Ungabona Umklamo Othile Uma Ubheka Imvelo

LAPHO sizihambela emaphandleni, siye sibubone ubuhle bemvelo. Kungaba isixheke sezimbali, inyoni enombala omuhle, isizemazema somuthi omuhle, noma indawo enhle kakhulu. Abantu abaningi bathi ubuhle obunjalo benziwa uMdali noma uMklami oyiNgcweti.

Ungase ucabange ukuthi ososayensi kuphela abangabona imiklamo ewubuciko uma bebheka imvelo. Kodwa akudingeki uze ube nemishini yesayensi ephambili ukuze ubone imiklamo yemvelo. Kudingeka nje ube umuntu oqaphelayo, ukwazi ukubona izinto ngeso lengqondo, ukwazi nokubona into enhle neyakheke kahle. Kungase kudingeke uthi ukubhekisisa izinto ozijwayele mhlawumbe ongaze ungazinaka.

Omunye wemiklamo elula owezinto ezizungelezayo. Siye siwubone ezintweni esizijwayele ezenziwe umuntu njengentambo noma i-screw sokuvula ukhokho. Kodwa ungabona imiklamo ezungelezayo emihle nakakhulu emagobolondweni asolwandle noma ezithelweni zikaphayini. Futhi uma uwubukisisa phakathi nendawo ujikanelanga, uyawubona lo mklamo ozungelezayo. I-rose nolwembu nako kunayo imiklamo ezungelezayo nakuba ingabonakali kalula.

Ake ubukisise ulwembu. Okokuqala, isicabucabu sakha imicu eyinsika yolwembu, ethi ayifane nezinsimbi zesondo. Sibe sesiqala phakathi nendawo sihlanganise le micu ngomucu kasilika onamfukayo. Silokhu sizungeza sihlanganisa le micu luze luphele ulwembu. Lo mucu olokhu uzungeza yiwona owakha umklamo ozungelezayo.

Omunye umklamo wemvelo othakazelisayo owamachashazi afana namehlo. La machashazi atholakala ezindaweni ezingalindelekile neze—ezimpapheni zenyoni, emaphikweni ovemvane, noma ngisho nasemazengeni enhlanzi. Ososayensi basikisela ukuthi la machashazi angakhanga isilwane seduna, enze isilwane esinala machashazi sikwazi ukucashela esinye esifuna ukusihlasela, noma enze singanakwa uma singafuni. Cishe ipigogo ilona elidume kakhulu ngokubukisa ngala machashazi, futhi ukubukisa kwalo ukuze likhange eleduna kungesinye sezimangaliso zemvelo. Ubuhle bepigogo bamhlaba umxhwele kakhulu u-Alexander Omkhulu kangangokuthi wathi le nyoni ayivikelwe kuyo yonke indawo engaphansi kwakhe.

Isiyingi nembulunga nako kuyimiklamo ejwayelekile. Akwenzeki singakujabuleli ukubuka isiyingi esinombala osagolide selanga eseliyozilahla kunina noma inyanga egcwele enombala osasiliva. Izimbali eziningi zohlobo lwama-daisy zifana nelanga, ziphuzi phakathi nendawo bese zikhipha izimbali ezincane ezimibalabala. Phakathi nendawo kulezi zimbali ezisagolide ezitholakala yonke indawo kunompe oluningi oluheha izimvemvane kalula kuhle kwebhishi eliheha izivakashi.

Njengoba kulula ukufaka izinto eziningi entweni eyimbulunga, izithelo eziningi zivame ukuba yizimbulunga zishiyashiyane ngobukhulu nangemibala. Imibala yazo egqamile iheha izinyoni, ezibe sezisakaza imbewu njengoba zidla kamnandi.

Izinto ezizungelezayo, amachashazi afana namehlo, iziyingi nezimbulunga zimane nje ziyizibonelo ezimbalwa zemiklamo eminingi etholakala emvelweni. Nakuba eminye yenzelwe injongo ethile, eminye yenzelwe ukuhlobisa noma ukucasha. Kungakhathaliseki ukuthi yenzelweni, yicinge futhi ukujabulele ukuyibuka.

[Isithombe esigcwele ikhasi 23]