Hambani Ngokukholwa!

“Simi isibindi ngesikhathi sonke, sazi ukuthi, nxa ikhaya lethu lisesemzimbeni, sahlukene nekhaya eliseNkosini ngokuba sihamba ngokukholwa, asihambi ngokubona.”—2 KORINTE 5:6, 7.

1. Yiziphi ezinye zezibusiso esizijabulelayo ngenxa yeso lomuntu?

ESINYE sezimangaliso zomzimba womuntu iso. Ngalomshini omangalisayo osakhamera asigwemi nje kuphela ukushayisa izinto kodwa futhi sakha engqondweni umfanekiso wezinto eziningi esizibonayo, eziningi zazo ezithinta ubuhlobo bethu nabanye. Kusobala ukuthi uMklami weso wayengafuni ukuba siphumputhe ebumnyameni kulelikhaya lethu elingunozungezilanga. Ngokungaphezulu, kwakuyinjongo yakhe ukuba sibone futhi sijabulele indalo yakhe emangalisayo—abantu nezilwane, izintaba, nemifula, amachibi nezilwandle, izimbali nezinye izitshalo, isibhakabhaka nemibala ekhazimulayo yokushona kwelanga. Izibukeli ezinokwazisa zingababaza nomhubi: “Jehova, yeka ubuningi bemisebenzi yakho; yonke uyenzile ngokuhlakanipha; umhlaba ugcwele izidalwa zakho.”—IHubo 104:24.

2. Kungani kunganele ukuhamba ngokubona, futhi uPawulu wathini ngokuphathelene nalokhu?

² Nakuba ukubona okungokwenyama kumangalisa kanjalo, nokho, ukuhamba ngakho kuphela kunengozi enkulu. Uma sifuna ukujabulela umusa waphezulu, kumelwe sihambe ngokukholwa kuMklami weso lomuntu. Kumelwe sifune ukuqondisa kwakhe ukuze sikwazi ukwenza okuhle. Ebhalela amaKristu agcotshiwe akanye nawo, umphostoli uPawulu ngokufanelekile wathi: “Simi isibindi ngesikhathi sonke, sazi ukuthi, nxa ikhaya lethu lisesemzimbeni, sahlukene nekhaya eliseNkosini; ngokuba sihamba ngokukholwa, asihambi ngokubona; simi isibindi, singathanda kakhulu ukwahlukana nekhaya elisemzimbeni, sihlale ekhaya eliseNkosini [ngokufa sivuselwe ekuphileni kwasezulwini]. Ngalokho futhi, noma sisekhaya noma sahlukene nalo, sihlosé ukuba sibe ngabathandeka kuye. Ngokuba thina sonke simelwe ukubonakaliswa phambi kwesihlalo sokwahlulela sikaKristu, ukuze yilowo nalowo amukele njengalokho akwenzileyo esesemzimbeni, noma okuhle noma okubi.”—2 Korinte 5:6-10.

3. Yini okumelwe ibe yisifiso sazo zonke izinceku zikaJehova ezizinikezele, futhi yimiphi imibuzo efanelwe ukucatshangelwa?

³ Zonke izinceku ezizinikezele zikaJehova—kungakhathaliseki noma ezensali egcotshiwe noma ‘ezesixuku esikhulu’ esandayo esinamathemba asemhlabeni—zifuna ukwenza okuhle. (IsAmbulo 7:9) Kodwa kungani kungase kuthiwe kunengozi enkulu ‘ekuhambeni ngokubona’? Futhi kusho ukuthini ‘ukuhamba ngokukholwa’?

Izingozi ‘Zokuhamba Ngokubona’

4. (a) Kungani kungamelwe sibheke yonke into ngokubonakala kwangaphandle? (b) UMenzi weso uzibheka kanjani izinto?

