“Bathandekayo, . . . Nizigcine Othandweni LukaNkulunkulu”
“Bathandekayo, yakhelanani ekukholweni kwenu okungcwele kakhulu, nikhuleke ngoMoya oNgcwele, nizigcine othandweni lukaNkulunkulu.”—Juda 20, 21.
1, 2. Ngaphandle kwezixwayiso, isiphi isiyalo esitholakala encwadini kaJuda?
UMUSA ongafanelekanga kaJehova usobala ekusebenzelaneni kwakhe nalabo abamthandayo. NgeZwi lakhe eliphefumlelwe ubonisa lokho akudinga kubo. Futhi yeka indlela esingabonga ngayo ngokuthi ingxenye yeZwi likaNkulunkulu, incwadi kaJuda, isinikeza izixwayiso ezingasisiza ukuba sigcine ubuhlobo obufanelekile noJehova uNkulunkulu!
2 Nokho, ngaphandle kokunikeza izixwayiso ezidingekayo, uJuda ubonisa lokho okumelwe sikwenze ukuze sakheke ngokomoya futhi ‘sizigcine sisothandweni lukaNkulunkulu.’ Ngakho-ke, siyozuza kakhulu ekucabangeleni ingxenye yokuphetha yencwadi kaJuda.
Abahleki Bosulu Babikezelwa
3, 4. UJuda wayebhekisele kumaphi “amazwi” abaphostoli bakaJesu?
3 Lapho enikeza isikhumbuzo esibalulekile, uJuda waloba:
“Kepha nina-bathandekayo, khumbulani amazwi akhulunywé phambili ngabaphostoli beNkosi yethu uJesu Kristu abasho ukuthi ngesikhathi sokugcina kuyakuba-khona abahleka usulu, behamba ngezinkanuko zabo zokungamesabi uNkulunkulu. Yilabo abaveza ukwahlukana, bengabenyama [benjengezilwane, NW] bengenaMoya.” (Juda 17-19)
UJuda washo okuningi okudalula abantu ‘abangamesabi uNkulunkulu’ abangena ebandleni ngobuqili. Khona-ke, encenga ayekholwa nabo ayebathanda kakhulu, uJuda ubayala ukuba bakhumbule amazwi akhulunywa ngaphambili abaphostoli bakaJesu. Ukukhumbula lawomazwi kwakumelwe kushukumisele wonke amaKristu ukuba ‘alwe kanzima ngenxa yokholo.’
4 Umphostoli uPawulu waxwayisa ababonisi ayekhonza nabo ngokuthi phakathi kwabo ‘kwakuzakuvuka amadoda akhuluma okudukisayo ahunge abafundi ukubalandela.’ (IzEnzo 20:29, 30) Watshela uThimothewu ukuthi ‘ezinsukwini zokugcina abathile babeyokuwa okholweni.’ (1 Thimothewu 4:1, 2) Futhi umphostoli uPetru ngokuqondile waxwayisa ngokuthi ‘ezinsukwini zokugcina kwakuyoba khona abahleki bosulu bethi: siphi isithembiso sokufika kwakhe?’—2 Petru 3:1-4.
5. AmaKristu athembekile kungase ukuba aphathwa kanjani ‘abantu abangamesabi uNkulunkulu’ ababengene ngokunyenya ebandleni, kodwa kwakumelwe abantu abesaba uNkulunkulu basabele kanjani kulokhu?
5 Ngakho-ke, abamukela incwadi kaJuda babenesizathu esihle sokulindela ukuba ‘abahleki bosulu’ bavele phakathi nenkathi eyalandelwa ngokushesha ukuphela kwesimiso sezinto sobuJuda. Kwakungekhona okungenakwenzeka ukuba ‘abantu abangamesabi uNkulunkulu’ ababeye bangena ebandleni bagcone abakholwayo abathembekile ababenamathele ezindinganisweni ezithembekile zikaJehova futhi ababengahlanganyeli ‘nabazalwane bamanga’ ekuziphatheni okubi. Kodwa kwakubalulekile ukuba abantu abesaba uNkulunkulu ‘balwe kanzima ngenxa yokholo,’ ngisho nakuba babeye bahlekwa usulu abafundisi bamanga ababehamba futhi beqhutshwa ‘yizinkanuko zabo zokungamesabi uNkulunkulu’ zokuziphatha okubi.—Qhathanisa no-2 Korinte 11:26; Galathiya 2:4, 5.
