Ukuqondisisa Izindaba

‘Ukuyibamba Emsileni’

NgoDecember 22, 1984, isenzakalo esimangalisayo esenzeka emgwaqweni ohamba ngaphansi wezimoto eNew York City saba yisihloko esivelele samaphephandaba. Isisebenzi esineminyaka engama-37 ubudala uBernhard Hugo Goetz wahlangana nabasha abane, labo athi basongela ukumgcweleza. UGoetz, owake waba isisulu sezigebengu ngaphambili, wakhipha ivolovolo futhi wabadubula bobane, waxhwalisa omunye wabo unomphela.

Ukudubula kwadala impikiswano yesizwe sonke ngobugebengu nangokulondeka komphakathi. “Lesisehlakalo ngempela siqale indaba enzima,” kusho omunye wabasakazi bohlelo lwezindaba. “Kunokukhungatheka okukhulu nokucasukela isimo sesimiso somthetho wobugebengu.” Umhleli weThe New York Times wenaba: “Uhulumeni uye wehlulwa [umphakathi] emthwalweni wawo wemfanelo omkhulu kakhulu: wokulondeka komphakathi. Ukubamba umthetho ngezandla zakho kusho ukuwuthatha ezandleni zomthetho. Kodwa umthetho, kulowomgwaqo ohamba ngaphansi wezimoto ngoDec. 22, wawungekho ezandleni zamuntu.”

Isithakazelo esimangalisayo somphakathi ngendaba kaGoetz sembula indlela abaningi abazizwa ngayo: ukwesaba ukusongela kokugetshengwa noma ukugcwelezwa, nokukhungatheka nokucasukela ukuthi okuningi akwenziwa ukuze kuqinisekiswe ukulondeka komphakathi. Kuyiqiniso, izinkinga ezidalwa ngamasela azizintsha. (Qhathanisa no-2 Korinte 11:26.) Okusha yindlela izigebengu nezinye izimo ezikhathazayo eziye zenza ngayo abantu ‘baphela amandla ngokwesaba nangokubheka’ okwenzekayo. (Luka 21:26) Nokho, ngaphansi koMbuso kaNkulunkulu ukwesaba okunjalo kuzophela masinyane. Kuleso simiso esisha esithenjisiwe, bonke abakhile emhlabeni bazohlala ngokuthula nangobunye, futhi “akakho oyakubesabisa.”—Mika 4:4.

Imfundo “Ephakeme”

“Amakholiji amaningi athembisa ukukwenza uphucuzeke futhi uziphathe kangcono, kodwa akubonakali ukuthi ayakwenza,” kusho uWilliam J. Bennett, unobhala omusha wemfundo eUnited States. “Awazigcini, izithembiso zawo.” Kunesinye isizathu esenza amelane nesimo semfundo yasekholiji namuhla. “Kunomcabango othile wokuthi abaneziqu zasekholiji baseqophelweni eliphezulu nokuthi uzothola izinto ezimangalisayo lapho uthola iziqu,” kusho uBennett. “Uma indodana yami uqobo . . . iza kimi futhi ithi ‘Uthembise ukungikhokhela ukuba ngifunde eHarvard; kunalokho kunjani uma unginikeza uR100 000 ukuze ngiqalise ibhizinisi encane?’ Bengingacabanga ukuthi lokho kuwumbono omuhle.”

Lapho ikholiji lingathembisa ikusasa eliqhakazile, liyayiqinisekisa yini impumelelo? Ngokusobala akunjalo. Nokho ngabantu abaningi, kunokuthile okuqinisekisayo. AmaKristu eqiniso namuhla angase abonakalise impucuko, ukuziphatha okuhle, ngisho nezinzuzo ezingokwezimali aye azithola ngokutadisha iZwi likaNkulunkulu nokulisebenzisa ekuphileni kwawo. Ayazi, njengoba uPawulu asho, ukuthi “yonke imibhalo . . . ilungele ukufundisa, nokusola, nokuqondisa, . . . ukuze umuntu kaNkulunkulu apheleliselwe yonke imisebenzi emihle.” (2 Thimothewu 3:16, 17) Imfundo yeBhayibheli ayinangozi. Ukuthola ukuhlakanipha okuvela kuNkulunkulu ‘omicabango yakhe ingaphezu kwemicabango yethu’ kuholela empumelelweni yoqobo.—Isaya 55:9.

Ukukhishwa Kwezisu Kuyehlukanisa

“Cishe eminyakeni eyi-10 edlule,” kusho uWilliam V. Shannon weThe Boston Globe, “umbhishobhi oyiRoma Katolika wathi kimi ngasese, ‘Ngiyaqaphela ukuthi thina njengesonto sisendleleni engalungile ngalempikiswano yokukhishwa kwezisu. . . . Bheka iPoland. Ngokunokwenzeka iyizwe elinamaKatolika amaningi eYurophu. . . . Kodwa ngonyaka odlule, abesifazane basePoland bakhipha izisu eziyizi-400 000. Uma ababhishobhi basePoland behluleka ukuqeda ukukhishwa kwezisu ePoland, enamaKatolika cishe angamaphesenti angama-90, thina singathemba kanjani ukukwenza kulelizwe lapho sibancane khona?’” UShannon uyaqhubeka: “Kwakuwumbuzo ofanelekile ngaleso sikhathi. Ubaluleke ngisho ngokungaphezulu namuhla lapho . . . inani lokukhishwa kwezisu [ePoland] . . . liye lakhula laba yizi-800 000 ngonyaka.”

Impikiswano yokukhishwa kwezisu isalokhu iyindaba eshaqisayo eVatican, kokubili kwezombangazwe nasesontweni ngokwalo. Ngo-October 1984 iThe New York Times, yayinesaziso sekhasi elilodwa sisekelwa yizindelakazi ezingama-24 namanye amaKatolika angama-73, sabonisa ukuthi ukusola kwesonto ukukhishwa kwezisu ngazo zonke izindlela kwakungesona “kuphela isimo esihle samaKatolika”—isimo iVatican eye yenza ngaso impikiswano. Lesaziso saveza amanani okuhlola kwamuva okwabonisa ukuthi amaphesenti ayi-11 kuphela amaKatolika angakuvumeli ukukhishwa kwezisu kuzo, zonke izimo. Ngokukhanyayo, impikiswano yokukhishwa kwezisu ihlukanisa isonto. Kodwa iZwi likaNkulunkulu likhuthaza amaKristu eqiniso ukuba ‘akhulume-zwilinye’ futhi abe ‘nhliziyonye.’—1 Korinte 1:10; 2 Korinte 13:11.