Umbono WeBhayibheli

Ingabe UNkulunkulu Uyobushalazela Ubuthakathaka Bethu?

‘Angimubi mina! Sengizame ngazama ukuyeka izindlela zami ezimbi, kodwa angive ngibuthaka!’

INGABE wena noma othile omaziyo uzizwa ngale ndlela? Abaningi baphetha ngokuthi cishe akunakwenzeka ukulungisa isimilo esixegayo esesinezimpande. Abanye abantu abakwazi ukuphila ngaphandle kotshwala, ugwayi, noma izidakamizwa. Abantu abaningi babuswa ubugovu. Bese kuba nalabo abazinikele ekuziphatheni okubi kobulili, abama kwelokuthi ngeke bakwazi ukuphila ngaphandle kobulili.

Njengoba uMathewu 26:41 ebonisa, uJesu ngomusa wabonisa ukuthi uyabuqonda ubuthakathaka babantu.a Empeleni, lonke iBhayibheli liveza ngokucacile ukuthi uJehova uNkulunkulu noJesu banesihe ngempela kubantu. (IHubo 103:8, 9) Kodwa kufanele yini silindele ukuba uNkulunkulu akuzibe konke ukushiyeka kwethu?

UMose NoDavide

Cabanga ngendaba kaMose. Wayaziwa ngokuthi ‘umnene kunabo bonke abantu ababesebusweni bomhlaba,’ futhi wasebenza kanzima ukuze alondoloze leyo mfanelo enhle. (Numeri 12:3) Njengoba ama-Israyeli ayehamba ehlane, ayevame ukwenza izinto ezingenangqondo futhi angamhloniphi uNkulunkulu nabantu ababemmelele. Kukho konke lokhu, ngokuthobeka uMose wafuna isiqondiso saphezulu.—Numeri 16:12-14, 28-30.

Kodwa njengoba lolu hambo olude olukhathazayo lwase luzophela, wacasuka phambi kwaso sonke isizwe futhi wangabe esazilalela iziqondiso zikaNkulunkulu. UNkulunkulu wamthethelela, kodwa wasishalazela yini leso senzo? Cha. Wathi kuMose: “Njengokuba anikholwanga yimi . . . , aniyikungenisa leli bandla ezweni engibaniké lona.” UMose wayengeke esangena eZweni Lesithembiso. Ngemva kweminyaka engu-40 ezabalazela lelo lungelo elimangalisayo, iphutha lobuntu elingathí sina lamenza walahlekelwa.—Numeri 20:7-12.

INkosi uDavide ingomunye umuntu owayenobuthakathaka owayesaba uNkulunkulu. Wake wahlulwa inkanuko wabe eselala nomfazi wenye indoda. Ngemva kwalokho wazama ukugqiba lokho ngokwenza ukuba umyeni wakhe abulawe. (2 Samuweli 11:2-27) Kamuva wazisola kakhulu ngezenzo zakhe ezimbi, uNkulunkulu wabe esemthethelela. Kodwa uDavide wayechithe umuzi, futhi uJehova akazange amvikele ezinhlekeleleni ezimbi ezalandela. Umfana kaDavide wagula wabangwa nezibi, futhi uJehova akazange amsize naphezu kwemithandazo kaDavide ethandazela ingane yakhe. Lo mfanyana wafa, kwabe sekulandela izigemegeme zodwa emndenini kaDavide. (2 Samuweli 12:13-18; 18:33) UDavide walahlekelwa kakhulu ngenxa yokuxegelwa isimilo.

Lezi zibonelo zibonisa ukuthi uNkulunkulu wenza abantu balandise ngokuziphatha kwabo. Labo abafuna ukumkhonza kumelwe baqinise ingokomoya labo futhi babe amaKristu angcono. Ekhulwini lokuqala abaningi bakwenza lokho.

Ukulwa Nesono

Umphostoli uPawulu ubhekwa kufanele njengesibonelo somuntu owaphila ukuphila kobuKristu. Kodwa ubuwazi nje ukuthi wayehlale elwa nobuthakathaka bakhe? EyabaseRoma 7:18-25 iyichaza ngokucacile le mpi, noma lokhu ‘kulwa’ njengoba kusho ivesi 23. UPawulu walwa wangayeka ngoba wayazi ukuthi isono siyabelesela.—1 Korinte 9:26, 27.

Amalungu athile ebandla lobuKristu laseKorinte lasendulo ayekade ejwayele ukwenza izinto ezimbi. IBhayibheli lithi ayekade ‘eyizifebe, iziphingi, amadoda alala namadoda, amasela, abantu abahahayo, izidakwa.’ Kodwa libuye lithi ‘agezwa ahlanzeka.’ (1 Korinte 6:9-11) Kanjani? Ulwazi olunembile, ukuhlangana namaKristu kanye nomoya kaNkulunkulu kwawaqinisa ukuba ayeke imikhuba yawo emibi. Ekugcineni uNkulunkulu wathi alungile egameni likaKristu. Yebo, uNkulunkulu wawathethelela, ngokwenza kanjalo wawanika unembeza ohlanzekile.—IzEnzo 2:38; 3:19.

UPawulu kanye namaKristu aseKorinte abazange bakuthathe kancane ukuthambekela kwabo esonweni. Esikhundleni salokho, balwa nako futhi ngosizo lukaNkulunkulu bakunqoba. Labo bakhulekeli bekhulu lokuqala baba nesimilo naphezu kwendawo ababehlala kuyo nokuthambekela okubangelwa ukungapheleli. Thina-ke?

UNkulunkulu Ulindele Ukuba Silwe Nobuthakathaka Bethu

Uma silwa nobuthakathaka obuthile bungase bungapheli nya. Nakuba kungadingeki sehlulwe ukungapheleli kwethu, ngeke sikuqede. Kuveza ubuthakathaka obungalokhu businakashela. Noma kunjalo, akufanele sivume ukwehlulwa ubuthakathaka. (IHubo 119:11) Kungani kubaluleke kangaka lokhu?

Ngoba uNkulunkulu akavumi ukuba abantu baziphathe kabi bese belokhu bevika ngokuthi abaphelele. (Jude 4) UJehova ufuna abantu bahlanze ukuphila kwabo babe nesimilo. IBhayibheli lithi: “Yenyanyani okubi.” (Roma 12:9) Kungani uNkulunkulu esho amazwi aqatha kangaka?

Isizathu siwukuthi kuyingozi ukuvumela ubuthakathaka. “Noma yini umuntu ayihlwanyelayo, uyovuna yona futhi,” kusho iBhayibheli kweyabaseGalathiya 6:7. Labo abazivumela ukuba babe imilutha, bahahe futhi baziphathe kabi baye bavune isivuno esibi. Kodwa kunesizathu esibaluleke nakakhulu.

Isono siyamcasula uNkulunkulu. ‘Sisihlukanisa’ noJehova. (Isaya 59:2) Njengoba labo abenza isono bengeke bawuthole umusa wakhe, uyabanxusa: “Gezani, nihlanzeke . . . niyeke ukwenza okubi.”—Isaya 1:16.

UMdali wethu unothando futhi unesihe. “Akafisi ukuba noma ubani abhujiswe kodwa ufisa ukuba bonke bafinyelele ekuphendukeni.” (2 Petru 3:9) Ukuvumela ubuthakathaka busehlule njalo nje kusenza singawutholi umusa kaNkulunkulu. Njengoba uNkulunkulu engabushalazeli ubuthakathaka bethu, nathi akufanele sibushalazele.

[Umbhalo waphansi]