6. Nakuba uNkulunkulu aqinisekisa ubunye balabo abamthandayo, yini abahleki bosulu abangamesabi uNkulunkulu abazama ukuyenza?
6 Nakuba uNkulunkulu ngomoya wakhe, aqinisekisa ubunye balabo abamthandayo, labo bahleki bosulu abangamesabi uNkulunkulu bazama ‘ukubangela ukwehlukana,’ noma ‘ukukhetha,’ bezama ukuqhuba umsebenzi wokwehlukanisa phakathi kwabantu bakaJehova. (Juda 19, New World Translation inguqulo ka-1950, amazwi asezansi; IHubo 133:1-3; 1 Korinte 1:10) Nakuba abahleki bosulu babekhuluma nabantu abathembekile abanomthwalo wemfanelo ebandleni, abantu abangamesabi uNkulunkulu babonisa ukutusa abantu ababengabazuzisa. (Juda 8, 16) NjengabaFarisi, babewabukela phansi amalungu ebandla athobekile esaba uNkulunkulu. Kunokuba babuthe kanye neNkosi, bazama ukwehlukanisa. Ngisho nanamuhla abanye bazama ukudonsela abangaqinile emaqenjini athile, okungenzeka ‘ngenxa yesifundo seBhayibheli.’ Lokhu akunakuluthuthukisa neze uthando ngoNkulunkulu, uKristu nebandla lobuKristu.—Luka 11:23.
7. Kungani ‘abantu abangamesabi uNkulunkulu’ ngokufanelekile babebizwa ngokuthi ‘bafana nezilwane’?
7 Labantu ngokufanelekile babebizwa ngokuthi ‘[bafana nezilwane] noma bangabenyama,’ ngoba babeyizidalwa ezihlulwa yimizwelo engokwenyama, izithakazelo nokuthambekela. Nakuba babezicabangela njengabakhanyiselwe ngokomoya, uJuda wabachaza ‘njengabangebona abangokomoya,’ noma ngokoqobo abangenawo “umoya.” Eqinisweni, labobantu ‘abafana nezilwane’ babentula umoya kaJehova, babengakwazi ukuqonda izinto ezingokomoya futhi babengazidluli izilwane ezingenangqondo. Uma sinomoya kaJehova futhi siqonda ‘izinto ezijulile zikaNkulunkulu,’ kumelwe sibonge kakhulu kuBaba wethu osezulwini.—1 Korinte 2:6-16.
Indlela Yokuhlala Othandweni LukaNkulunkulu
8. Inkulumo ethi “ukholo olungcwele kakhulu” kungase ukuba yayibhekiselwephi?
8 UJuda ngokulandelayo uphendukela ekunxuseni okuqotho, ethi:
“Kepha nina-bathandekayo, yakhelanani ekukholweni kwenu okungcwele kakhulu, nikhuleke ngoMoya oNgcwele, nizigcine othandweni lukaNkulunkulu, nibheke umusa weNkosi yethu uJesu Kristu kube-ngukuphila okuphakade.” (Juda 20, 21)
UJuda ngothando wabonisa indlela ayekholwa nabo ayebathanda ababengahlala ngayo othandweni lukaJehova. Ukulandela iseluleko sakhe ngokuqinisekile kungahlanganisa ukuhlakulela ukholo, isithelo somoya kaNkulunkulu. (Galathiya 5:22, 23) Kodwa ngenxa yamazwi okuqala kaJuda ‘okulwela ukholo abalunikelwa abangcwele’ (Juda ivesi 3), amazwi athi ‘ukholo olungcwele kakhulu’ kungase ukuba ayebhekisela kuzo zonke izimfundiso zobuKristu, kuhlanganise izindaba ezinhle zensindiso. Isisekelo solunjalo ukholo lweqiniso singuKristu, futhi sabizwa ngokuthi ‘singcwele kakhulu’ ngoba sabheka uNkulunkulu wobungcwele futhi sasisekelwe ngokukhethekile eZwini lakhe elingcwele.—IzEnzo 20:32; 1 Korinte 3:10-15.
