Sathola Okuthile Okungcono

NJENGOBA ILANDISWA NGUFRANCIS DEL ROSARIO DE PÁEZ

Ngo-1988 mina nabafowethu kanye namanye amaqembu omculo, sacula phambi kwezinkulungwane zezihlwele eMadison Square Garden eNew York City. Iqembu lethu elalihlanganisa nomdanso wami, lamukelwa ngomdlandla. Ubaba wayesivulele ithuba lentuthuko kusukela sisebancane.

NJENGOBA ubaba naye ayengumculi, wabona ukuthi abafowethu abangu-7 banesiphiwo somculo. Ngakho wadayisa indlu yakithi wathenga izinsimbi zokudlala umculo kanye nezinto ezidingekayo ezazizobasiza ukuba baqale iqembu lomculo. Ngangisemncane ngaleso sikhathi, ngoba ngangizalwe nje eminyakeni embalwa ngaphambi kwalokho, ngo-1966. Ngaleso sikhathi, umkhaya wakithi wawuhlala edolobheni laseHigüey eDominican Republic.

Abafowethu bacula okukuqala ngqa phambi kwezihlwele ngo-1978 ehholo ledolobha laseHigüey. Ngemva kwalokho bacula enhloko-dolobha, iSanto Domingo. Baqala ukucula umculo we-merengue ngendlela ehlukile futhi entsha, ngenxa yalokho, udumo lwabo lwasakazeka.a Iqembu labo laqala ukwaziwa ngokuthi i-Los Hermanos Rosario (Izelamani ZakwaRosario).

Ngenxa yokuthi ngangilokhu nginesifiso sokuba umdansi odumile, ngangifuna ukuzihlanganisa nabafowethu. Komunye umbuthano umfowethu uPepe owayengumholi weqembu wangicela ukuba ngidanse, ethi: “UFrancis omunye wodadewethu abancane, uthunjana, uyakwazi ukudansa.” Umdanso wami wabahlaba umxhwele labo ababekhona. Ngalisebenzisa leli thuba, ngatshela uPepe ukuthi ngifuna ukudansa phambili eqenjini. Ngakho lapho ngineminyaka engu-16 ngaqala ukudansa njalo lapho i-Los Hermanos Rosario icula.

Impumelelo Kulo Msebenzi

Ngaphambi kwalokhu, amaqembu e-merengue ayenabo abaculi besifazane, kodwa kwakungakaze kube nowesifazane odansa phambili eqenjini lomculo lamadoda. Ngangihlela indlela yami yokudansa, ngisebenzisa indlela entsha ehambisana nokuhlelwa kwe-merengue. Lapho indlela yami yokudansa isidumile, yabizwa ngokuthi i-lo Francis Rosario.

Sasinengoma ye-merengue ebizwa ngokuthi i-“Cumandé,” ngokwengxenye eyayinamagama athi: “Y ahora todo el mundo como Francis Rosario” (Manje nonke dansani njengoFrancis Rosario). Ngemva kwalokho abantu babelingisa indlela yami yokudansa. Ngezinye izikhathi babehlala phansi bangibuke kunokuba badanse nami. Ngokuhamba kwesikhathi, kwakusetshenziswa isithombe sami ukukhangisa iqembu lethu lapho lizocula. Wonke umuntu wayazi ukuthi isikhangiso esinesithombe sami sasisho ukuthi kuzobe kunekhonsathi ye-Los Hermanos Rosario.

Ngemva kokuba sengiqale ukucula nabafowethu, kwanezelwa abanye abaculi eqenjini, abathathu kubo okwakungabakwaPáez. Omunye wabo wayengumdlali wecilongo ogama lakhe linguRoberto, owaba umyeni wami ngokuhamba kwesikhathi. Izinsizwa zakwaPáez zaqala ukuhlanganyela empumelelweni yeqembu. I-Los Hermanos Rosario yaqala ukumenywa ukuba icule kuthelevishini eSanto Domingo, kanye nokuba iyokwenza amakhonsathi kwamanye amazwe.

