Indlela Esasinda Ngayo Odakeni Olushisayo Lwentaba-mlilo!

NGUMLOBELI WE-PHAPHAMA! ECONGO (KINSHASA)

USUKU uLwesibili, ngo-January 15, 2002—kubonakala kuwusuku oluvamile e-Afrika Ephakathi. Ngafika nomunye woFakazi BakaJehova eGoma, eKivu, eCongo (Kinshasa), sizohlangana noFakazi besifunda saseGreat Lakes.

Ingabe Asikho Isizathu Sokukhathazeka?

Nakuba intaba-mlilo yaseNyiragongo (engamamitha angu-3 470 ukuphakama) iqhele ngamakhilomitha angu-19 ukusuka edolobheni laseGoma, okwakwenzeka kuyo kudonsa amehlo ethu.a Siyizwa ihlokoma futhi sibona umusi ufuquka. Kubantu bendawo, lokhu akusona isenzakalo esingavamile ngalesi sikhathi sonyaka, ngakho abakhathazekile neze.

Ntambama, siya emihlanganweni yamabandla amabili oFakazi BakaJehova. Sisakuzwa ukundindizela komhlaba nokuhlokoma kwentaba. Lokhu kubonakala kungaphazamisi muntu. Iziphathimandla zendawo zisaphikelela zitshela abantu ukuthi asikho isizathu sokukhathazeka. Nakuba sekuyizinyanga isazi sezintaba-mlilo saseCongo sibikezela ukuthi le ntaba izoqhuma, akekho osikholwayo. Omunye umngane usho encokola ethi, “Kusihlwa namuhla isibhakabhaka sizobe sibomvu tebhu ngenxa yentaba-mlilo.”

“Kufanele Siphume Siphele!”

Lapho siphindela endaweni esihlala kuyo, sitshelwa ngokucacile ukuthi: “Kumelwe siphume siphele!” Isimo sibucayi. Idolobha lisengozini enkulu. Izinto zishintsha ngokushesha! Ngaphambidlana besidingida indaba yokusebenzisa iGoma njengesikhungo sokuqondisa umsebenzi wokufakaza. Manje, kusihlwa, sitshelwa ukuba siphume sibaleke edolobheni, ngoba lisengozini yokuqothulwa!

Njengoba kuhwalala, isibhakabhaka siyashintsha sibe bomvu njengomlilo—futhi ngenxa yesizathu esizwakalayo! Udaka olushisayo olugeleza lusuka eNyiragongo lusondela edolobheni. Intaba ifana nembiza enkulu ebila ize ichitheke, njengoba udaka olushisayo luqothula konke okusendleleni yalo. Asikaze sipakishe amapotimende ethu ngokushesha okungakaya! Sekuzoshaya u-7:00 ntambama.

Izinkulungwane Ziyabaleka Emgwaqweni

Njengoba siphuma sibhuduzela, umgwaqo ophuma eGoma ugcwele izixuku zabantu ababalekayo ukuze bazisindise. Abaningi bahamba ngezinyawo, bethwele abangase bakwazi ukukuthwala. Abaningi bathwele impahla emakhanda. Abanye bagibele izimoto eziminyene. Bonke balibangise emngceleni waseRwanda oseduze. Kodwa-ke, intaba-mlilo ayiyihloniphi imingcele eyenziwe umuntu. Alikho ibutho elingama endleleni yayo! Sibona amasosha ekhungethwe ukwesaba njengoba ebaleka. Akuhambeki ngemoto emgwaqweni. Kumelwe sihambe ngezinyawo. Siphakathi kwalesi sixuku esiyaluzayo sabantu abangu-300 000—amadoda, abesifazane, izingane nezinsana—ababalekela intaba-mlilo. Umhlaba uyaqhubeka undindizela.

Yilowo nalowo ulwela ukusindisa ukuphila kwakhe. Mina nomngane wami, njengoba siyizihambi ezivela edolobheni elikhulu, siphakathi kwabo, siphelezelwa oFakazi abambalwa, abasinakekele. Ukuba khona kwabo nokusikhathalela kwabo okujulile kusithinta inhliziyo futhi kusenza sizizwe silondekile kulesi simo esibucayi nesibuhlungu. Abantu babaleka nalokho abangase bakwazi ukukuthwala—izingubo zokugqoka, izimbiza namapani, nokhweshe lokudla. Kulesi sinyokotho, abantu bayadudulana. Abanye bangqutshuzwa yizimoto ezizama ukudlula, okwenza imithwalo yabanye iwe futhi inyathelwe ngabanye. Maye kokhubeka awe. Amaphaphu aphezulu. Wonke umuntu unetwetwe. Sizama ukuya eGisenyi, engamakhilomitha ambalwa nje ukusuka eRwanda. Siyaqhubeka sibaleka ngokubhuduzela.

