Umbono WeBhayibheli

Ingabe Izinkinga Onazo Ziyisijeziso SikaNkulunkulu?

“Nginomuzwa wokuthi ngiyajeziswa,” kusho owesifazane omaphakathi neminyaka yawo-50 ubudala ngemva kokuzwa ukuthi unomdlavuza. Ecabanga ngobubi abenza eminyakeni eminingi ngaphambi kwalokho, uphetha ngokuthi, “Kumelwe ukuba lena indlela kaNkulunkulu yokungitshela ukuthi ngona.”

LAPHO bebhekene nezinkinga, abantu abaningi baba nomuzwa wokuthi uNkulunkulu ubajezisela okuthile okubi abakwenza esikhathini esidlule. Njengoba bekhungethwe yizinkinga, bangase bazwakale bethi: “Kungani kwehlela mina? Ngenzeni kangaka?” Ingabe kufanele siphethe ngokuthi izinkinga zethu ziwuphawu lokungamukeleki kuNkulunkulu? Ingabe izinkinga esinazo ziyisijeziso sikaNkulunkulu ngempela?

Abakhulekeli Abathembekile Bábhekana Nobunzima

Cabangela lokho okubikwa yiBhayibheli ngendoda okuthiwa uJobe. Kungazelelwe, yalahlekelwa ingcebo yayo. Ngokulandelayo, zonke izingane zayo eziyishumi zabulawa yisiphepho. Ngokushesha ngemva kwalokho, yahlaselwa isifo esibi esiwohloza umzimba. (Jobe 1:13-19; 2:7, 8) Izinkinga ezinjalo zakhalisa uJobe: “Isandla sikaNkulunkulu singishayile.” (Jobe 19:21, Today’s English Version) Cishe njengabaningi namuhla, uJobe wayenomuzwa wokuthi ujeziswa uNkulunkulu.

Nokho, iBhayibheli lembula ukuthi ngaphambi kokuba kuqale ukuvivinywa kukaJobe, uNkulunkulu ngokwakhe wayemchaze ngokuthi “umuntu ongasoleki futhi oqotho, owesaba uNkulunkulu futhi okugwemayo okubi.” (Jobe 1:8) Ngenxa yala mazwi abonisa ukuthi uNkulunkulu wayemamukela uJobe, kusobala ukuthi izinkinga zakhe zazingesona isijeziso esivela kuNkulunkulu.

Iqiniso liwukuthi iBhayibheli lilandisa ngabantu abaningi abaqotho ababhekana nezinkinga. Nakuba uJosefa ayeyinceku kaNkulunkulu eqotho, kwaphela iminyaka eboshwe ngokungafanele. (Genesise 39:10-20; 40:15) UmKristu othembekile uThimothewu wayehlushwa ‘ukugula kaningi.’ (1 Thimothewu 5:23) Ngisho noJesu Kristu, ongazange akwenze okungalungile, waphathwa ngonya ngaphambi kokuba abulawe ngesihluku. (1 Petru 2:21-24) Ngakho, kuyiphutha ukuphetha ngokuthi izinkinga ziwukubonakaliswa kokungathokozi kukaNkulunkulu. Kodwa uma kungeyena uNkulunkulu obangela izinkinga, ubani-ke, uma ekhona?

Izimbangela Zezinkinga Zethu

IBhayibheli libonisa ukuthi usizi lukaJobe lwalubangelwa uSathane uDeveli. (Jobe 1:7-12; 2:3-8) Ngaphezu kwalokho, libonisa ukuthi uSathane uwumthombo oyinhloko wezinkinga zethu namuhla uma lithi: “Mayé ngomhlaba nangolwandle, ngoba uDeveli wehlele kini, ethukuthele kakhulu, azi ukuthi unesikhathi esifushane.” (IsAmbulo 12:12) ‘Njengombusi waleli zwe,’ uSathane uye wathonya abaningi ukuba benze izenzo ezimbi eziye zabangela usizi olukhulu nobuhlungu.—Johane 12:31; IHubo 37:12, 14.a

Nokho, akufanele sisheshe sisole uDeveli ngazo zonke izinkinga esibhekana nazo. Ngenxa yesono nokungapheleli esakuzuza njengefa, sithambekele ekwenzeni izinqumo ezingahlakaniphile ezingasibangela izinkinga. (IHubo 51:5; Roma 5:12) Ngokwesibonelo, cabanga ngomuntu onquma ngamabomu ukuba angadli ngendlela efanele noma angaphumuli ngokwanele. Uma lokhu kugcina kubangele izinkinga ezinkulu zempilo, ingabe kufanele asole uDeveli? Cha, lo muntu umane uvuna imiphumela emibi yesinqumo sakhe esiyiphutha. (Galathiya 6:7) Esimweni esinjalo, kuba njengoba isaga seBhayibheli sisho: “Ubuwula bomuntu uqobo obona ukuphila kwakhe.”—IzAga 19:3, The New English Bible.

Ekugcineni, kumelwe siqaphele ukuthi izinto eziningi ezingajabulisi esibhekana nazo zimane ziwumphumela ‘wesikhathi nesenzakalo esingalindelekile.’ (UmShumayeli 9:11) Cabanga ngomuntu ozithela emvuleni enesiphepho. Ukuthi uzonethwa kancane noma kakhulu kungase kuxhomeke nje ekutheni umi kuphi njengoba liqala ukuna. Ngokufanayo, kulezi ‘zikhathi ezibucayi okunzima ukubhekana nazo,’ izimo ezingezinhle zingaphenduka izinkinga ezimbi ngokushesha. (2 Thimothewu 3:1-5) Ukuthi sithinteka kangakanani ngabanye ngokuvamile kuyindaba yesikhathi nezimo, esingase singakwazi nhlobo ukuzilawula. Ingabe lokhu kusho ukuthi siyohlale sinezinkinga?

Zonke Izinkinga Zizophela Maduzane

Ngokujabulisayo, uJehova uNkulunkulu uzoqeda zonke izinkinga maduzane. (Isaya 25:8; IsAmbulo 1:3; 21:3, 4) Okwamanje, ubonisa ukuthi uyasikhathalela ngempela ngokusinikeza ‘imfundo’ kanye ‘nenduduzo evela emiBhalweni’ ukuze sikwazi ukubhekana nezinkinga manje kuyilapho sibheke phambili kulelo kusasa elimangalisayo eliseduze. (Roma 15:4; 1 Petru 5:7) Ngaleso sikhathi, labo abaqotho phambi kukaNkulunkulu bayojabulela ukuphila okuphakade ezweni elisha, bengenazo nhlobo izinkinga.—IHubo 37:29, 37.

[Umbhalo waphansi]

WAKE WAZIBUZA?

◼ Ingabe abenzi bokubi kuphela ababhekana nezinkinga?—Jobe 1:8.

◼ Ingabe zonke izinkinga zethu zibangela uDeveli?—Galathiya 6:7.

◼ Ingabe izinkinga ziyohlale zikhona?—IsAmbulo 21:3, 4.

[Amazwi acashunwe esihlokweni ekhasini 29]

“Isikhathi nesenzakalo esingalindelekile sibehlela bonke.”—UmShumayeli 9:11