Intsha Iyabuza . . .

Ngingakwenza Kanjani Ukufunda IBhayibheli Kuthakazelise?

“Ngezinye izikhathi kunzima ukuqonda iBhayibheli, futhi lokho kungakudikibalisa.”—U-Annalieza, oneminyaka engu-17 ubudala.

“Ngilithola lingangithakazelisi iBhayibheli.”—UKimberly, oneminyaka engu-22 ubudala.

ABANTU abaningi abakuthandi nje ukufunda. Ngakho incwadi enkulu njengeBhayibheli ingase ibathene amandla—ngisho nabantu abakuthandayo ukufunda. “Kimina iBhayibheli laliwumqingo onamagama alukhuni okunzima ukuwaqonda,” kusho uTammy, oneminyaka engu-17 ubudala. “Ukufunda iBhayibheli kudinga ukugxilisa ingqondo nokukhuthazela.”

Ngaphezu kwalokho, umsebenzi wesikole, imisebenzi yasendlini nokuzilibazisa kungase kudle isikhathi sakho esiningi namandla. Nalokhu kungakwenza kube nzima ukugxilisa ingqondo nokujabulela ukufunda iBhayibheli. U-Alicia, ongomunye woFakazi BakaJehova, ubuye asebenzise esinye isikhathi elungiselela, eya emihlanganweni yobuKristu futhi ehlanganyela izinkolelo zakhe nabanye. Uyavuma: “Ukufunda iBhayibheli kungaba nzima ngoba kubonakala kunezinto ezingapheli okudingeka zenziwe.”

Nokho, u-Alicia, uTammy nenye intsha eningi baye bayinqoba le nselele. Manje bafunda iBhayibheli njalo futhi bayakujabulela. Nawe ungakwenza! Cabangela izinto ezintathu ongazenza ukuze wenze ukufunda iBhayibheli kujabulise kakhudlwana.

Hlela Isikhathi Sokufunda IBhayibheli

UKelly, oneminyaka engu-18 ubudala, uthi: “Ngicabanga ukuthi intsha ithi ukufunda iBhayibheli akuthakazelisi ngoba ayikalifundi ngokwanele.” Njengoba nje uwujabulela umdlalo owudlala njalo, uyokujabulela nokufunda iBhayibheli uma ukwenza njalo.

Kodwa kuthiwani uma ungenaso isikhathi? Umphostoli uPawulu uyeluleka: “Qaphelisisani ukuthi indlela enihamba ngayo ayinjengeyabantu abangahlakaniphile kodwa injengeyabahlakaniphileyo, nizithengisisela ithuba, ngoba izinsuku zimbi.” (Efesu 5:15, 16) ‘Ungazithengisisela ithuba’ ngokuchitha isikhathi esincane emisebenzini engabalulekile njengokubukela i-TV. Igama ‘lethuba’ uPawulu alisebenza lingasho isikhathi esimiselwe injongo ethile. Singaba nini isikhathi sakho esimiselwe ukufunda iBhayibheli?

Abaningi bafunda iBhayibheli ekuseni, ngemva kokucabangela itekisi elingokomBhalo nokukhulumela okutholakala encwadini ethi Ukuhlola ImiBhalo Nsuku Zonke.a Abanye bakhetha ukulifunda ngaphambi kokuyolala ebusuku. Khetha isikhathi esizovumelana nawe, futhi wenze ushintsho oludingekayo. U-Alicia uyaphawula: “Ukuvumelana nezimo yisona sihluthulelo sokugcina isimiso sami sokufunda njalo.”

Enye intsha engamaKristu ihlela imizuzu eyishumi kuya kwengu-15 nsuku zonke yokufunda iBhayibheli. Ngokwenza kanjalo, iye yakwazi ukuliqeda lonke iBhayibheli ngonyaka noma emibili! Ngisho noma ubona sengathi lokho ngeke ukufinyelele, kwenze umgomo wakho ukufunda ingxenye ethile yeBhayibheli nsuku zonke. Ngokunamathela ngokungagudluki esikhathini osimisile sokufunda iBhayibheli, ukulithanda kwakho iZwi likaNkulunkulu kuyokhula.—IHubo 119:97; 1 Petru 2:2.

