Okwangikhanga NgoFakazi BakaJehova

NJENGOBA ILANDISWA NGUTOMÁS OROSCO

Ngosuku lokuqala engaya ngalo emhlanganweni woFakazi BakaJehova eHholo LoMbuso labo, kwakunomfanyana owayenikeza inkulumo. Nakuba ayemfushane, indlela ayemi ngayo nekhono lakhe lokukhuluma lalimangalisa. Ngahlabeka umxhwele ngempela.

NGANGIBONA ukuthi bonke abakhona babelalelisisile. Njengoba ngangike ngaba usomaqhinga webutho lezempi laseBolivia e-United States, ngaba umkhuzi wamasosha, nomsizi kamongameli, ngangikujwayele ukuhlonishwa. Kodwa inhlonipho eyanikwa le ngane yangenza ngacabanga kabusha ngemigomo yami ekuphileni.

Ubaba washona phakathi nawo-1930, eMpini yaseChaco eyayiphakathi kweParaguay neBolivia. Ngokushesha ngemva kwalokho, ngathunyelwa esikoleni samaKatolika. Kwase kuyiminyaka eminingi ngiya eMiseni nsuku zonke, lapho sasicula khona amaculo esonto, silalele ukufundwa kwekhathekhizimu futhi sisho nemithandazo esiyibambe ngekhanda. Ngaze ngaba ngisho nayisikhonzi sase-altare futhi ngacula nasekhwayeni. Kodwa ngangingalifundi iBhayibheli; empeleni ngangingakaze ngilibone.

Ngangizijabulela izinsuku ezingcwele zenkolo ngoba zaziba njengephathi, futhi ngangilujabulela lolo shintsho lwesikhashana. Kodwa abapristi nabanye abafundisa ngenkolo babenokhahlo. Kunokuba ngibathande, ngangingabacasukela. Nganginomuzwa wokuthi ngase nganele yinkolo.

Ngakhangwa Ukuhleleka Ebusosheni

Ngolunye usuku libalele, izinsizwa ezimbili ezingamasosha ezazigqoke kahle zafika edolobheni lakithi, iTarija. Zazizophumula zisuka eLa Paz, inhloko-dolobha yaseBolivia. Zazihamba edolobheni ngokukhulu ukuzethemba nangesizotha. Yangihlaba umxhwele indlela ezazihlonipheke ngayo, zihlanzekile futhi zibukeka zinesizotha. Zazigqoke iyunifomu eluhlaza nezigqoko ezinensimbi ecwebezelayo. Nganquma ukuba yisosha ngaso leso sikhathi. Ngangicabanga ukuthi ukuphila kwazo kugcwele okuhlangenwe nakho nezenzo ezinhle.

Ngo-1949, lapho ngineminyaka engu-16, ngamukelwa ekolishi lobusosha eBolivia. Umfowethu omdala owayengiphelezela wama nami emgqeni omude wezinsizwa owawufika esangweni lezindlu zamasosha. Wangethula kumholi webutho lezempi, wamcela ukuba angiphathe kahle. Wabe esengikhulumela kuye. Lapho esehambile, ngabingelelwa ngendlela okubingelelwa ngayo amasosha amasha. Ngashaywa ngawa, ngabe sengitshelwa ukuthi, “Sizoke sibone-ke ukuthi ubani ozokukhulumela lapha!” Lena yindlela engaqala ngayo ukubona impatho nokwesatshiswa kwasebusosheni. Nokho ngabekezela nakuba ngangiphoxekile.

Ngokuhamba kwesikhathi, ngafunda ukuthi kulwiwa kanjani futhi ngaba yisosha elihlonishwayo. Kodwa kulokho engabhekana nakho, ngafunda ukuthi ukubukeka kwesosha kwangaphandle okuhlanzekile nokunesithunzi kungakhohlisa.

Ukufinyelela Isikhundla Esiphakeme

Lapho ngiqala umsebenzi wami, ngaqeqeshwa emkhunjini wempi weButho Lase-Argentina i-General Belgrano, owawukwazi ukuthwala abantu abangaphezu kwenkulungwane. Ngaphambi kweMpi Yezwe II, lo mkhumbi owawusinde ngo-1941 lapho amaJapane ehlasela iPearl Harbor, eHawaii, wawukade ungowase-United States futhi ubizwa ngokuthi i-USS Phoenix.

Ngokuhamba kwesikhathi, ngakhushulelwa esikhundleni sokuba umkhuzi wesibili eButhweni Lasemanzini LaseBolivia, elalihambahamba ezindaweni zamanzi ezazakha amaphethelo eBolivia. Lezi zindawo zazihlanganisa imifula ese-Amazon Basin, kanye nechibi elikhulu kunawo wonke emhlabeni, iLake Titicaca.