9. Kumelwe senzeni ukuze ‘sizakhe ekukholweni kwethu okungcwele kakhulu’?
9 Ukuze amaKristu ‘azakhe okholweni lwawo olungcwele,’ noma aluqinise, kumelwe atadishe ngenkuthalo iZwi likaNkulunkulu ngamanye nanjengebandla. Ukuxoxa njalo nofakazi bakaJehova abakanye nawo abangamaKristu, nokumemezela izindaba ezinhle kwabanye, kuyojulisa ithonya elenziwa yiBhayibheli ezinhliziyweni zethu. Kodwa akukho lutho lwalokhu olungafezwa ngaphandle komthandazo oqotho. Umuntu ‘uthandaza ngomoya ongcwele’ lapho ethandaza ngaphansi kwethonya lawo nasekuvumelaneni nezinto eziseZwini likaJehova. Futhi, imiBhalo elotshwe ngaphansi kokuphefumlelwa umoya kaNkulunkulu ibonisa indlela yokuthandaza nalokho okumelwe sikucele uma sithandaza. Ngokwesibonelo, singathandazela ngokuqiniseka ukuba sigcwaliswe ngomoya ongcwele kaNkulunkulu. Uma ‘sithandaza ngomoya ongcwele,’ imithandazo yethu iyokwambula isimo esifanelekile senhliziyo, leso esithandwa uNkulunkulu. Kanjalo-ke siyovikelwa emathonyeni angafanelekile, kuhlanganise nemibono yabantu ‘abangamesabi uNkulunkulu’ abangase bangene ebandleni.—Luka 11:13; Roma 8:9, 26, 27.
10. Ukuze ‘bazigcine othandweni lukaNkulunkulu,’ yini eyayidingeka kwababekholwa noJuda?
10 ‘Ukuze bazigcine othandweni lukaNkulunkulu,’ ababekholwa noJuda kwakumelwe bagcine imiyalo kaJehova neyeNdodana yaKhe. (Johane 15:10; 1 Johane 5:3) Ukuhlala othandweni lukaNkulunkulu kudinga ukukhuluma nokuziphatha okwamukelwa uJehova. Ngenxa yokungapheleli nesono, abantu abathembekileyo ukuze bahlale othandweni lukaNkulunkulu kuyodingeka baqhubeke befuna ukuba umusa kaJehova welulelwe kubo ngoJesu Kristu futhi wenziwa waba nokwenzeka ngomhlatshelo wesihlengo weNkosi yabo. (Roma 5:8; 9:14-18; 1 Johane 4:9, 10) Ukuqhubeka komusa waphezulu kubalandeli abathembekile bakaJesu ekugcineni kuyophumela ekuphileni okuphakade.—Johane 3:16.
Indingeko Yokubonisa Umusa Kwabanye
11. Yini eyashiwo uJuda ngomusa, futhi kwakusekuwubonakaliseni kobani lapho kwakudingeke khona ukwahlukanisa?
11 Maqondana nendingeko yokubonisa umusa, uJuda wathi:
“Abanye, abangabazayo, nibahawukele, nibasindise ngokubahlwitha emlilweni, kepha abanye nibahawukele ngokwesaba, nizonde nengubo enindwé yinyama.” (Juda 22, 23)
Uma ababekholwa noJuda babezoqhubeka bamukela umusa waphezulu, kwakumelwe babe nomusa kwabanye abakuphila kwabo okuphakade kwakusengozini. (Jakobe 2:13) Kodwa ukuze abathembekile ‘baqhubeke bebonisa umusa kwabathile ababenokungabaza,’ kwakudingekile ngabo ukuba bahlukanise phakathi kwalabo abafanelwe umusa ‘nabaphuphayo.’
12. (a) Ngenxa yokuthonywa ‘abantu abangamesabi uNkulunkulu,’ abanye kungase ukuba babenakuphi ukungabaza? (b) Kwakungenzeka kanjani ‘ukuhlwitha abathile emlilweni’?