Thandazela Ukuhlakanipha

Kuyavunywa, ngisho nabantu abalifunda njalo iBhayibheli bakuthola kunzima ukuqonda ezinye izingxenye zeZwi likaNkulunkulu. UMlobi weBhayibheli, uJehova uNkulunkulu, ufuna uliqonde iZwi lakhe. Incwadi yezEnzo isitshela ngesihambi saseTopiya esasingasiqondi ngokugcwele isiprofetho sika-Isaya isahluko 53. Le ndoda yayizimisele ukucela usizo, futhi ingelosi kaJehova yathumela isithunywa sevangeli uFiliphu ukuba siyoyichazela leso siprofetho.—IzEnzo 8:26-39.

Ngakho-ke, ukufunda iBhayibheli okuphumelelayo akuqali nhlobo ngokufunda, kodwa kuqala ngomthandazo. Abanye bakwenza umkhuba ukuthandaza kuJehova bacele ukuhlakanipha kokuqonda lokho abakufundayo futhi bakufake enhliziyweni, ngaphambi kokuba bavule amaBhayibheli abo. (2 Thimothewu 2:7; Jakobe 1:5) Umoya kaNkulunkulu ungase ukukhumbuze ngisho namavesi eBhayibheli ayokusiza ukuba uphendule imibuzo noma ukwazi ukubhekana novivinyo.

Enye insizwa engumKristu iyakhumbula: “Lapho ngineminyaka engu-12 ubudala, ubaba wasishiya ekhaya. Ngobunye ubusuku ngangithandaza ngisembhedeni, ngicela uJehova ukuba enze ubaba abuye. Ngabe sengithatha iBhayibheli lami ngafunda iHubo 10:14: ‘Othithibeleyo uyazinikela kuwe [Jehova]; wena ungumsizi wentandane.’ Ngathi ukuma kancane. Ngaba nomuzwa wokuthi uJehova ukhuluma nami futhi ungitshela ukuthi ungumsizi wami; unguBaba. Yimuphi ubaba ongcono engingaba naye odlula yena?”

Ingabe ungakwenza umkhuba ukuthandaza njalo lapho uhlala phansi ukuze ufunde iBhayibheli? U-Adrian uyasikisela: “Thandaza ngaphambi kokulifunda—nangemva kwako—ukuze ngempela kube ingxoxo yababili, wena noJehova.” Ukuthandaza ngokusuka enhliziyweni kuyogxilisa ukuzimisela kwakho ukunamathela esimisweni sakho sokufunda iBhayibheli futhi kuqinise ubuhlobo bakho noNkulunkulu.—Jakobe 4:8.

Kwenze Kuphile

UKimberly, ocashunwe ekuqaleni, wayelithola lingathakazelisi iBhayibheli. Yiqiniso, iBhayibheli liyincwadi endala kakhulu—eyabhalwa esikhathini eside ngaphambi kokusungulwa kwe-computer, ithelevishini noma indiza—futhi abantu okukhulunywa ngabo eBhayibhelini bafa ezinkulungwaneni zeminyaka ezidlule. Noma kunjalo, umphostoli uPawulu wabhala: “Izwi likaNkulunkulu liyaphila futhi linamandla.” (Heberu 4:12) Incwadi endala kangaka ingaba namandla kanjani?

Ezinsukwini zombhali u-Ezra, izinkulungwane zamadoda, abesifazane nabo “bonke ababenengqondo yokuzwa” babuthana ndawonye eJerusalema ukuzolalela ukufundwa koMthetho KaMose. Ngaleso sikhathi, uMthetho wawusuneminyaka engaphezu kweyinkulungwane ukhona! Kodwa u-Ezra nabasizi bakhe “bafunda encwadini, emthethweni kaNkulunkulu, bephumisela kahle; bachaza, babaqondisa okufundwayo.” Lapho la madoda echaza imiBhalo futhi efunda ngendlela enempilo, waba yini umphumela? “Abantu bonke bahamba ukuba badle, baphuze, bathumele izabelo, bajabule kakhulu, ngokuba babeqondile amazwi ababewazisiwe.”—Nehemiya 8:1-12.