Phakathi naleso sikhathi, ngo-May 1980, ngakhethwa ukuba ngibe omunye wokhomishani bosomaqhinga bebutho elathunyelwa eWashington, D.C., inhloko-dolobha ye-United States. Kwakhethwa isosha elihamba phambili emkhakheni ngamunye wenkonzo—ebuthweni lempi, ebuthweni lezomoya nelasemanzini—futhi ngamiswa njengomxhumanisi walelo qembu ngenxa yeminyaka engase nginayo ngiyisosha. Ngahlala e-United States iminyaka engaba mibili futhi kamuva ngaba umsizi kamongameli waseBolivia.

Njengomkhuzi wempi, ngangiphoqelekile ukuya esontweni njalo ngeSonto. Ukuzibandakanya empini nasekuvukeleni kwabefundisi bempi nabapristi, kwangenza ngadumala kakhulu ngenkolo. Ngangazi ukuthi akulungile ukuba amasonto asekele ukuchitheka kwegazi ngale ndlela. Kodwa, kunokuba ukuzenzisa okunjalo kungenze ngiyilahle inkolo, kwangenza ngafuna iqiniso elingokomoya. Ngangingakaze ngilifunde iBhayibheli, ngakho ngaqala ukulifunda ngezikhathi ezithile ngifunda noma imuphi umBhalo.

Ukuhleleka EHholo LoMbuso

Ngamangala lapho umkami uManuela, eqala ukufunda iBhayibheli nomunye woFakazi BakaJehova, uJanet owayeyisithunywa sevangeli. Kamuva, uManuela waqala ukuya emihlanganweni eHholo LoMbuso, indawo yabo yokukhulekela. Kwakungangikhathazi ukumyisa khona, kodwa mina ngangingafuni ukungena. Ngangicabanga ukuthi kunomsindo nabantu abavukwa amadlingozi.

Ngelinye ilanga uManuela wangibuza ukuthi ngingathanda yini ukuvakashelwa umyeni kaJanet. Ngaqale ngenqaba. Kamuva ngaba nomuzwa wokuthi ngoba ngiqeqeshiwe kwezenkolo, ngizokwazi ukuphikisa noma yini ayishoyo. Lapho ngiqala ukubonana no-Ian, isimo sakhe sangihlaba umxhwele—hhayi ngokukhethekile lokho akusho. Akazange azame ukungilulaza ngokuveza ulwazi nokuqeqeshwa kwakhe ngeBhayibheli. Kunalokho, wayenomusa futhi ehlonipha.

Ngesonto elilandelayo, nganquma ukuya eHholo LoMbuso, njengoba ngishilo ekuqaleni, ngezwa umfanyana ekhuluma. Njengoba ngangimlalele efunda futhi echaza amavesi encwadi yeBhayibheli ka-Isaya, ngavele ngabona ukuthi sengiyitholile inhlangano eyingqayizivele. Kuyisimanga ukuthi lapho ngisemusha, ngangifuna ukuba yisosha elihlonishwayo, kodwa manje ngase ngifuna ukufana nomfana omncane futhi nginikeze iseluleko esisekelwe eBhayibhelini. Kwaba sengathi inhliziyo yami isivele yathamba futhi yalemukela iqiniso.

Njengoba isikhathi siqhubeka, ngahlatshwa umxhwele nawukugcina isikhathi koFakazi nendlela enenhlonipho ababengibingelela ngayo futhi bengenza ngikhululeke. Ukuhlanzeka nokugqoka kwabo kahle nakho kwangihlaba umxhwele. Engakuthanda kakhulu kwakuwukuhleleka kwemihlangano—uma kuhlelwe inkulumo ethile, yilokho kanye ozokuzwa ngalelo langa. Ngaqonda ukuthi lokhu kwakuwukuhleleka okusekelwe othandweni, hhayi ekusatshisweni.

Ngemva komhlangano wami wokuqala, ngavuma ukutadisha iBhayibheli no-Ian. Sasifunda incwadi ethi Ungaphila Phakade EPharadesi Emhlabeni.a Ngisikhumbula kahle isahluko sesithathu, esasinesithombe sombhishobhi ebusisa amasosha aya empini. Angizange ngikungabaze ukunemba kwalokhu ngisho nakancane ngoba ngangizibonele ngawami le nto yenzeka. EHholo LoMbuso, ngathola incwadi ethi Ukubonisana NgemiBhalo. Lapho ngifunda ngalokho iBhayibheli elikushoyo ngokungathathi hlangothi, ngavele ngabona ukuthi kufanele ngenze ushintsho ekuphileni kwami. Nganquma ukungaphinde ngiye eSontweni LamaKatolika, futhi ngaqala ukuya njalo emihlanganweni eHholo LoMbuso. Ngahlela nokuthatha umhlalaphansi kwezempi.

Ukuthuthukela Ekubhapathizweni

Ngemva kwamasonto ambalwa, ngezwa ukuthi ibandla lizobe lihlanza inkundla eyayizosetshenziselwa umhlangano wesigodi ozayo. Ngangikulindele ngabomvu ukuya kulo mhlangano futhi ngaya ngayosiza ekuhlanzeni le nkundla. Ngangisebenza nabanye, ngikujabulela ngempela ukusebenza nobudlelwane. Njengoba ngangishanela, kweza insizwa ethile yangibuza ukuthi ngangiyisikhulu sezempi yini.

