Okuphawulwa Abafundi Balo Magazini
Amabhomu Agqitshwayo Ngashukunyiswa uchungechunge oluthi “Yini Engenziwa Ngamabhomu Agqitshwayo?” (May 8, 2000) Kuyashaqisa ukuthi ziningi kangaka izakhamuzi ezingabuthiwe ezingenacala ezibulawa amabhomu agqitshwayo unyaka nonyaka.
E. U., Finland
Ngadumala lapho ngifunda ngala mathuluzi anonya abantu abawasebenzisela ukulimaza abanye. UNkulunkulu unezizathu ezizwakalayo zokungenela futhi asuse ububi emhlabeni wethu.
G. S., Brazil
Lolu chungechunge lwaluwushintsho, lwaqaphelisa umphakathi ngendaba engathi sína. Umfanekiso osesembozweni wawuvusa isithakazelo.
R. H., United States
Ukwelashwa Ngaphandle Kwegazi Isihloko esithi “Uzokufa!” (May 8, 2000) sangikhumbuza lokho okwenzeka kubaba. Eminyakeni eminingi edlule washaywa unhlangothi lapho eshayela. Imoto yakhe yagingqika, futhi lapho ephaphama udokotela wamtshela ukuthi kufanele ampontshelwe igazi. Lapho ubaba enqaba, udokotela wathi: “Uma ungalamukeli igazi, uzokufa.” Ubaba wenqaba noma kunjalo. Ngakusasa udokotela weza egumbini lakhe wambuza: “Uzizwa unjani?” Ubaba wathi: “Ngiyaphila!” Namanje ubaba usaphila futhi ukhonza uJehova ngangokusemandleni akhe.
T. M., United States
Nginomdlavuza wegazi ongavamile, futhi lapho ngixilongwa udokotela wangitshela ukuthi ngizokufa ezinyangeni eziyisithupha uma ngingaqali ngokushesha ukumpontshelwa igazi. Lokhu kwenzeka ngo-1991. Ngathola udokotela ohlonipha izinkolelo zami ngegazi, futhi ngaphansi kokuqondisa kwakhe, ngenza isinqumo somuntu siqu sokwamukela imijovo ene-erythropoietin masonto onke, eye yasiza ekwandiseni umthamo wami wegazi.
E. G., United States
Ngayifunda indaba kaLeanne Karlinsky futhi njengodokotela ngashaqiswa unya lwalabo abamshaya indiva ngemva kokuhlinzwa [ngenxa yokuthi wayenqabe ukumpontshelwa igazi]. Kunzima ukukholelwa ukuthi kukhona abantu abanamakhanda aqine kanje!
C. C., United States
Ukulwa Nokuphelelwa Yithemba Njengoba ngihlushwa ukucindezeleka, ngokushesha nje lapho ngithola umagazini ngafunda isihloko esithi “Umbono WeBhayibheli: Indlela Yokubhekana Nokuphelelwa Yithemba.” (May 8, 2000) Njengoba nasho, kuyakhuthaza ngempela ukuxoxa nomuntu olalela ngokuqonda. Ngiyabonga ngezihloko zenu ezinhle.
A. D., Lithuania
Ukungezwani Ne-lactose Umkami waya kudokotela ngoba wayegula. Udokotela wathi kungenzeka ukuthi akezwani ne-lactose. Ngangiqala ukuzwa into enjalo, ngakho siyabonga ngesihloko esithi “Ingabe Awuzwani Ne-lactose?” (May 8, 2000) Lokhu kwaziswa okuhle kwafika ngesikhathi.
E. P., United States
IBrazil Isihloko esithi “IPantanal—Indawo Evikelekile Ethakazelisayo” (September 8, 1999) savusa isifiso sami sokuzibonela mathupha le ngxenye yendalo kaJehova. Ngakho mina nodadewethu sahlela ukuvakashela eBrazil, futhi isihloko esithi “Umlando Omangalisayo ‘Wezwe Elinezinto Ezinhlobonhlobo’” (May 8, 2000) safika emasontweni amabili ngaphambi kokuba sifike lapho. Saba isiqondiso esihle kakhulu sezindawo ezinhle esasingazivakashela.
E. V., England
Izinyoni Neziboshwa Ngiye ngaba nenjabulo yokufuya izinyoni ezimbalwa—ngase ngizidedela zaya ehlathini. Isihloko esithi “Inyoni Ingasifundisani Isiboshwa?” (May 8, 2000) sangenza ngacabanga ngendlela ngisho nendalo encane kaJehova engasifundisa lukhulu ngayo.
E. D., United States