⁴ Uma sithatha yonke into njengoba injalo futhi sithembele ekubonakaleni kwangaphandle kuphela, kunengozi yokuba sikhohliswe kuphumele ekulimaleni kwethu siqu. Ngokwesibonelo, umuntu angase ahambe endaweni ebanzi enesihlabathi kodwa ngokushesha azithole esengene shí obishini. Noma umuntu angase athatheke ukubukeka kobungane kothile oyobonakala kamuva ‘eyimpisi embethe isikhumba semvu.’ (Mathewu 7:15) Ngakho kumelwe siqaphe. UMenzi weso akaqondiswa nje ukubonakala kwangaphandle. Watshela umprofethi uSamuweli: “UJehova engabukisi okomuntu; umuntu ubheka okusemehlweni, kepha uJehova ubheka okusenhliziyweni.” (1 Samuweli 16:7) Ngempela, Lowo owenza iso wahlulela imicabango engaphakathi nezinjongo, futhi ukwahlulela kwakhe noma ubani nanoma yini kuqondile ngaso sonke isikhathi. (Qhathanisa namaHeberu 4:12.) Ngenxa yokubona kwakhe okuphelele nokuqonda, ngempela uyiLowo obona konke.

5. Kungani kubalulekile ukuxwayiswa kusengaphambili ngezingozi ‘zokuhamba ngokubona.’

⁵ Nokho, njengabantu abangelutho, asinakukubona ngokucacile okusenhliziyweni yomuntu. Ngisho nangamandla esiwanikwe uNkulunkulu, asiphelele futhi ngokuvamile singakhohliswa. Eqinisweni, inhliziyo yethu siqu ingasidukisa, ngoba “iyakhohlisa ngaphezu kwakho konke, futhi imbi.” (Jeremiya 17:9) Ngakho kubaluleke kakhulu ukuba sixwayiswe kusengaphambili ngezingozi ‘zokuhamba ngokubona.’ Ingabe uJehova usilungiselele lesidingo esiphuthumayo? Ngempela usilungiselele! Ukuze kufundiswe thina, uye wabangela ukuba kugcinwe umlando wezenzakalo ezivelele ezibonisa izingozi zokuhamba ngokubona kuphela.—Roma 15:4.

6. ‘Ukuhamba ngokubona’ kwaba namiphi imiphumela kumaIsrayeli?

⁶ Okuhlangenwe nakho kwabantu bakaNkulunkulu basendulo, amaIsrayeli, kulibonisa kahle leliphuzu. Ngisho nakuba ukuqondisa kukaJehova okungenaphutha kwakutholakala kulesosizwe esasithandwa kakhulu, abaningi baso abangakholwa bahamba ngenkani “ngokuthanda kwabo.” (IHubo 81:12) ‘Behamba ngokubona,’ baphendukela ekukhulekeleni izithombe noma onkulunkulu ababonakala ngamehlo emvelo. Beqondiswa ukubonakala kwangaphandle, bathuthumela ngenxa yokwesaba ubuningi obesabekayo bezitha zabo. Ngokungaphezulu, ngenxa ‘yokuhamba ngokubona, hhayi ngokukholwa,’ amaIsrayeli abekela ubuholi bukaMose abunikwa uNkulunkulu inselele futhi akhononda ngokuningi ekuphileni. (Qhathanisa noJuda 16.) Yebo, ngokukhanyayo iningi lawo laba nomona ngalokho okwakubonakala kuwumbuso nentuthuko ezizweni ezizungezile, engalinaki iqiniso lokuthi labobantu babesehlazweni futhi bengaphansi kwethonya lobudemoni.—Levitikusi 18:1-3, 30.

7. Kwenzekani kumaIsrayeli enqaba ukuqondisa kwaphezulu?

⁷ Kwenzekani kumaIsrayeli aphikelela ehamba ngokuthanda kwawo, enqaba ukuqondisa kwaphezulu? Phela, azilethela ulaka lukaJehova, futhi wayehoxisa ukunakekela kwakhe okuyisivikelo ukuze anqotshwe yizitha zawo! Ngisho naseZweni Lesithembiso, amaIsrayeli ayelokhu eba izigqila ezitheni zawo ezinonya. (AbAhluleli 2:17-23) Ngokungafani noMose, owenqaba ukujabulela ukuthokomala kwezwe kwesigaba esibusayo eGibithe, abantu bakwaIsrayeli bafuna “ukuthokoza isikhashana esonweni” futhi abazange baqhubeke behamba ‘sengathi bayambona ongabonwayo.’ Bantula ukholo. Futhi khumbula, “ngaphandle kokukholwa akwenzeki ukumthokozisa [uNkulunkulu].”—Heberu 3:16-19; 11:6, 24-27.

