“Bhalela U-Anton!”
● Edolobhaneni elisemajukujukwini laseSchelkan, eStavropol’ Kray, eRussia, kwakunoFakazi KaJehova osemusha okuthiwa u-Anton. Esengumntwana, kwatholakala ukuthi une-Duchenne muscular dystrophy, isifo esingalapheki esidla izicubu ngokushesha futhi ngokuvamile okubangela ukuba ophethwe yiso afe engakayihlanganisi iminyaka engu-20. Lapho u-Anton eba neminyaka engu-9, wayengasakwazi ukuhamba noma ukuzimela.
Lapho uYevgeny nomkakhe uDiana bevakashele ibandla loFakazi, bahlangana no-Anton. UDiana uyachaza, “Umzimba ka-Anton wawuntekenteke ngendlela emangalisayo, kodwa wayeqinile ngokomoya. Njengoba umfowabo omdala ayebulawe yilesi sifo eneminyaka engu-19 nje kuphela, u-Anton wayazi ukuthi wayengeke aphile isikhathi eside. Noma kunjalo, wayejabule futhi enombono omuhle.”
UDiana nomyeni wakhe bakhuthaza u-Anton ukuba andise inkonzo yakhe ngokubhalela abantu abahlala kwamanye amadolobhana angawodwa. Ngo-2005, wabhala izincwadi ezingaba ngu-500 wabe esezithumela emakhelini asemizini eseduze. Nokho, wadumala lapho engatholi neyodwa impendulo. Nakuba lokhu kwamdumaza, u-Anton waqhubeka nokubhala izincwadi futhi wathandaza ngobuqotho ecela isiqondiso ukuze inkonzo yakhe ithele naphezu kwezimo ayebhekene nazo.
Lapho efunda iphephandaba ngolunye usuku, u-Anton wazithela encwadini evela kowesifazane owayegula futhi edinga induduzo. U-Anton wambhalela incwadi futhi ingxenye yayo yanyatheliswa kulo leli phephandaba elifanayo: “Nakuba isifo sami singelapheki, ukufunda iBhayibheli kuyangisiza ngibe nethemba ngekusasa. Ngiyakuthanda ukuthola izincwadi futhi ngihlale ngizilindele.”
Ethinteke ngokujulile, lona wesifazane wabhalela leli phephandaba incwadi. Ingxenye eyayinyatheliswe kuyo yayinesihloko esithi “Bhalela u-Anton!” Wazwakalisa ukwazisa ngamaphuzu angokomoya ayesencwadini ka-Anton futhi wanezela: “Asisizeni u-Anton! Sabelani nimbhalele. Le nsizwa iwadinga kakhulu amazwi anomusa!” Kwabe sekufakwa nekheli lika-Anton.
Zaqala ukufika izincwadi ezize ku-Anton eposini elincane lasendaweni yakubo—zazifinyelela ku-30 ngosuku! Zazivela kulo lonke elaseRussia, eBaltics, eJalimane ngisho naseFrance. Wathola amakhulu ezincwadi zivela kubafundi balelo phephandaba. UDiana uyakhumbula, “U-Anton wayechichima injabulo! Manje wayesenabantu abangamakhulu ayengababhalela ukuze ahlanganyele nabo izinkolelo zakhe ezisekelwe eBhayibhelini.”
U-Anton wachitha isikhathi esingaphezu konyaka ebhalelana nalabo ababembhalelile futhi ehlanganyela nabo amaqiniso eBhayibheli. Kancane kancane, njengoba izandla zakhe zilokhu ziba buthakathaka, wacela othile ukuba ambhalele. Ngo-September 2008, u-Anton washona eneminyaka engu-20. Nakuba ayebuthakathaka kakhulu emzimbeni, ukholo lwakhe nothando lwakhe ngenkonzo lwamvulela amathuba okuthinta ukuphila kwamakhulu abantu.