Ungakwenza kanjani kube nenjongo ukufunda kwakho iBhayibheli? UCathy, okuthola kuyinselele ukufunda, ufunda ngokuzwakalayo ukuze agxilise ingqondo. UNicki uzama ukuzibeka esimweni salokho okulandiswayo. “Ngicabanga ngokuthi ngangiyozizwa kanjani ukuba ngangikuleso simo,” esho. “Indaba engiyithanda kakhulu ekaRuthe noNawomi. Ngingayifunda ngiphindelela. Ngesikhathi ngithuthela edolobheni elisha, ngathola induduzo kule ndaba ngoba ngangicabanga ukuthi kumelwe ukuba uRuthe wazizwa kanjani lapho eya endaweni angayazi nangazi muntu kuyo. Ngabona indlela amethemba ngayo uJehova, futhi kwangisiza ngempela ukuba nami ngenze njalo.”—Ruthe, izahluko 1-4.

Ukuze iBhayibheli libe ‘namandla,’ kudingeka uzindle ngalo. Njalo lapho ufunda, zinike isikhathi sokucabanga ngemibhalo oyifundayo futhi ucabange ukuthi ungakusebenzisa kanjani lokho okufundile. Ungase uthande ukubheka izinsiza-kufundisa zeBhayibheli ezinyatheliswa oFakazi BakaJehova ukuze ukufunda kwakho kucebise kakhudlwana.b

Phikelela!

Akulula ukunamathela esimisweni sokufunda iBhayibheli. Ngisho nohlelo oluhle lokufunda iBhayibheli kungadingeka lulungiswe ngezikhathi ezithile. Ungaphikelela kanjani emgomweni wakho wokufunda iBhayibheli nsuku zonke?

Abangane bakho nomkhaya bangakusiza. U-Amber oneminyaka engu-15 ubudala uthi: “Silala ekamelweni elilodwa nodadewethu. Ngobunye ubusuku ngikhathala ngibe yingcuba, kodwa udadewethu uyangikhumbuza ukuba ngifunde. Ngakho angikhohlwa!” Uma uthola umbhalo noma indima ethile ethakazelisayo, xoxa ngayo nabanye. Lokhu kuyokhulisa ukwazisa kwakho iZwi likaNkulunkulu futhi kungase kushukumise ngisho nesithakazelo sabo ekufundeni iBhayibheli. (Roma 1:11, 12) Uma weqiwa usuku noma ngaphezulu ungalifundi iBhayibheli, ungapheli amandla! Qhubeka lapho ugcine khona, futhi uzimisele kunanini ngaphambili ukunamathela esimisweni sakho.

Ungazikhohlwa izinzuzo ezicebile eziza ngokufunda iBhayibheli nsuku zonke. Ngokulalela uJehova ngeZwi lakhe, ungajabulela ubuhlobo obuseduze naye. Uyoqonda imicabango nemizwa yakhe. (IzAga 2:1-5) La maqiniso ayigugu avela kuBaba wethu wasezulwini ayoba yisivikelo. “Insizwa iyakuyihlanza kanjani indlela yayo na?” kubuza umhubi. “Ngokuqaphela okwezwi lakho.” (IHubo 119:9) Ngakho, qala—bese unamathela—esimisweni sokufunda iBhayibheli. Ungase ukuthole kuthakazelisa kakhulu kunalokho obukucabanga!

[Imibhalo yaphansi]

[Izithombe ekhasini 24]

Umthandazo nokucwaninga kuyothuthukisa ukufunda kwakho iBhayibheli futhi kukusize ukuba uthole incazelo yemiBhalo

[Isithombe ekhasini 25]

Ukuzibeka esimweni salokho okulandiswayo kuyokwenza imiBhalo iphile