Okuphawulwa Abafundi Balo Magazini
I-Vasa Ngifisa ukubonga ngesihloko esithi “I-Vasa—Ukusuka Enhlekeleleni Kuya Ekukhangeni.” (April 8, 2000) Njengesazi-mlando esiye senza umsebenzi othile ophathelene nalolu daba, ngingaqinisekisa ukuthi lesi sihloko sacwaningwa kahle kakhulu. Sazichaza kahle kakhulu izenzakalo ngendlela enokulinganisela.
T. W., Germany
Ukunqoba Emacaleni Omthetho Ngisanda kuvela phambi kwenkantolo ngenxa yempi yokuwina abantwana bami, futhi umyeni wami esesahlukana naye uye waphakamisa impikiswano ngezinkolelo zami ezingokwenkolo. Bekunzima. Lapho ngifunda isihloko esithi ‘Impi Akuyona Eyenu, NgekaNkulunkulu’ (April 22, 2000), ngakhala izinyembezi.
D. B., United States
Ngemva kokufunda lesi sihloko, ngasibonisa abameli bendawo. Akekho noyedwa owamelana naso. Abanye baze bangimemela emahhovisi abo ukuzojabulela ikhofi nengxoxo eyengeziwe. Abambalwa bacela amanye amakhophi ababezowanika abameli abasebenza nabo. Bonke laba bameli bamangala lapho ngibabonisa ukuthi uHayden Covington wayenqobe amacala angu-36 kwangu-45 phambi kweNkantolo Ephakeme yase-United States.
C. M., United States
Intsha Engobaba Ngibhala ukuze ngizwakalise ukwazisa kwami okujulile ngesihloko esithi “Intsha Iyabuza . . . Ukuba Nabantwana—Ingabe Kukwenza Indoda?” (April 22, 2000) Ngineminyaka engu-28 ubudala futhi angishadile, futhi ngiyiphayona elikhethekile, noma umshumayeli wesikhathi esigcwele. Kule ngxenye yeNtshonalanga Afrika, umuntu ongangami ongenayo inkosikazi noma intombi ubhekwa njengeqaba nanjengenyumba. Ngenxa yalokhu, ngivame ukugconwa futhi ngibukelwe phansi. Nokho, isihloko senu saqinisa ukuzimisela kwami ukuhlala ngihlanzekile.
A. E., Ghana
Ngalahlekelwa ubuntombi ngingakahlanganisi neminyaka engu-20 futhi ngafeba nabafana abaningi. Njalo ngangisala ngizizwa ngingcolile, futhi ngangixhashazwa njalo. Lokhu kwangenza ngacindezeleka. UJehova wangisiza ukuba ngihlanze ukuphila kwami, futhi manje ngijabulela ukuphila nendoda ekahle engishade nayo. Kodwa kuhle ukuba ninyathelise izihloko ezinjengalesi ukuze nisize izinsizwa ziqaphele ukuthi lokho ezikwenzayo kungalimaza intombazane ukuphila kwayo konke.
F.A.S., Germany
Ngizizwa ngishukumiseleka ukuba nginibonge ngokubeka okungenani ingxenye yomthwalo womama abangashadile lapho kufanele ube khona—kobaba babantwana! Baningi abantu abacabanga ukuthi njengoba kungabesifazane kuphela abakhulelwayo, imvelo ibonisa ukuthi lokhu kuyinkinga yabesifazane futhi amadoda awanacala. Qhubekani niqaphelisa izinsizwa indlela uNkulunkulu afuna abesifazane baphathwe ngayo.
J.M.O., Italy