12 Ngemfundiso yabo yamanga, ukukhononda, ukusola, njalonjalo, ‘labantu abangamesabi uNkulunkulu’ babebangela abantu abangaqinile ngokomoya ukuba bagcwale ukungabaza. Bezanyazanyiswa uwangala lwabafundisi bamanga, abantu abangabazayo kungenzeka ukuthi babezibuza ukuthi amaKristu azinikezele ngempela ayengabantu bakaJehova yini futhi laba kungase ukuba bayeka ukuhlanganyela nabo ekukhonzeni nasekushumayeleni izindaba ezinhle. Abanjalo abantu abangaqinile babesengozini yo“mlilo,” noma ukubhujiswa kwaphakade. (Qhathanisa noMathewu 18:8, 9; 25:31-33, 41-46.) Kodwa ngokubasiza ngokushesha ngesiyalo esingokomoya nomthandazo, lamaKristu aqinile, ikakhulukazi ababonisi bebandla, babengakwazi ukubasindisa, ‘ngokubahlwitha emlilweni.’—Galathiya 6:1; Jakobe 5:13-20.
13. (a) Kungayiphi indlela ‘abanye abaye bangcolisa ngayo ingubo yangaphakathi’? (b) Abagqoke ‘izingubo ezinindiwe’ ‘bangasindiswa’ kanjani?
13 Abanye kungase ukuba banqotshwa abangcolisi benyama futhi bawela nabo ekuziphatheni okubi, noma ekuphingeni okungokomoya. (Jakobe 4:4) Ngokwehlulwa yizenzo zobulwane, kwakunjengokungathi ‘babenindwe ingubo.’ Babeye baninda ubuntu babo bangaphakathi njengamaKristu aqotho, njengengubo egqokwa ngaphansi. (Qhathanisa nesAmbulo 3:4, 5.) Ofakazi bakaJehova abathembekile bazilinda ekungcoliseni ingubo yabo yobuntu bobuKristu ngalendlela ngoba lokhu kwakungamthokozisi uJehova uNkulunkulu futhi kwakungase kuholele ekubhujisweni. Nokho, abantu abesaba uNkulunkulu, ikakhulukazi abadala abamisiwe, ngomusa babezama ukusiza abantu abangaqinile abagqoke ‘izingubo ezinindiwe’ ukuba babuyele endleleni yensindiso. Uma abadukayo bebonisa ukuphenduka koqobo, kwakungenzeka ‘ukubasindisa’ ekufeni kokulahlwa phezulu lokho inkambo engahlanzekile eyayingabaholela kukho.—IzAga 28:13.
Nikeza Inkazimulo, Ubukhosi, Amandla Negunya KuNkulunkulu
14, 15. (a) Ubani owayekwazi ukulinda abagcotshiwe ababekholwa noJuda ukuba bangakhubeki, futhi umuntu wayengakhutshwa yini? (b) Ofakazi bakaJehova abagcotshiwe nabathembekile ‘babengabekwa kanjani bengenasici,’ phambi kukaNkulunkulu? (c) “Isixuku esikhulu” sibheke phambili kuphi?
14 Ekuphetheni, uJuda unikezela abafunda incwadi yakhe kuNkulunkulu, ethi:
“Kepha kuyena onamandla okunilinda ukuba ningakhubeki, nimiswe phambi kwenkazimulo yakhe ningenasici, ninokuthokoza okukhulu, kuye uNkulunkulu oyedwa, uMsindisi wethu ngaye uJesu Kristu iNkosi yethu, makube-ngukukhazimula, nobukhosi, namandla, negunya, kungakabikho izikhathi, namanje nakuze kube-phakade. Amen.” (Juda 24, 25)
Ngemva kokunikeza isixwayiso esiphefumlelwe neseluleko esinengqondo, uJuda kwafuneka abeke ayekholwa nabo ababesengozini engokomoya ekunakekeleni kukaNkulunkulu. UJehova kuphela owayengabenza baphumelele ekumelaneni ‘nabantu abangamesabi uNkulunkulu’ abaphakathi kwabo. Ngakho-ke uJuda ngokufanelekile waphetha incwadi yakhe ngokunikeza udumo koPhezukonke.
