‘Yilwa Kanzima Ngenxa Yokholo’
“Bathandekayo, . . . ngakuthola kudingekile ukunibhalela ukuze nginiyale ukuba nilwe kanzima ngenxa yokholo olwanikezwa abangcwele kwaba kanye.”—Juda 3.
1. Ziyini ezinye zezici ezisetshenziswa uSathane emzamweni wakhe ongaphumeleli wokubhubhisa ubuKristu beqiniso?
IZINCEKU zikaJehova kumelwe zilulwele kanzima ukholo lweqiniso. Isitha sazo, uDeveli, sifuna ngokushushisa okuqondile nange“zenzo zobuqili” ukubhubhisa ubuhlobo bazo obuyigugu noJehova uNkulunkulu ngoJesu Kristu. (Efesu 6:11, Kingdom Interlinear Translation; 1 Petru 5:8) Emizamweni engaphumeleli kaSathane yokubhubhisa ubuKristu beqiniso, uye wazama ukuwalulaza ngezinye izikhathi. Phakathi kwezici ezingonakalisa ezingafeza lenjongo yilezi: (1) Imfundiso yamanga; (2) ukuziphatha okubi; (3) ukuntula ukholo; (4) ukungalinaki igunya eliqondiswa phezulu; (5) ukububula nokukhononda; (6) nokuncoma ubuntu ngenxa yenzuzo yobugovu.
2. Imiphi imininingwane enikezwe lapha maqondana nencwadi kaJuda?
2 UJehova unikeza lokho kanye okudingekayo ngokomoya ukuze avikele izinceku zakhe futhi alwe ngokugcwele noMkhohlisi Omkhulu. (Isaya 59:1) Elinye ilungiselelo elinjalo incwadi ephefumlelwe ngokwaphezulu kaJuda. Kunokwenzeka, umfundi uJuda wayiloba ePalestina ngaphambi kuka-66 C.E., ngoba akaphawuli ngokuza kukaCestius Gallus ezohlasela iJerusalema ngalowonyaka akaphawuli nangokuwa kwalowomuzi ngaphansi kukaTitus ngo-70 C.E.a
3. Kungaziphi izindlela incwadi ephefumlelwe kaJuda engaba ebaluleke kakhulu ngazo namuhla?
3 Nakuba yalotshwa emakhulwini eminyaka amaningi edlule, incwadi kaJuda iwusizo olukhulu kithi namuhla. Ababonisi abangamaKristu agcotshwe ngomoya bangayisebenzisa njengesisekelo sokunikeza iseluleko futhi kumelwe bayisebenzise. Futhi, uma siyihlolisisa lencwadi ngokomthandazo nangentobeko, ingase isisize nathi siqu. Ikakhulukazi kunjalo uma siba nomuzwa wokwanda kwengozi evela emfundisweni yamanga noma ukuyengela ekuziphatheni okubi, uma siqaphela ukuthi ukholo lwethu luyehla, noma uma siphawula enhliziyweni yethu ukuthambekela okukhulayo kokungalinaki igunya elinikezwe uNkulunkulu, ukububula ngokukhononda noma ukuthopha abantu abathile ngenxa yenzuzo yethu yobugovu. Njengoba sicabangela lencwadi ephefumlelwe ivesi ngevesi, ngokungangabazeki siyobona kalula indlela yokusebenzisa iseluleko sayo esihlala njalo thina ngokwethu nanjengebandla.
Ukunxusa Umusa, Ukuthula Nothando Okwandisiwe
4. UJuda wazibonakalisa kanjani, futhi nakuphi ukubaluleka?
4 UJuda wavula incwadi yakhe ngalamazwi:
“UJuda inceku kaJesu Kristu, umfowabo kaJakobe, kubo ababiziweyo abathandwa kuNkulunkulu uYise nabagcinelwe uJesu Kristu.” (Juda 1)
Njenge“nceku kaJesu Kristu,” uJuda wayengenzi inkonzo eyehlisayo neyobugqila ngokuphelele. Kunalokho, ‘lobubunceku’ babusekelwe eqinisweni lokuthi abalandeli bakaJesu babeye bathengwa ngegazi lakhe eliyigugu ngenxa yenkonzo yakhe yomusa, benombono wokuphila okuphakade. Babeye benziwa izinceku ngothando lukaJesu futhi ngokuzithandela babeye bazinikezela kuye. (Mathewu 11:29, 30; qhathanisa nabase-Efesu 5:21-33.) UJuda wathi wayeyi“nceku kaKristu,” kodwa ‘ewumfowabo kaJakobe,’ ngokusobala uJakobe owayengomunye we“zinsika” ezingokomoya zebandla laseJerusalema ‘nomfowabo weNkosi.’ (Galathiya 2:9; 1:19; qhathanisa nezEnzo 12:17; 15:13-21.) Ngakho-ke uJuda ngokusobala wayengumfowabo kaJesu ongokwenyama ngamzali munye, kodwa ngentobeko akazange afune ukuqhama ngenxa yokuhlanganiswa umkhaya neNdodana kaNkulunkulu.—Marku 6:3.
