Isifundo 3
Ungubani UJesu Kristu?
Kungani uJesu ebizwa ngokuthi iNdodana kaNkulunkulu ‘eyizibulo’? (1)
Kungani ebizwa ngokuthi “uLizwi”? (1)
Kungani uJesu eza emhlabeni njengomuntu? (2-4)
Kungani enza izimangaliso? (5)
Yini uJesu azoyenza esikhathini esizayo esiseduze? (6)
1. UJesu waphila ezulwini njengomuntu womoya ngaphambi kokuba eze emhlabeni. Wayeyindalo kaNkulunkulu yokuqala, ngenxa yalokho ubizwa ngokuthi iNdodana kaNkulunkulu ‘eyizibulo.’ (Kolose 1:15; IsAmbulo 3:14) UJesu uwukuphela kweNdodana uNkulunkulu ayidala yena uqobo. UJehova wasebenzisa uJesu owayengakabi umuntu ‘njengengcweti yakhe yomsebenzi’ ekudaleni konke okunye ezulwini nasemhlabeni. (IzAga 8:22-31; Kolose 1:16, 17) Futhi uNkulunkulu wamsebenzisa njengomkhulumeli waKhe oyinhloko. Kungakho uJesu ebizwa ngokuthi “uLizwi.”—Johane 1:1-3; IsAmbulo 19:13.
2. UNkulunkulu wathumela iNdodana yaKhe emhlabeni ngokudlulisela ukuphila kwayo esibelethweni sikaMariya. Ngakho uJesu wayengenaye ubaba ongumuntu. Kungakho engazange azuze njengefa noma yisiphi isono noma ukungapheleli. UNkulunkulu wathumela uJesu emhlabeni ngenxa yezizathu ezintathu: (1) Ukuba asifundise iqiniso ngoNkulunkulu (Johane 18:37), (2) ukuba agcine ubuqotho obuphelele, esishiyela isibonelo sokuba sisilandele (1 Petru 2:21), nokuba (3) adele ukuphila kwakhe ukuze asikhulule esonweni nokufa. Kungani lokhu kwakudingeka?—Mathewu 20:28.
3. Ngokungalaleli umyalo kaNkulunkulu, umuntu wokuqala, u-Adamu, wenza lokho iBhayibheli elikubiza ngokuthi “isono.” Ngakho uNkulunkulu wamgwebela ukufa. (Genesise 3:17-19) Wayengasazifinyeleli izindinganiso zikaNkulunkulu, ngakho wayengasaphelele. Kancane kancane waguga futhi wafa. U-Adamu wadlulisela isono kuzo zonke izingane zakhe. Kungakho nathi siguga, sigula, futhi sifa. Isintu sasingasindiswa kanjani?—Roma 3:23; 5:12.
4. UJesu wayengumuntu ophelele njengo-Adamu. Nokho, ngokungafani no-Adamu, uJesu walalela uNkulunkulu ngokuphelele ngisho nangaphansi kovivinyo olukhulu kunalo lonke. Ngakho wayengadela ukuphila kwakhe okuphelele kobuntu ukuze akhokhele isono sika-Adamu. Yilokhu iBhayibheli elikubiza ngokuthi “isihlengo.” Ngaleyo ndlela izingane zika-Adamu zazingase zikhululwe ekulahlelweni ekufeni. Bonke ababeka ukholo lwabo kuJesu bangathethelelwa izono zabo futhi bathole ukuphila okumi phakade.—1 Thimothewu 2:5, 6; Johane 3:16; Roma 5:18, 19.
5. Lapho esemhlabeni, uJesu waphulukisa abagulayo, wasuthisa abalambile, futhi wathulisa izivunguvungu. Wavusa ngisho nabafileyo. Wayezenzelani izimangaliso? (1) Wayenesihawu ngabantu ababehlupheka, futhi efuna ukubasiza. (2) Izimangaliso zakhe zafakazela ukuthi wayeyiNdodana kaNkulunkulu. (3) Zabonisa lokho ayokwenzela isintu esilalelayo lapho esebusa njengeNkosi phezu komhlaba.—Mathewu 14:14; Marku 2:10-12; Johane 5:28, 29.
6. UJesu wafa futhi wavuswa uNkulunkulu njengesidalwa somoya, wayesephindela ezulwini. (1 Petru 3:18) Kusukela ngaleso sikhathi, uNkulunkulu uye wamenza iNkosi. Maduze nje uJesu uzoqeda bonke ububi nokuhlupheka kulomhlaba.—IHubo 37:9-11; IzAga 2:21, 22.
[Izithombe ekhasini 7]
Inkonzo kaJesu yayihlanganisa nokufundisa, ukwenza izimangaliso, ngisho nokunikela ngokuphila kwakhe ngenxa yethu