Ngaphendula, “Yebo.”

Imangele le nsizwa yamemeza, “Angikukholwa lokhu! Isikhulu samasosha siyashanela!” Isosha elisesikhundleni esiphakeme lalingeke libonakale licosha ngisho nephepha, ingasaphathwa-ke eyokushanela. Le nsizwa yayikade yabelwe ukungishayelela imoto yamasosha futhi manje yayisingomunye woFakazi BakaJehova!

Ukubambisana Okusekelwe Othandweni

Ukuhleleka kwasebusosheni kusekelwe ekuhlonipheni isikhundla, okuyinto eyayisigxile kakhulu enhliziyweni yami. Ngokwesibonelo, ngikhumbula ngibuza ukuthi ingabe abanye oFakazi BakaJehova baphakeme yini kunabanye ngenxa yezikhundla zomthwalo wemfanelo noma imisebenzi abayenzayo. Umbono wami ngokuphathelene nesikhundla wawusagxile kakhulu, kodwa wawuzoshintsha ngokushesha.

Cishe ngaso leso sikhathi, ngo-1989—ngezwa ukuthi eBolivia kwakuzovakasha ilungu leNdikimba Ebusayo yoFakazi BakaJehova elivela eNew York linikeze inkulumo enkundleni. Ngangibheke phambili ekuboneni ukuthi lizophathwa kanjani ilungu “eliphakeme” lenhlangano. Ngangicabanga ukuthi umuntu onomthwalo wemfanelo ongaka wayezophathwa njengesicukuthwane.

Empeleni, lapho kuqala umhlangano lungekho uphawu lokuthi kunothile okhethekile ofikile, ngaqala ukumangala. Kwenzeka ukuthi mina noManuela sihlale eceleni kombhangqwana othile osukhulile. UManuela waphawula ukuthi inkosikazi yayiphethe iBhayibheli lesiNgisi, ngakho phakathi nekhefu, uManuela waqala ukuxoxa nalona wesifazane. Kodwa ngemva kwalokho lo mbhangqwana wahamba.

Yeka ukuthi samangala kanjani kamuva lapho umyeni walona wesifazane eseya endaweni yesikhulumi eyonikeza inkulumo eyisihluthulelo! Ngaleso sikhathi, engqondweni yami, yonke into engangiyifunde ebusosheni ngokuphathelene nesikhundla, inhlonipho negunya yashintsha. Ngemva kwesimiso ngathi, “Cabanga nje, umzalwane obehlezi nathi ezihlalweni zasenkundleni ezingekho ntofontofo uyilungu leNdikimba Ebusayo!”

Ngiyahleka manje uma ngicabanga ukuthi ziningi kanjani izikhathi u-Ian azama ngazo ukungisiza ukuba ngiqonde amazwi kaJesu atholakala kuMathewu 23:8 athi: “Nonke nina ningabafowenu bomunye nomunye.”

Ukushumayela Okokuqala Ngqa

Lapho sengiqede izibopho zami zasebusosheni, u-Ian wangimema ukuba ngiye naye enkonzweni yendlu ngendlu. (IzEnzo 20:20) Saya endaweni engangingafisi ukuya kuyo eyayigcwele izindlu zamasosha. Isikhulu esithile samasosha engangingafuni ukunqwamana naso savula umnyango. Ngashaywa uvalo, ikakhulukazi lapho sibona isikhwama sami esineBhayibheli futhi sibuza ngokwedelela, “Kwenzekeni kuwe?”

Ngemva komthandazo osheshayo, ngazizwa nginesibindi nokuzola. Lesi sikhulu sasilalela isigijimi sami saze semukela nezincwadi ezisekelwe eBhayibhelini. Lokhu kwangikhuthaza ukuba nginikezele ukuphila kwami kuJehova. Ngabonakalisa ukuzinikezela kwami ngokubhapathizwa emanzini ngo-January 3, 1990.

Ngokuhamba kwesikhathi, umkami, indodana nendodakazi yami nabo baba oFakazi BakaJehova. Manje ngijabulela ukukhonza ebandleni njengomdala nomshumayeli wesikhathi esigcwele wezindaba ezinhle zoMbuso kaNkulunkulu. Ilungelo elihle kakhulu enginalo ukwazi uJehova nokwaziwa nguye. Lokhu kungaphezu kwanoma yisiphi isikhundla umuntu angalwela ukusifinyelela. Ngempela, ukuhleleka akufanele kube nokhahlo nokuba lukhuni kodwa kufanele kube nemfudumalo nokukhathalela. UJehova unguNkulunkulu wokuhleleka, kodwa okubaluleke kakhulu, unguNkulunkulu wothando.—1 Korinte 14:33, 40; 1 Johane 4:8.

[Umbhalo waphansi]

[Isithombe ekhasini 13]

Nginomfowethu uRenato, ngo-1950

[Isithombe ekhasini 13]

Ngisemcimbini nozakwethu baseChina nakwamanye amazwe abangamasosha