakhulu kwalokho.
R. K., United States
Siyaxolisa ngaleli phutha. Singahlosile sacaphuna isibalo esiyiphutha. Okwamanje, zingaphezu kwezigidi ezingu-130 izimoto ezibhalisiwe e-United States.—ED.