Ingabe UkuQothulwa Kwesizwe Kungenzeka Futhi?
NGUMLOBELI WE-PHAPHAMA! ESWEDEN
NGO-JANUARY 26-28, 2000, omongameli beMibuso nabameleli bohulumeni abangu-48 emhlabeni wonke babuthana enhloko-dolobha yaseSweden eNgqungqutheleni Yomhlaba Wonke YaseStockholm YokuQothulwa Kwesizwe. Amanye amagama ashiwo yizikhulumi embula ukuthi abaholi bomhlaba banovalo ngokubuya kobuNazi. OwayenguNdunankulu wakwa-Israel u-Ehud Barak wathi: “Le ngqungquthela inesigijimi esiya embulungeni yonke: Akufanele neze kubekezelelwe, kunoma iyiphi indawo emhlabeni, umbuso wobubi nokubulala nokubandlululana phakathi kwabantu ngenxa yenkolo, uhlanga noma ibala labo.”
Akuwona AmaJuda Kuphela Akhathazekile
Abantu abaningi emhlabeni wonke bahlobanisa inkulumo ethi “ukuQothulwa Kwesizwe” namaJuda kuphela. Kodwa, bakhona nabanye ababeyizisulu. Emkhosini wesikhumbuzo wokuQothulwa KwamaJuda owasakazwa kabanzi owaqhutshwa eGreat Synagogue of Stockholm phakathi nale ngqungquthela, undunankulu waseSweden wasikisela ukuba kwenziwe isivumelwano sokuvula zonke izinqolobane zolwazi emhlabeni wonke ukuze kukhanyiselwe isintu ngokuQothulwa Kwesizwe. Wathi: “Masithole ukukhanyiselwa ngokuqothulwa kohlanga lwamaRoma [amaGypsy], ukucekwa kwabantu abakhubazekile kanye nokushushiswa nokubulawa kongqingili, abaphikisi bombuso noFakazi BakaJehova.”
Uhulumeni waseSweden unyathelisé incwadi ekhuluma ngokuQothulwa Kwesizwe enesihloko esithi Tell Ye Your Children, eye yasakazwa kulo lonke izwe mahhala emikhayeni yonke enezingane. Le ncwadi iphawula ukuthi oFakazi BakaJehova “benqaba ukwenza isifungo sokwethembeka kuHitler naseJalimane lobuNazi. Ukwenqaba okunjalo kwakuyingqayizivele ngoba ukusayina nje incwadi evuma ukuthi babezothembeka kwakungaqeda ukushushiswa kwabo—kodwa bambalwa abakhetha lokho.”
UkuQothulwa Kwesizwe NoFakazi BakaJehova
Ngo-1933, kwakunoFakazi BakaJehova abangaba ngu-25 000 eJalimane. Izinkulungwane zabo zaziphakathi kwabantu bokuqala abavalelwa emakamu amaNazi nasemajele. Banquma ukungathathi hlangothi njengamaKristu kuzo zonke izindaba zezombangazwe nezempi. Abazange bamkhonze uHitler. Benqaba ukwamukela ubandlululo lwamaNazi nokuhlanganyela emkhankasweni kaHitler wezempi. Kwafa abangaba ngu-2 000, abangaphezu kuka-250 kubo babulawa.
Ngaphezu kwalokho, oFakazi ababeboshiwe basiza ezinye iziboshwa ukuba zikhuthazele, kuhlanganise namaJuda nabanye. Lokhu bakwenza ngokugxilisa kuzo ithemba elisekelwe eBhayibhelini nangokuhlanganyela noma yini ababenayo nabagulayo nababuthakathaka, ngokuvamile bedela ngisho nocezu lokugcina lwesinkwa. Phakathi neminyaka yokuqala yoshushiso lwamaNazi, bakhipha nokwaziswa mayelana nokuba khona kwamakamu okuhlushwa nokuthi kwakwenzekani kuwo. Kusukela ngaleso sikhathi, komagazini babo abasakazwa emhlabeni kabanzi, INqabayokulinda ne-Phaphama!, baye banyathelisa izihloko eziningi ezikhuluma ngezenzo zonya zamaNazi kanye nezindaba zabantu abasinda.
Abameleli ababeseNgqungqutheleni Yomhlaba Wonke YaseStockholm YokuQothulwa Kwesizwe kwakusobala ukuthi banovalo ngokubuya kobuNazi. UProfesa Yehuda Bauer, umqondisi we-International Center for Holocaust Studies e-Institute of Contemporary Jewry, kwa-Israel, wakubeka ngale ndlela: “Ngenxa yokuthi kwake kwenzeka, kungase kwenzeke futhi, hhayi ngendlela efanayo, hhayi kubantu abafanayo, hhayi ngabantu abafanayo, kodwa kunoma ubani kwenziwa yinoma ubani. Akukho okwenzeka okwakufana nakho, kodwa manje kukhona okungase kufaniswe nakho.”
[Isithombe ekhasini 12]
Unxantathu onsomi wawuwuphawu loFakazi BakaJehova emakamu
[Izithombe ekhasini 12, 13]
1. UJulius Engelhardt, owayengomunye woFakazi BakaJehova, wabulawa amaNazi eBrandenburg ngo-August 14, 1944
2. OFakazi BakaJehova abathathu balibangise ekhaya ngemva kokukhululwa eSachsenhausen, ngo-1945
3. U-Elsa Abt, uFakazi owahlukaniswa nendodakazi yakhe encane wagqunywa ejele cishe iminyaka emithathu
[Umthombo]
Nordrhein-Westfälisches Hauptstaatsarchiv, Düsseldorf
[Izithombe ekhasini 13]
OFakazi abasinda balandisa okwenzeka kulama video