5. (a) Babengobani “ababiziweyo”? (b) “Ababiziweyo” bagcinelwa kanjani uKristu? (c) Incwadi kaJuda iyisikhuthazo kobani, ngaphandle ‘kwababiziweyo?’
5 Incwadi kaJuda yayihloselwe ukufinyelela yonke indawo. Yathunyelwa ‘kwababiziweyo,’ okungukuthi, kulabo ababizwa uNkulunkulu embusweni okhazimulayo wasezulwini weNdodana yakhe. (Johane 6:44; qhathanisa nezEnzo 16:14.) UJehova wayebathanda laba “ababiziweyo,” futhi kwakumjabulisa kakhulu ukubanikeza umbuso uma bona siqu begcina isimo esamukelekayo esingokomoya. (Luka 12:32; Roma 8:38, 39; qhathanisa noIsaya 52:11.) ‘Bagcinelwa uJesu Kristu’ ngokuthi uJehova uNkulunkulu wayebalondoloza ngoba besebunyeni neNdodana yakhe, bengamalungu omzimba wayo. Uma bethembekile, babeyohlanganyela noJesu embusweni wakhe. (Efesu 4:15, 16; 2 Thimothewu 1:12; 1 Petru 1:3-5) Kodwa isiyalo esihle salencwadi asilinganiselwe kwabanjalo “ababiziweyo.” Singaba futhi isikhuthazo esikhulu ‘esixukwini esikhulu’ sabanye abathembekile labo namuhla abahlanganyela na“bafowabo” abangokomoya bakaKristu ekubeni izinceku zombuso.—Mathewu 24:14; 25:34-40; IsAmbulo 7:4, 9, 15.
6. Kungaziphi izindlela umusa kaNkulunkulu owawuboniswe ngazo kubakhulekeli ababe kanye noJuda?
6 Ngokulandelayo, uJuda waveza lemizwelo evela enhliziyweni:
“Makwandiswe kini umusa nokuthula nothando.” (Juda 2)
Labo incwadi kaJuda eyayiqondiswe kubo banikezwa umusa waphezulu, ukuthula nothando lapho beba abakholwayo abazinikezele futhi bamukela ukuthethelelwa uJehova izono zabo ngoJesu Kristu. Umusa kaNkulunkulu waboniswa elungiselelweni lesihlengo alenza ngoJesu. (Thithu 3:4-7) Okunye ukubonakaliswa komusa kaNkulunkulu kwakuhlanganisa ukungabibikho kwabo ngaphansi komthetho kaMose, emasikweni angewona angokombhalo, ekuziphatheni okuhlambalaza uNkulunkulu nokufanayo. (Roma 7:4; Galathiya 5:13; 1 Petru 1:18, 19; qhathanisa nesAmbulo 18:1-5.) Kwakuwumusa oqhubekayo kaJehova lapho ebagcinela uJesu Kristu, ukuze bakwazi ukukhonza njengezigqila zakhe, njengalapho bememezela “izindaba ezinhle.” (Marku 13:10) Isifiso esingokomthandazo sikaJuda sasiwukuba abakhulekeli kanye naye babe nomusa waphezulu ngesilinganiso esandisiwe.
7. Kungani futhi kukanjani amaKristu ayethola ukuthula?
7 UJuda futhi wathandazela ukuba abakholwa naye bathole ukuthula okwandisiwe. Ngenxa yokuba abazinikezele kuNkulunkulu ngokungagodli, oFakazi BakaJehova namuhla banobuhlobo obuseduze naye. Ngakho-ke banokuthula noJehova futhi ‘banokuthula kukaNkulunkulu okudlula ukuqonda konke,’ ukuthula kwenhliziyo nengqondo lokho abangakholwa abangakuqondi. (Filipi 4:6, 7; Kolose 1:19, 20) Futhi, bahlakulela futhi babonise ukuthula, isithelo somoya kaNkulunkulu, futhi bayakwazi ukujonga ukuthula nabantu abakanye nabo. (Galathiya 5:22, 23; Heberu 12:14) Khona-ke futhi, amaKristu athembekile awasesabi isikhathi esizayo ngisho nokufa ngokwakho, kodwa anokuthula, azi ukuthi uJehova unawo futhi ubangela ukuba yonke imisebenzi yakhe isebenzelane kube ngokuhle kubo bonke abamthandayo.—Mathewu 10:28; Roma 8:28.