8. Kungani izinceku zikaJehova zanamuhla kumelwe zithathe isixwayiso kokuhlangenwe nakho kwamaIsrayeli asendulo?

⁸ Izinceku zikaJehova zanamuhla zingathatha isixwayiso kulezozehlakalo zakudala. Nathi, futhi sisengozini yokuba buthakathaka okholweni noma ngisho nokulahlekelwa ukholo lwethu. Ingabe akusilo iqiniso ukuthi singase sithonywe ngokungafanele ukubonakala kwangaphandle kwezinto bese ngalokho siqala ‘ukuhamba ngokubona’? Yebo, futhi kungakho uJehova alungiselela ukuqondisa kulabo ababezomkhonza ngokholo. Wasebenzisa amaIsrayeli nokusebenzelana kwakhe nawo njengezifundo ezingokoqobo ezizukulwaneni ezaziyolandela, kuhlanganise nesethu. (1 Korinte 10:11) Ngalokho siyaqiniswa ngolwazi oluqondile, ngethemba eliqinile, nangokukhuthazela.

9. Uma sasingase ‘sihambe ngokubona,’ sasingazizwa kanjani ngezenzo ezithile nangamalungiselelo angokwasezulwini?

⁹ Ngaphandle kwalokhu kuqondiswa okuqinisekile okuvela kuMdali wethu onothando, besingaba sengozini yokungabaza uMose oMkhulu, uJesu Kristu, sikhohlwe ukuthi uNkulunkulu noKristu baqondisa amaKristu eqiniso namuhla. (Qhathanisa neyoku-1 Korinte 11:3; Efesu 5:24.) Besingabheka inhlangano yoFakazi BakaJehova njengeyasungulwa umuntu nje bese sizizwa sikhululekile ukwenza okubonakala kulungile emehlweni ethu. (Qhathanisa ²⁵ Ngalezo zinsuku kwakungenankosi kwa-Israyeli.  Yilowo nalowo wayenza okulungile emehlweni akhe.nabAhluleli 21:25.) Ngokungaphezulu, besingawela ephutheni labanye ababonakala becabanga ukuthi uma nje inkambo ethile ingabahluphi onembeza babo, ilungile. Abanye bebengase baqale ukucabanga ukuthi inhlangano engokwasezulwini yenzelwe ukunethezeka kwabo nobumnandi nokuthi zonke izimfuneko zayo kumelwe zibe lula, zingadingi ukuzidela kubona. Enye ingozi kungaba ukuhlakulela umqondo wokuthi amalungiselelo enhlangano kumelwe avumelaniswe nentando yethu esikhundleni sentando kaNkulunkulu. Nokho, iSibonelo sethu, uJesu Kristu, ngaso sonke isikhathi wayenza intando kaYise ngenjabulo.—IHubo 40:8; Heberu 10:5-10.

10. Umbono wethu ngasenkonzweni yasensimini neminye imisebenzi engokwasezulwini ungathinteka kanjani uma singakunaki ukuqondisa kwaphezulu noma sikuthatha kalula?

¹⁰ Ngenxa yokungasinaki isiqondiso saphezulu noma ukusithatha kalula, abanye bangase bacabange ukuthi imihlangano yethu kumelwe ifushaniswe, izindawo zemihlangano emikhulu zingabi kude kakhulu, futhi okufundwayo kumelwe kube lula ngaso sonke isikhathi, kungahlanganisi “ukudla okuqinileyo.” (Heberu 5:12) Emazweni lapho amaKristu ejabulela ukuthula noxolo, abanye bangase bazithathe kalula izibusiso zoMbuso, babe nomuzwa wokuthi akumelwe kube nokuzikhandla enkonzweni engcwele. Uma siba nesimo esinjalo, singase sibe “abathanda injabulo kunokuthanda uNkulunkulu,” ngokunokwenzeka sibekela eceleni cishe zonke izimpelasonto ngenxa yokuzijabulisa esikhundleni sokusebenzisa isikhathi esinjalo enkonzweni yasensimini nakweminye imisebenzi engokwasezulwini ebonisa ukuzinikela ngenhliziyo yonke kuJehova. (2 Thimothewu 3:1, 4) Uma lokho kuye kwenzeka, besingasho ngokwethembeka ukuthi ngempela ‘besihamba ngokukholwa, hhayi ngokubona’?