15 Abakhulekeli abagcotshiwe kanye noJuda, babengathembela kuJehova njengalowo ‘ongabalinda ukuba bangakhubeki.’ UNkulunkulu wayengabavikela ekuweleni ekoneni nasesilingweni sokuhlanganyela ekuziphatheni okubi okukhuthazwa abangcolisi benyama abangamesabi uNkulunkulu. Ngempela, uJehova wayengalinda abantu abamesabayo ekukhubekeleni esonweni esikhulu nasekubhujisweni okulindele amaKristu amanga angaphenduki afana nezilwane. Futhi, uJehova wayekwazi “ukwenza [ofakazi bakhe abathembekile] babe abangenasici phambi kwenkazimulo yakhe,” noma “phambi kobuntu bakhe obukhazimulayo.” (NW, inguqulo ka-1950) Babeyokwazi ukuma bengenabala ngokomoya ngenxa yomusa ongafanelekanga kaNkulunkulu. (Efesu 2:1-7; Kolose 1:21-23) Ofakazi abagcotshiwe abathembekile bakaJehova bafuna uJesu Kristu abavuse futhi ababeke ekupheleleni okungokomoya phambi ‘komuntu okhazimulayo’ uNkulunkulu. (Johane 5:25; 11:24, 25) Ngokuqinisekile, lokho kuyophumela ‘enjabulweni enkulu’ ngabo. Ngokufanayo, “isixuku esikhulu” sibheke phambili ekwalusweni ‘osizini olukhulu’ nasekujabuleleni amalungelo aqhubekayo “enkonzo engcwele” njengoba siqhubekela ekupheleleni kobuntu lapha emhlabeni.—IsAmbulo 7:9, 10, 14-17.
16. (a) Kungani uJehova engabizwa ngokuthi “uNkulunkulu oyedwa, uMsindisi wethu ngaye uJesu Kristu iNkosi yethu”? (b) UJuda ubhekiselani kuNkulunkulu, futhi kungani kungokufanelekile?
16 UJehova, njengoba uJuda asho, “unguNkulunkulu, uMsindisi wethu ngaye uJesu Kristu iNkosi yethu.” Ngokuphindaphindiwe emiBhalweni uJehova uchazwa njengoMsindisi. (IHubo 106:21; Isaya 43:3; Jeremiya 14:8; Luka 1:46, 47) UyiLowo oletha insindiso ngeNkosi uJesu Kristu. (Mathewu 20:28; Johane 3:16; Roma 5:8; 1 Johane 4:9, 14) Ngokufanelekileyo, uJuda unikeza uJehova ‘inkazimulo’ (ngesiGreki, doxa), okusho ubuhle obukhulu. (Qhathanisa neHubo 29:1, 2.) Ubuye futhi anikeze uNkulunkulu “ubukhosi” (ngesiGreki, megalōsynē), okusho “ubukhulu obukhulu” bobukhosi. (Int) Lokhu kuwukuvuma okufanelekile igunya eliphakeme lobukhosi bukaJehova njenge“Nkosi yaphakade.” (1 Thimothewu 1:17) IKratos, noma ‘amandla,’ nakho kuthiwa kungokukaJehova, ngokusobala okusho ukubusa kwakhe, noma ubukhosi, kungakhathaliseki ezulwini noma emhlabeni. (Qhathanisa noDaniyeli 4:25; IsAmbulo 11:16-18.) UJuda ngokuqhubekayo wanikeza uNkulunkulu “igunya” (ngesiGreki, exousia), ngoba uJehova unegunya nekhono lokwenza ngendlela athanda ngayo.—Daniyeli 4:34, 35.
17. Kungani kungokufanelekile ukubhekisela kukaJuda kuNkulunkulu kanjalo (a) ‘kubo bonke ubuphakade obudlule’? (b) “namanje”? (c) “kuze kube-phakade”?
17 UJuda ngokufanelekile ubhekisela udumo, inkazimulo, nobukhosi namandla negunya njengokukaJehova ‘kubo bonke ubuphakade obudlule,’ noma “kungakabi bikho izikhathi” njengoba abantu bezazi, ngoba uJehova uNkulunkulu “usukela phakade kuze kube-phakade.” (Juda 25, NW inguqulo ka-1950, amazwi abhalwe phansi; IHubo 90:2) Abakhulekeli bakaJehova ngokufanelekile bayovuma ukuthi lezizinto ngezaKhe “manje,” okungukuthi, lapho uJuda ayeloba ngokufanayo nanamuhla. Futhi, uJehova ufanelwe ukunikezwa lokhu kuze “kube phakade,” ngoba akanakufa futhi uyoba nabadumisi abathembekile njalo. (Habakuki 1:12; IHubo 148) Emthandazweni wakhe wokuphetha uJuda, unezela elithi “Amen,” noma “Makube njalo.” Futhi ngamazwi akhe okudumisa bonke ofakazi BakaJehova abangamaKristu abathembekile bavuma ngayo yonke inhliziyo.