8. Uthando lukaJehova luye lwaboniswa kanjani kithi?
8 Uthando olukhulu lukaJehova lwaboniswa ekunikeleni ngeNdodana yakhe “ukuba yilowo nalowo okholwa yiyo angabhubhi, kodwa abe-nokuphila okuphakade.” (Johane 3:16) Lapho siseyizoni sasingenabo ubuhlobo bomuntu siqu noJehova, wasibonisa loluthando. (Roma 5:8) Kodwa, ngokholo kulelolungiselelo lesihlengo, sidinga ukuzigcina sisothandweni lukaNkulunkulu. UJuda futhi wathandazela ukuba uthando lwandiswe kulabo incwadi yakhe eyayilotshelwa bona.
9. Kungani ababekholwa noJuda babedinga umusa, ukuthula nothando ngesilinganiso esandisiwe?
9 UJuda wathandazela umusa kaNkulunkulu, ukuthula nothando ukuba kwandiselwe ayekholwa nabo abathandekayo ngoba inhlalakahle yabo engokomoya yayisengozini. Ngakho-ke, babedinga umusa kaNkulunkulu, ukuthula nothando olukhulu kunanini ngaphambili.
“Nilwe Kanzima”
10. UJuda wayezimisele ukubhala ngani?
10 Ngokulandelayo uJuda wagcizelela ukungathi sína kwezindaba, ethi:
“Bathandekayo, nakuba ngangenza wonke umzamo wokunibhalela ngensindiso esinayo sonke, ngakuthola kudingekile ukunibhalela ukuze nginiyale ukuba nilwe kanzima ngenxa yokholo abalunikezwayo abangcwele kwaba kanye.” (Juda 3)
Ukusebenzisa kukaJuda amazwi othando “bathandekayo” kwaqinisekisa abakhulekeli abakanye naye ngothando lwakhe naphezu kwesigijimi sakhe esinamandla. (Johane 13:35; qhathanisa nabaseRoma 1:7; 3 Johane 1, 2.) Wayehlose ukuloba ‘ngensindiso ababenayo’ bonke ‘nababizelwe’ ‘embusweni wasezulwini.’ (Galathiya 3:26-29) Yayihlobene nethemba eliyigugu lensindiso lelo amaKristu ayenalo ‘ngokholo oluhlanganyelwa yibo bonke’ osukwini lukaJuda.—Thithu 1:4.
11. Lwaluyini ‘ukholo olwayiswa kwabangcwele’?
11 ‘Ukholo abalunikezwayo abangcwele’ kwakuyiqoqo lezinkolelo maqondana noJehova uNkulunkulu nombuso wakhe njengoba walethwa kumaKristu uJesu nabafundi bakhe abaphefumlelwe. Ngokusobala, lwanikezwa “kwaba kanye” ngomqondo wokuthi abalandeli bakaJesu abagcotshiwe, “abangcwele,” balwamukela eminyakeni engamakhulu ayishumi nesishiyagalolunye edlule njengoluwukuphela kwezindaba ezinhle zeqiniso. Luhlala luwukholo’ lolo oFakazi BakaJehova namuhla abaqaphela ukuthi kumelwe banamathele kulo ngokuqinile, njengoba ngempela azikho ezinye izindaba ezinhle noma isigijimi sensindiso esifanelwe ukholo. (Galathiya 1:6-8) Futhi isici esiqhamile salezozindaba ezinhle siwukuthi uJesu Kristu wafela izwe lonke lesintu. Ngakho-ke kuyinto ethakazelisa kakhulu ‘esixukwini esikhulu’ ‘sezinye izimvu’ osukwini lwethu.—Johane 10:16; 1 Johane 2:1, 2; IsAmbulo 7:9.