Ukulala Endaweni Elondekile

Sifika ehhotela, kodwa-ke sithola kungasenandawo yokulala. Kufanele saneliswe ukuhlala etafuleni ngaphandle. Kwenzeka lokhu nje sikhathele siyingcuba ngemva kwamahora amathathu nesigamu sibaleka. Siyajabula ngokuthi sisindile futhi sinabafowethu abangamaKristu abahambé nathi. Ngokujabulisayo, akekho noyedwa uFakazi ofile.

Kusobala ukuthi kuzodingeka silale ngaphandle. Njengoba sesikude siphephile, siyakwazi ukubona isibhakabhaka esibomvu njengomlilo phezu kwedolobha laseGoma. Siyakhanga futhi sihle! Kancane kancane kuqala ukuntwela. Ukuhlokoma nokundindizela komhlaba kuqhubeke ubusuku bonke. Lapho sibheka emuva ezenzakalweni ezinzima zangayizolo, siyayizwela imikhaya eyizinkulungwane enezingane ezincane okuye kwadingeka ibaleke.

Usizo Lufika Ngokushesha

OFakazi baseKigali, inhloko-dolobha yaseRwanda, bafika kithi emini ngoLwesihlanu, ngo-January 18. Ikomiti yosizo eyakhiwa abafowethu baseGoma nabaseGisenyi iqala ukusebenza. Umgomo wokuqala uwukuhlalisa oFakazi abangababaleki emaHholo OMbuso ayisithupha akule ndawo. Lokhu kwenziwa ngalo lolo suku. Kuhlonywa uphawu olubhalwe ngesiFulentshi nesiSwahili emgwaqweni, olubonisa indlela eya eHholo LoMbuso lendawo, lapho ababaleki bengasizwa khona bathole nenduduzo. Ngalo kanye lolo suku futhi, kufika amathani amathathu ezidingo eziyisisekelo emaHholo OMbuso lapho oFakazi behlaliswe khona. Ngakusasa, ngoMgqibelo, kufika iloli elivela eKigali lithwele ukudla, izingubo zokulala, oseyili bepulasitiki, insipho nemithi.

Ukukhathazeka Kuyanda

Lesi yisikhathi sokukhathazeka okujulile. Zinganakekelwa kanjani izidingo zabo bonke laba bantu? Kuthiwani ngentaba-mlilo? Kuyophela nini ukuqhuma kwayo? Ungakanani umonakalo owenzeke edolobheni laseGoma? Imibiko elokhu ifike njalo nokundindizela komhlaba okuqhubekayo akuniki themba. Ochwepheshe banovalo lokuthi umkhathi uzongcoliswa yizinga eliphakeme lomusi onobuthi. Banovalo nangokuthi amanzi eChibi laseKivu azongcola ngenxa yamakhemikhali.

Phakathi namahora angu-48 ngemva kwalokhu kuqhuma kwentaba-mlilo, sekusakazeke imibiko ephazamisayo. Khona-ke, ngoMgqibelo ntambama sizwa ukuthi abantu ababalelwa ku-10 000, kuhlanganise noFakazi abangu-8 kanye nomntwana, abakwazanga ukubaleka ngoba bezungezwe udaka olushisayo, olungamamitha amabili ukujula kwezinye izindawo. Kuvimbanise amagesi anobuthi. Sikhathazekile ngabo. Kubonakala lingekho ithemba. Ngisho nesakhiwo esikhulu sesonto laseGoma sibhidlike cishe ngokuphelele ngenxa yodaka olushisayo olugeleze njalo. Ngaleso sikhathi akekho ocabanga ukuthi iGoma iyovuka othuthwini.

Imibiko Eduduzayo

NgeSonto ngo-9:00 ekuseni, sithola ucingo oluvela komunye wabafowethu abazungezwe udaka olushisayo. Usitshela ukuthi sekunoshintsho. Isimo sesingcono. Izulu liyana, udaka seluyaphola, kanti nomoya uyacweba. Nakuba udaka lusashisa futhi luseyingozi, abantu sebeqala ukuwelela endaweni ephephile. Idolobha alicekelekanga phansi ngokuphelele.

Lezi yizindaba zokuqala ezijabulisayo kusukela kuqale lesi sigemegeme. Intaba-mlilo isithé ukudamba. Ochwepheshe abakuleyo ndawo bavela nemibiko engqubuzanayo. Siyakwazi ukuthintana nedolobha elingumakhelwane laseBukavu, elingalé kweChibi laseKivu. Sizwa kuthiwa imikhaya emihlanu, kanye nezingane ezintathu ebezihamba ngaphandle kwabazali, bafinyelele eBukavu ngesikebhe. OFakazi kulelo dolobha bazobanakekela.

Sesingaphindela Emuva!