Ngo-1988 sahamba sayocula e-United States naseCanada. Enye indawo esacula kuyo iMadison Square Garden engikhulume ngayo ekuqaleni. Iningi lamaqembu adumile e-merengue laba nengxenye lapho, futhi iqembu lethu lamukelwa ngelikhulu isasasa kunamanye. Ngenxa yalokho, abahleli bamakhonsathi base besifaka ekugcineni njalo ohlelweni. Umdanso wami wawusuthandwa futhi nabalandeli beqembu i-Los Hermanos Rosario baya ngokuya banda kakhulu kunangaphambili. Ukudayiswa kwamarekhodi ethu kwakhula ngokumangalisayo.

Sahamba kakhulu, saya eColombia, e-Ecuador, ePanama, ePuerto Rico, eCuraçao, eSpain, eJalimane nakwamanye amazwe. Ngokushesha saba elinye lamaqembu omculo ahlonishwayo eLatin America. Umdanso, ukuba phambi kwezihlwele, izembatho kanye nezimonyo, konke lokhu kwaba izinto ezibaluleke kakhulu empilweni yami.

Lapho ngingakashadi ngangithi uma indoda ingithanda kodwa ingakuthandi ukudansa ngiyoyeka yona kunokuba ngiyeke ukudansa. Nokho, isimo sami sengqondo ngokuphathelene nezinto ezibaluleke kakhulu ekuphileni kwami sase sizoshintsha.

Ukubona Ukubaluleka Kwezinto Ezingokomoya

Lolu shintsho lwaqala lapho sihambele eCanary Islands ngo-1991. Mina noRoberto sasisanda kushada. Umfowabo uFreddy, owayeyilungu leqembu, wayeseqale ukufunda iBhayibheli noFakazi BakaJehova futhi wayehlale enezincwadi zabo.

Ngelinye ilanga ngabona incwadi ethi Ungaphila Phakade EPharadesi Emhlabeni ekamelweni likaFreddy, futhi ngaqala ukuyifunda. Ngakhangwa isahluko esithi “‘Isihogo’—Ingabe Sikhona Ngempela?” Sangikhanga ngoba umama wayethe umuntu owenza izinto ezimbi uyosha esihogweni. Ngakho ngangesaba ukuya kuso.

Ngemva kwamasonto ambalwa, siseseCanary Islands ngaphuphunyelwa yisisu. Lapho bengiyisa esibhedlela ngacela uRoberto ukuba angicelele incwadi kuFreddy engangiyibone ekamelweni lakhe. Ngangifuna ukuyifunda njengoba ngisalulama esibhedlela. Ngayithanda le ncwadi. Enye yezinto engazifunda ukuthi isihogo siyithuna nje elivamile lesintu nokuthi kwakungakaze kube inhloso kaNkulunkulu ukuhlukumeza abantu. (Jeremiya 7:31) Kwangihlaba umxhwele ukuthi iBhayibheli lifundisa ukuthi abafileyo abazi lutho nhlobo.—UmShumayeli 9:5, 10.

Lapho siphindela eDominican Republic, uFreddy wathumela omunye woFakazi BakaJehova ukuba asivakashele. Wasifundisa ngethemba elithenjiswe eBhayibhelini lokuphila okuphakade, futhi lokho kwavusa isithakazelo kumyeni wami. (IHubo 37:29; Luka 23:43) Sacela isifundo seBhayibheli.

Ushintsho Lwezindinganiso Nezinto Ezibalulekile

Njengoba ngangithuthuka olwazini lweBhayibheli, umbono wami ngomsebenzi engangiwuthanda kakhulu waqala ukushintsha. Izimiso zeBhayibheli zaqala ukulolonga ukucabanga kwami. (Roma 12:2) Ngangizibuza: ‘Ngingadansa kanjani ngale ndlela bonke laba bantu bengibuka? Akukhona lokhu engikufunayo.’ Ngathandaza kuNkulunkulu, “Ngicela ungikhiphe kulesi simo.” Ngakhuluma nomyeni wami ngomuzwa enganginawo futhi naye wayezizwa ngendlela efanayo. Wathi: “Bekezela S’thandwa. Akuqale wena ushiye iqembu, mina ngizolandela.”