12. Kungani uJuda alobela ayekholwa nabo ukuba abayale ‘balwe kanzima ngenxa yokholo’?
12 Osukwini lukaJuda abafundisi bamanga ababethi bangamaKristu babezama ukuphamba abantu bakaNkulunkulu ukuba bamukele izindaba ezinhle mbumbulu. Izimfundiso ezinjalo zazisongela ukholo lwabo nensindiso. (Mathewu 24:13; 2 Korinte 11:3, 4) Ngakho-ke ukuze kumelwane nokuqhubeka kwalokhu, futhi njengoba eshukunyiswa umoya ongcwele nothando, uJuda ‘wakuthola kudingekile’ ukuloba futhi ayale ayekholwa nabo ukuba ‘balwe kanzima ngenxa yokholo.’
13. Ukuze basinde enkohlisweni nasekulahlekelweni insindiso, yini okumelwe oFakazi BakaJehova bayenze namuhla?
13 Uma thina, njengofakazi bakaJehova abangamaKristu banamuhla, sizohlala sithembekile kuNkulunkulu futhi sisinde ekukhohlisweni nasekulahlekelweni insindiso, nathi futhi, kumelwe ‘silwe kanzima’ ngokumelene nezindaba ezinhle mbumbulu, simelane ngenkuthalo, silwa nemizamo yokunezela noma ukukhipha okuthile emfundisweni kaJehova emsulwa, iZwi eliphefumlelwe. (Duteronomi 4:2; IzAga 30:5, 6; IsAmbulo 22:18, 19) Kumelwe sihlolisise noma iziphi izimfundiso ezintsha noma ezingaziwa siqondiswa yiZwi likaNkulunkulu lilonke futhi sibambelele ngokuqinile okholweni oluholela ensindisweni.—Heberu 1:1, 2; 2:3, 4.
14, 15. (a) Kungayiphi indlela uJuda achaza ngayo isizathu sokushintsha injongo yencwadi yakhe? (b) Kungani abafundisi bamanga bengenakuphumelela ekubhubhiseni noma ekungcoliseni ibandla lobuKristu lilonke?
14 Lapho echaza ushintsho lwenjongo yakhe ekubhaleni, uJuda waphawula:
“Ngokuba sebengenile ngokunyenya abantu abathile okwalotshwa ngabo phambili endulo ukuthi bayokwehlelwa yilokhukulahlwa, abangamesabi uNkulunkulu, bephendukezela umusa kaNkulunkulu wethu ube-ngamanyala, bephika uMbusi oyedwa neNkosi yethu uJesu Kristu.” (Juda 4)
Amadoda ‘ayengene ngokunyenya’ phakathi kwamaKristu eqiniso ngokunyenya afundisa izimfundiso zamanga. (Qhathanisa nabaseGalathiya 2:4; 1 Johane 2:19.) UJesu wayebikezele ngesenzo sesitha esihloselwe ukonakalisa abantu bakaJehova, ngoba wabonisa ukuthi uDeveli wayeyotshala “ukhula,” noma amaKristu amanga, phakathi ‘kukakolweni,’ noma abalandeli bakaKristu beqiniso. (Mathewu 13:24-30, 36-43) Kwabuye futhi kwaba khona izixwayiso zabaphostoli ngokuhlubuka, uPetru ngokukhethekile ephawula “izimfundiso zamanga.”—2 Petru 2:1; IzEnzo 20:29, 30; 2 Thesalonika 2:3.
15 Labobantu ababi babengenakuphumelela ekubhubhiseni noma ekungcoliseni ibandla lilonke. ‘Esikhathini eside esidlule,’ ngisho nangaphambi kokuprofetha kukaEnoke othembekile, abantu abanjalo babemiselwe isahlulelo sikaNkulunkulu esinzima. (Genesise 3:15; 5:21-24; Juda 14, 15) ‘Lesisahlulelo’ ngokusobala sivezwe yilokho okulandelayo encwadini kaJuda.
16. Kungani ‘abantu abangamesabi uNkulunkulu’ babenecala ‘lokuphendukezela umusa ongafanelekanga kaNkulunkulu wethu ube yizaba zokuziphatha okubi,’ futhi yini eyayingalungile ngokucabanga kwabo?