11. Ukuzitotosa kungaba namuphi umphumela, kodwa kunesidingo sokuba senzeni?

¹¹ Kunengozi futhi yokuzitotosa. Kulula ukuzikhohlisa ngokucabanga ukuthi ubuhlungu bekhanda obuncane noma inkinga efanayo inkulu kunokuba injalo ngempela. Inyama yethu engaphelele ingasishukumisela ukuba sisebenzise lokhu njengesizathu sokungawufezi umthwalo wemfanelo, onjengokunikeza inkulumo eSikoleni SeNkonzo Esingokwasezulwini. Kodwa kungenzeka yini ukuthi asinakulokotha sivumele lokho kugula okufanayo kusivimbele ekuhlanganyeleni ohlotsheni oluthile lokuzijabulisa? Yebo, kumelwe sisebenzise ingqondo ehluzekile singazithathi kalula izimpawu ezingathi sína. Nokho, sidinga ukuzikhandla. (Luka 13:24) Futhi ngokuqinisekile ukholo kumelwe lube nengxenye enkulu ezinqumweni zethu ukuze ‘singahambi ngokubona’ kuphela, ngokuvumelana nokuqonda kwethu okungasekelwe.—Roma 12:1-3.

12. Hlobo luni lwempi esizithola sikuyo, futhi idinga sibe nasiphi isimo?

¹² Ungalingi ukhohlwe ukuthi silwa namandla omoya amabi. (Efesu 6:11-18) Isitha sethu esikhulu, uSathane uDeveli, angase alethe amathonya asabekayo ngokusihlasela ngezikhali zakhe eziklanyelwe ukuqeda ukholo lwethu kuJehova. USathane uyothuthukisa noma yikuphi ukuthambekela kobugovu kubantu futhi uyokwenza konke okusemandleni ukuba asonte ukucabanga kwethu. Uma sihlanganyela “nabaseleyo benzalo” ‘yowesifazane’ kaNkulunkulu, noma inhlangano engokwasezulwini, sisempini. Impi okungekho kuphumula kuyo kuze kube yilapho uJehova, osiqinisayo ukuba simelane nokuhlasela kukaSathane, eletha yonke inhlangano kaDeveli ekupheleni kwayo. (IsAmbulo 12:16, 17; 1 Petru 5:6-11) Khona-ke, ingabe kumelwe sibe nesibindi futhi sibe nomqondo wokuphuthuma? Ngokuqinisekile kunjalo!—IHubo 31:24.

Lokho Okushiwo ‘Ukuhamba Ngokukholwa’

13. Kusho ukuthini ‘ukuhamba ngokukholwa’?

¹³ “Ukuhamba ngokukholwa” kusho ukuphikelela phambili ezimweni ezinzima ngokukholwa kuNkulunkulu, emandleni akhe okuqondisa izinyathelo zethu, nasekuzimiseleni kwakhe ukusibona silondekile. (IHubo 22:3-5; Heberu 11:6) Kusho ukwenqaba ukuqondiswa ukubonakala kwangaphandle kwezinto noma ukuqonda komuntu okungenasisekelo. Ukholo luyosishukumisela ukuba sihambe ngomkhondo uJehova asikhomba kuwo, kungakhathaliseki ukuthi leyondlela ingaba nzima kanjani. Uma ‘sihamba ngokukholwa,’ siyoba njengoDavide, owathi ngoNkulunkulu: “Uyakungazisa indlela yokuphila; ukugcwala kwenjabulo kusebusweni bakho; intokozo isesandleni sakho sokunene kuze kube-phakade.” (IHubo 16:11) Ngokungaphezulu, uma sivumela uJehova aqondise izinyathelo zethu, uyosinika ukuthula kwengqondo futhi uyosisiza ukuba siphumelele, kungakhathaliseki izihibe esibhekana nazo. (Johane 16:33; Filipi 4:6, 7) Phakathi kwezinye izinto, “ukuhamba ngokukholwa” kuyosenza sihlangane njalo nabafowethu nodadewethu abangokomoya esifundweni seBhayibheli esinobunye nomthandazo.—Heberu 10:24, 25.