Ngaphinde ngakhulelwa, futhi ngenxa yokuthi lokho kwanciphisa ukudansa kwami, ngakhululeka ukuba ngihlanganyele ngokwengeziwe emihlanganweni yobuKristu eHholo LoMbuso. Le mihlangano yasiqinisa mina noRoberto, yasenza ukuba silazise kakhulu igugu lokuhlangana ndawonye njengabantu bakaJehova. Saqonda ukuthi ukuze siqhubeke sithuthuka eqinisweni leBhayibheli, sidinga isiqondiso nesikhuthazo esinikezwa yimihlangano yobuKristu. (Hebheru 10:24, 25) Ngisho nalapho sisebenza ngaphandle kwaseDominican Republic, mina noRoberto sasilifuna iHholo LoMbuso futhi sihlanganyele emihlanganweni.

Ngemva kokubeletha, ngaphindela emsebenzini, kodwa ngase ngiphelelwe isithakazelo sawo. Ushintsho lwabonakala, futhi nabezindaba baqala ukungigxeka. Babevame ukungibuza, “Kungani ungasadansi ngendlela owawudansa ngayo kuqala?” Ngaqhubeka ngithandaza kuJehova ukuba angikhiphe kulesi simo ukuze ngingabi nezinkinga nabafowethu. Ngase ngingomunye wabanikazi beqembu, futhi ngangingafuni ukuxabana nabafowethu.

Lapho ngiphinda ngikhulelwa futhi, ngatshela uRafa, owaba ngumqondisi weqembu ngemva kokushona komfowethu uPepe, ukuthi ngifuna ukuchitha isikhathi esengeziwe nabantwana bami nokuthi ngeke ngisabuyela emsebenzini. Wathi angenze lokho engicabanga ukuthi kungcono. Akekho kubafowethu owake waphikisa ukufunda kwami iBhayibheli. Ngiyabonga kakhulu ngalokho.

Impilo Entsha Yokukhonza UJehova

Ngo-1993, ngemva kweminyaka eyishumi ngineqembu, ngawuyeka umsebenzi wami wokudansa futhi ngazinikezela kuJehova ngokungazigodli. Ngaba ummemezeli wezindaba ezinhle zoMbuso kaNkulunkulu, futhi ngemva kokushiya kukaRoberto iqembu, sabhapathizwa ngo-1994. (Mathewu 24:14) UFreddy kanye nomunye umfowabo kaRoberto, uJulio, baba oFakazi, kanjalo noManuel Pérez, elinye ilungu leqembu. Kuze kube namuhla basakhulekela uJehova ngobuqotho.

Abantu abaningi babengaqondi ukuthi kungani ngashiya umsebenzi wezokuzijabulisa ngoba ngangiwujabulela kakhulu. Abanye babenomuzwa ofana nowomdidiyeli wezinhlelo zethelevishini ezweni lakithi, wokuthi ngangibhekene nesimo esithile nje esasizodlula ngokushesha. Wabikezela: “Njengabanye nje kwezokuzijabulisa, uzodlula kulesi simo aphindele eqenjini.” Kodwa lokho akuzange kwenzeke. Ngangizimisele ukuzinikela ngokugcwele ngangokunokwenzeka ekukhonzeni uJehova.

Sinabantwana abathathu manje: uKatty noRoberto kanye no-Obed. Siyazama ukubafundisa ukuthi izinto ezingokomoya zibaluleke kakhulu kunezingokwenyama ekuphileni. Sisesimweni esikahle sokubaxwayisa ngethonya elidukisayo lezwe futhi sibanike isiqondiso esihluzekile ekuphileni. Isifundo somkhaya seBhayibheli samasonto onke siye sazuzisa kakhulu, sisisiza ukuba sihlale simunye ezweni lapho imikhaya iya ngokuya ihlukana.