16 Labobafundisi bamanga ‘babengabantu abangamesabi uNkulunkulu,’ noma ‘abangamhloniphi uNkulunkulu.’ (The New Testament in Modern English, ehunyushwe uJ. B. Phillips) Babebheka abantu bakaJehova abahlanziwe ngezisusa ezingcolile nangamehlo amabi. Ngephutha, labobantu abangenanhlonipho baphetha ngokuthi njengoba uNkulunkulu athethelela ezakuqala izifebe, abakhonza izithombe, iziphingi, njalonjalo, wayeyoba nomusa kangangokuba athethelele umuntu ophinda enze ngokuzithandela izinto ezinjalo zokona. Ngokweduka bacabanga ukuthi bangaphula imithetho kaNkulunkulu yokuziphatha ngokungabi-msulwa, khona-ke babuye baphenduke futhi bahlale phakathi kwabantu bakaJehova kuze kube yisikhathi esilandelayo lapho bekhanukela ukuzitika esonweni futhi ‘bayengele imiphefumulo engaqinile ekuziphatheni okubi.’ (2 Petru 2:14) Ngakho-ke ‘abantu abangamesabi uNkulunkulu’ babenecala ‘lokuphendukezela umusa ongafanelekanga kaNkulunkulu wethu ube amanyala [yizaba zokuziphatha okubi’ NW] Abazange ngempela bazise noma bavume ukuthi uNkulunkulu wayenomusa ekuhlanzeni abakholwayo ezonweni zabo ngegazi likaKristu ukuze kamuva bengase balandele inkambo elungileyo.—Roma 6:11-23; 1 Korinte 6:9-11.
17. Kungayiphi indlela abathile abangase ‘bazibonakalise bephika ngayo uMnikazi wabo owukuphela kwakhe neNkosi,’ futhi yini ebahlalele?
17 Uma noma obani bethu, njengofakazi bakaJehova abazinikezele, bengathobela abantu abangamesabi uNkulunkulu futhi babe yizigqila zesono ngenxa yokwanelisa isifiso esingokwenyama, siyobe ‘siphika’ lowo owasithenga ngegazi lakhe eliyigugu. Siyobe siphika uJesu Kristu njengoMnikazi neNkosi. (1 Korinte 7:22, 23) Njengoba imbubhiso ilindele labo abenza lokhu, yeka indlela okubaluleke ngayo ukuba simelane nabantu abanjalo ababi!
Iseluleko Esinamandla Sosuku Lwethu
18, 19. (a) Iyiphi inkambo yokona amanye amaKristu okuzisholo aye ayilandela? (b) Abanye abathile baye bathonyeka kanjani? (c) Isiphi iseluleko esiphefumlelwe okumelwe sisize amaKristu athembekile ukuba akuhlomele kangcono ‘ukulwa kanzima ngenxa yokholo’?
18 Namuhla abambalwa abaye bahlanganyela nebandla loFakazi BakaJehova baye bafuna ukuthuthukisa imfundiso yamanga nokuziphatha okubi. Labantu abangaqondiswa kahle unembeza bazibukela phansi izindinganiso zokulunga zikaNkulunkulu futhi bayingozi yangempela kumaKristu athembekile.
19 Kuyadabukisa ukuthi abalandeli bakaJesu Kristu abasebenza kanzima, nabathanda ukulunga bangathonywa yimfundiso yamanga nokuziphatha okubi. Kodwa iseluleko sikaJuda esiqinile siyoqinisa abathembekile ukuze bangaweli emizamweni enjalo yobuSathane yokubhubhisa ubuhlobo babo noJehova uNkulunkulu. Futhi njengoba manje siqhubeka nokucabangela kwethu incwadi kaJuda ephefumlelwe, sengathi singakuhlomela kangcono ‘ukulwa kanzima ngenxa yokholo.’
[Umbhalo waphansi]
a Bheka iAid to Bible Understanding. kk. 978, 979; “All Scripture is Insipired of God and Beneficial,” kk. 259, 260, ekhishwe yiWatchtower Bible and Tract Society of New York, Inc.
Ungayiphendula yini lemibuzo?
□ Incwadi kaJuda ikhuluma ngamaphi amaphuzu angase alimaze amaKristu eqiniso?
□ Incwadi kaJuda iwusizo olukhulu kanjani kithi namuhla?
□ Kungani labo uJuda ayebalobela babedinga umusa, ukuthula nothando ngesilinganiso esikhulu?
□ Luyini ‘ukholo abangcwele abalunikezwa kwaba kanye’?
□ Kungenxa yasiphi isizathu uJuda akhuthaza ayekholwa nabo ukuba ‘balwe kanzima ngenxa yokholo’?
[Isithombe ekhasini 17]
Ingabe njengamaKristu athembekile ngazo zonke izikhathi ngokuqiniseka ‘nilwa kanzima ngenxa yokholo’?