Thatha Isigijimi SikaJuda Ngokungathi Sína!
18. Encwadini kaJuda, yini esiyifunde (a) ngabafundisi bamanga? (b) ‘ngokuziphatha okubi’? (c) ukuntula ukholo? (d) ukuhlonipha igunya? (e) ukukhononda nokusola? (f) ukutusa abanye ngenxa yenzuzo yobugovu?
18 Incwadi kaJuda inencazelo engokoqobo koFakazi BakaJehova namuhla. Kumelwe sinamathele eZwini likaNkulunkulu futhi sibabalekele ngokuphelele abafundisi bamanga. (Jobe 13:16; 27:8, 9; Jeremiya 17:13; Juda 4, 19) Abathembekileyo kumelwe bamelane nanoma yiziphi izilingo zokuhlanganyela ‘ekuziphatheni okubi.’ (Juda 3, 4; Genesise 39:7-12) Akumelwe siwele ekuntuleni ukholo, ngoba lokhu kungasilahlekisela ukuphila okuphakade. (Heberu 3:12; Juda 5) Isigijimi sikaJuda kumelwe futhi sisishukumisele ekuhlonipheni igunya eliphethwe phezulu ngokumelana nanoma yisiphi isilingo nokukhuluma kabi ngalabo abaphethe ngokwethembeka imithwalo yemfanelo yebandla. (Heberu 13:17; Juda 8, 9) Kunokukhononda nokusola, kumelwe sishukunyiswe incwadi kaJuda ukubonisa uthando ngoJehova uNkulunkulu nesikholwa nabo. (Mathewu 22:37-40; Johane 13:34, 35; Roma 13:8-10; Juda 16) Amazwi kaJuda futhi asisiza ukuba sigweme ukutusa abanye ngenxa yenzuzo yobugovu, lokhu kuphakathi kwezindlela eziphambukile ezingasenza sinyanyeke kuJehova.—IzAga 3:32; Juda 16.
19. Kungani kumelwe sisithathe ngokungathi sína isigijimi esiphefumlelwe phezulu sikaJuda?
19 Ngakho-ke, njengofakazi bakaJehova abangamaKristu abazinikezele nabeNdodana yakhe ethandekayo, kwangathi sonke singathatha ngokungathi sína isigijimi esinamandla nesothando somfundi uJuda. (Qhathanisa noIsaya 43:10-12; IzEnzo 1:8.) Amazwi akhe ayosenza siqiniseke nangokwengeziwe ngezinyathelo zethu njengoba sihamba ‘endleleni yokuphila.’ (IHubo 16:11) Sengathi singaqhubeka ‘sizilinde ngokweZwi likaJehova,’ kuhlanganise nencwadi kaJuda. (AmaHubo 119:9-16) Ngaleyondlela, siyophumelela ‘ekulweni kanzima ngenxa yokholo’ futhi ngosizo lwaphezulu, ‘siyozigcina sisothandweni lukaNkulunkulu.’
Uyawakhumbula yini lamaphuzu?
□ Ubani owaxwayisa ngokuthi ‘esikhathini sokugcina kuyoba khona abehleki bosulu,’ futhi kungani uJuda aqondisa ukunakekela kulokhu?
□ Lwaluyini ‘ukholo olungcwele kakhulu,’ futhi singazakha kanjani kulo?
□ Ababekholwa noJuda babengazigcina kanjani ‘besothandweni lukaNkulunkulu’?
□ Kungenxa yasiphi isizathu abanye ababethi bangamaKristu babedinga umusa, futhi kwakushiwoni ‘ngokubahlwitha emlilweni’?
□ Kungani kwakufanelekile ngoJuda ukuba anikeze inkazimulo, ubukhosi, amandla negunya kuJehova uNkulunkulu?
□ Kumelwe samukele ngenhliziyo isigijimi sikaJuda ngenxa yokuthi sisisiza ukuba sibhekane ngokuphumelelayo naziphi izinkinga?
[Isithombe ekhasini 20]
Ofakazi BakaJehova abathembekile bekhulu lokuqala ‘balwa kanzima ngenxa yokholo,’ ngisho nakuba kungase ukuba babeye bagconwa abafundisi bamanga
[Isithombe ekhasini 22]
‘Thandaza ngomoya ongcwele’