NgoMsombuluko, ngo-January 21, siyakwazi ukukhuthaza nokududuza izisulu eziseGisenyi, nokuthola ukuthi yini eziyidingayo. Sithola ukuthi abafowethu abahlaliswe okwesikhashana emaHholo OMbuso ayisithupha bayahleleka. Sithola isibalo esiqondile sababalekile—abangu-1 800 kuhlanganise nezingane.

Kuthiwani ngekusasa? Iziphathimandla zendawo zihlela ukuvula amakamu ababaleki ngokushesha. Kodwa, kusebuhlungu kwabanye abantu ukukhumbula amakamu ababaleki avulwa ngemva kokuqothulwa kwesizwe ngo-1994. Sinquma ukubuyela eGoma, futhi sifika edolobheni sekuzoba semini. Cishe amaphesenti angu-25 alo acekeleke phansi. Sihamba odakeni oseluqinaqinile olugelezele emigwaqweni yedolobha. Kusafudumele, futhi umoya usagcwele amagesi aqubukayo. Abantu abaningi bazimisele ukubuyela edolobheni.

Ngo-1:00 ntambama, sihlangana nabadala abangamaKristu abangu-33 eHholo LoMbuso leBandla LaseGoma Center. Bonke bavumelana ngazwi-linye: Banquma ukubuyela eGoma. Bathi: “Imizi yethu ilapha.” Kuthiwani ngengozi uma kwenzeka intaba-mlilo iqhuma futhi? Bayaphendula: “Sesijwayele.” Banovalo lokuthi uma bengabuyi ngokushesha, kuzophangwa konke abanakho. Ngakusasa yonke imikhaya yoFakazi ebibalekile ibuyela eGoma. Isibalo esikhulu sabantu abangu-300 000 abebeqe umngcele naso sesibuyele edolobheni elithintekile.

Ngemva Kwesonto

Idolobha seliqalile futhi ukuphithizela. Kusobala ukuthi ngeke life. Ngokushesha kuqala umsebenzi wokuhlelemba udaka ngendlela ezovumela ukuba izingxenye ezimbili zedolobha ebezihlukanisiwe ziphinde zihlangane. Udaka lwacekela phansi konke okwakuphambi kwalo. Ingxenye yezitolo namahhovisi kahulumeni yacekeleka phansi. Kulinganiselwa ukuthi ingxenye yesithathu yomgwaqo wezindiza esikhumulweni yacekeleka phansi.

Izibalo ezinembile zibonisa ukuthi imikhaya engu-180 yoFakazi iphakathi kwabantu abalahlekelwa yikho konke nabangasenamakhaya. Ikomiti yosizo yenza amalungiselelo okusiza amadoda, abesifazane nezingane ababalelwa ku-5 000 ukuba bathole ukudla nsuku zonke. Oseyili bepulasitiki abanikelwé ngoFakazi BakaJehova baseBelgium, eFrance naseSwitzerland bazosetshenziselwa ukwakhela abantu abangenamakhaya amatende esikhashana, kanye nezindawo zokuhlangana zamabandla alinyalelwa noma abhidlikelwa amaHholo OMbuso awo. Eminye yemikhaya engenamakhaya izohlala noFakazi abanemizi engazange ithinteke, kanti eminye izohlaliswa kula matende esikhashana.

NgoLwesihlanu, ngo-January 25, izinsuku ezingaba yishumi ngemva kwalobo busuku benhlekelele, kunabangu-1 846 emhlanganweni oqhutshelwa egcekeni lesikole eGoma bezolalela inkulumo ekhuthazayo yemiBhalo. Abafowethu abaningi bazwakalisa ukubonga ngenduduzo nosizo olungokoqobo uJehova alunikeza ngenhlangano yakhe. Thina njengezivakashi sisithinta ngokujulile isibindi nokholo oluqinile oluboniswe abafowethu naphezu kwalezi zimo eziyinhlekelele. Phakathi nosizi olunjalo, akuve kujabulisa ukuba ingxenye yobuzalwane obunobunye ekukhulekeleni uNkulunkulu weqiniso, uJehova, uMthombo wenduduzo ehlala njalo!—IHubo 133:1; 2 Korinte 1:3-7.

[Umbhalo waphansi]

[Amabalazwe ekhasini 12, 13]

(Ukuze ubone ukuthi indaba ihlelwe kanjani, bheka encwadini)

Imigqa enemicibisholo ibonisa ukugeleza kodaka olushisayo

CONGO (KINSHASA)

INtaba yaseNyiragongo

↓ ↓ ↓

Isikhumulo sezindiza saseGoma ↓ ↓

↓ GOMA

↓ ↓

ICHIBI LASEKIVU

RWANDA

[Izithombe ekhasini 13]

Udaka oluncibilikayo lwaphoqelela amashumi ezinkulungwane zabantu ukuba babaleke edolobheni laseGoma

[Umthombo]

AP Photo/Sayyid Azim

[Izithombe ekhasini 14, 15]

Lingakapheli isonto oFakazi bahlela imihlangano yabo yobuKristu