Siye sazama ukufundisa abantwana bethu ukuba babheke uJehova njengomuntu ongokoqobo futhi abangamethemba. (IzAga 3:5, 6; Hebheru 11:27) Siye sababonisa ukubaluleka kokuhlanganyela nokuba nengxenye emihlanganweni yobuKristu. Ukubona abantwana bekhula ngokuvumelana namaqiniso eBhayibheli kuyisipho esiyigugu. Sekuyiminyaka emibili ngikhonza njengephayona elisizayo, inkulumo oFakazi BakaJehova abayisebenzisela ukuchaza abantu abasebenza amahora angu-50 noma ngaphezulu inyanga ngayinye bekhuluma nabanye ngezinkolelo zabo ezisekelwe eBhayibhelini. Umyeni wami usekhonze njengomdala iminyaka eminingi ebandleni lobuKristu.

I-merengue ngisayibheka njengamdanso omuhle. Kodwa ngokudabukisayo, lo mdanso namuhla usuhluke kakhulu kulokho owawuyikho esikhathini esidlule. Ngokujwayelekile, kwakuwumdanso ohloniphekile. Manje, ukuze sithole umculo we-merengue owakhayo, sekufanele sikhethe ngokucophelela okukhulu.

Ukuvelela Kokukhonza UJehova

Izwe linikeza izinto eziningi, kodwa umuntu kumelwe abheke izimo ezihilelekile kulokhu. Lokhu kuyiqiniso ngokuphathelene nomkhakha wezomculo, obonakala ngaphandle ukhanga futhi ungenangozi. Kodwa akunjalo. Abaningi kulo msebenzi badla izidakamizwa futhi baziphatha ngokuxekethile. Ukucula ekhonsathini kwenza umuntu abe nobuhlobo nabantu abakholelwa ukuthi kumelwe baphilele injabulo yangaleso sikhathi ngaphandle kokucabanga ngemiphumela yalokho, futhi abangenawo nhlobo unembeza.––1 Korinte 15:33.

Siye sabona ukuthi into engcono kakhulu kunazo zonke ukukhonza uJehova. Ngikhumbula ngibuyela ehhotela ngemva kwenye yamakhonsathi ethu amakhulu, nginomuzwa wokuthi ukuphila akunanjongo. Manje sengiyazi ukuthi lokho kwakubangelwa ukuthi sasingasenelisi isidingo sethu esibaluleke kakhulu, isidingo esingokomoya.—Mathewu 5:3.

Umgomo wethu manje uwukujabulisa uMdali wethu, ikakhulukazi ngokushumayela nangokufundisa ngezindaba ezinhle zoMbuso. (Mathewu 24:14; IzEnzo 20:35) Ukwenza lokhu kwenza umkhaya wethu ujabule futhi waneliseke. Siyathokoza kakhulu ngokuba phakathi kwabantu bakaNkulunkulu nokuba nabangane bangempela—abafowethu nodadewethu okholweni—esihlanganyela nabo ithemba eliyingqayizivele lokuphila okuphakade ezweni elisha likaNkulunkulu.—Marku 10:29, 30; 2 Petru 3:13; IsAmbulo 21:3, 4.

Sasithola imali eningi kakhulu kwezokuzijabulisa. Kodwa ngokwazi uNkulunkulu, uJehova, siye sathola umcebo ongokomoya ongcono kakhulu kunanoma iyiphi ingcebo engokwenyama. Siyajabula kakhulu ngokuthi siyakwazi ukukhonza uNkulunkulu wenjongo, uNkulunkulu ojabulayo osimema ukuba sithembele kuye! (IHubo 37:3) Siyaqiniseka ukuthi siye sathola into engcono kakhulu kunodumo nengcebo engokwenyama, futhi sithandazela ukuba uJehova asisize nomkhaya wethu ukuba senze intando yakhe kuze kube phakade.

[Umbhalo waphansi]

[Isithombe ekhasini 29]

Nginamanye amalungu eqembu lethu lapho ngisaqala

[Isithombe ekhasini 29]

Sicula eNew York City, cishe ngo-1990

[Isithombe ekhasini 31]

Siphambi kweHholo LoMbuso

[Isithombe ekhasini 31]

Isithombe esiphakathi: Kuqhubeka isifundo seBhayibheli somkhaya