Isifundo 14

Indlela OFakazi BakaJehova Abahlelwe Ngayo

OFakazi BakaJehova baqale nini ezikhathini zanamuhla? (1)

Imihlangano yoFakazi BakaJehova iqhutshwa kanjani? (2)

Izindleko zinakekelwa kanjani? (3)

Obani abaholayo ebandleni ngalinye? (4)

Yimiphi imihlangano emikhulu eba khona unyaka ngamunye? (5)

Yimuphi umsebenzi owenziwa endlunkulu yabo nasemahhovisi egatsha? (6)

1. OFakazi BakaJehova baqala ngawo-1870 ezikhathini zanamuhla. Ekuqaleni, babebizwa ngokuthi abaFundi BeBhayibheli. Kodwa ngo-1931 bamukela igama elingokomBhalo elithi oFakazi BakaJehova. (Isaya 43:10) Kusukela esiqalweni esincane inhlangano iye yakhula yaba izigidi zoFakazi, ezimatasa ekushumayeleni emazweni angaphezu kuka-230.

2. Amabandla amaningi oFakazi BakaJehova aba nemihlangano emithathu isonto ngalinye. Uyamenywa ukuba uze kunoma yimuphi kuyo. (Heberu 10:24, 25) IBhayibheli liyisisekelo salokho okufundiswayo. Imihlangano ivulwa futhi ivalwe ngomthandazo. Futhi kuculwa ‘izingoma ezingokomoya’ ezithinta inhliziyo kweminingi yalemihlangano. (Efesu 5:18, 19) Kungenwa mahhala, futhi akuthathwa nkongozelo.—Mathewu 10:8.

3. Amabandla amaningi aqhuba imihlangano eHholo LoMbuso. Ngokuvamile lezi izakhiwo ezivamile ezakhiwa izisebenzi zokuzithandela ezingoFakazi. Ngeke ubone izithombe, iziphambano, noma izinto ezinjengalezi eHholo LoMbuso. Izindleko zikhokhwa ngeminikelo yokuzithandela. Kulabo abafisa ukwenza umnikelo, kunebhokisi lomnikelo.—2 Korinte 9:7.

4. Ebandleni ngalinye, kunabadala, noma ababonisi. Bayahola ekufundiseni ebandleni. (1 Thimothewu 3:1-7; 5:17) Basizwa izinceku ezikhonzayo. (1 Thimothewu 3:8-10, 12, 13) Lamadoda awaphakanyiswa abe ngaphezu kwalo lonke ibandla. (2 Korinte 1:24) Awanikezwa iziqu ezikhethekile. (Mathewu 23:8-10) Awagqoki ngendlela ehlukile kweyabanye. Futhi awakhokhelwa ngomsebenzi wawo. Abadala banakekela izidingo ezingokomoya zebandla ngokuzithandela. Banganikeza induduzo nesiqondiso ngezikhathi zobunzima.—Jakobe 5:14-16; 1 Petru 5:2, 3.

5. OFakazi BakaJehova babuye babe nemihlangano emikhulu unyaka ngamunye. Ngalezi zikhathi amabandla amaningi ayahlangana ukuze athamele isimiso esikhethekile semfundo yeBhayibheli. Ukubhapathizwa kwabafundi abasha kuyingxenye evamile yesimiso somhlangano omkhulu ngamunye.—Mathewu 3:13-17; 28:19, 20.

6. Indlunkulu yomhlaba wonke yoFakazi BakaJehova iseNew York. Lapho, kuneNdikimba Ebusayo, iqembu eliyinhloko labadala abangomakad’ebona abaqondisa amabandla emhlabeni wonke. Kubuye kube namahhovisi egatsha angaphezu kwekhulu emhlabeni wonke. Kulezi zindawo, izisebenzi zokuzithandela zisiza ekunyatheliseni nasekuthumeleni izincwadi zeBhayibheli. Kunikezwa nesiqondiso ekuhlelweni komsebenzi wokushumayela. Kungani ungahleli ukuvakashela ihhovisi legatsha eliseduze nawe?