14, 15. (a) Sasiyini isimo sikaJesu ngasengcebweni, isithunzi, nokuhileleka kwezombangazwe? (b) Njengoba imiBhalo yembula, uJesu wakubheka kanjani ukuqondisa kukaNkulunkulu?

¹⁴ Ngamanye amazwi, “ukuhamba ngokukholwa” kusenza futhi abangane bezinceku zakudala ezithembekile zikaJehova. Enkulu kuzona kwakunguJesu Kristu, “uMqalisi noMphelelisi wokukholwa kwethu.” Njengoba silwela ‘ukulandela ezinyathelweni zakhe,’ yini esiyitholayo?—Heberu 12:1-3; 1 Petru 2:21.

¹⁵ UJesu wakugwema ukuhileleka kwezombangazwe zezwe futhi akazange afune ingcebo nesithunzi abaningi ababekufuna. Esikhundleni salokho, waveza ukuthi uMbuso wakhe “awusiwo owalelizwe” futhi kunokuba umthandi wezinto ezibonakalayo ‘wayengenandawo yokucamelisa ikhanda.’ (Johane 6:14, 15; 18:36; Luka 9:57, 58) Nakuba uJesu ayenomqondo ophelele, akazange azenzele umathanda kodwa wabheka kuYise wasezulwini ngokuqondiswa.—Johane 8:28, 29.

16. Yini engashiwo ngesimo soFakazi BakaJehova uma sicabangela isibonelo sikaJesu?

¹⁶ Ngokubheka isibonelo sikaJesu, yini engashiwo ngoFakazi BakaJehova namuhla? Nokho, njengabameleli boMbuso kaNkulunkulu wasezulwini, siyawahlonipha “amandla ombuso” kodwa asithathi-hlangothi ezindabeni zezombangazwe. (Roma 13:1-7; Mathewu 6:9, 10; Johane 17:16) Kunokufuna ingcebo nesithunzi kulelizwe, ‘sifuna uMbuso kuqala,’ sinethemba lokuthi uJehova uyosilungiselela izidingo zokuphila. (Mathewu 6:24-34; IHubo 37:25) Futhi njengoJesu, ‘asinciki kokwethu ukuqonda’ kodwa samukela ngenjabulo ukuqondisa kukaNkulunkulu wethu onothando. (IzAga 3:5, 6) Ngokuqinisekile, konke lokhu kusisiza ukuba ‘sihambe ngokukholwa.’

Uvivinyo Nezibusiso

17. Yini abantu bakaJehova okumelwe bayibekezelele njengoba ‘behamba ngokukholwa?’ Fanekisa.

¹⁷ Emazweni amaningi ofakazi bakaJehova esikanye nabo kumelwe babekezelele ukuphathwa kabi nokuhlushwa, ngisho nokushushiswa ngonya, njengoba ‘behamba ngokukholwa.’ Yebo, ukuvivinywa kokholo kuvela ngezindlela ezihlukahlukene. Ngokwesibonelo, cabanga ngobunzima nenkonzo yokwethembeka yomunye umzalwane osemdala wase-Ecuador. Wathola iqiniso eneminyaka engama-80 wayesefunda ukuzifundela nokubhala. Wabhapathizwa ngemva kweminyaka emibili. Njengoba ayehlala emaphandleni kwakumelwe ahambe amahora amathathu eya eHholo LoMbuso. Umkakhe ophikisayo wayefihla izingubo zakhe nemali ukuze amdumaze ekuyeni emihlanganweni yobuKristu. Kodwa lezinkinga azizange zimthene amandla lomzalwane othembekile. Wakhonza njengephayona lesikhashana, noma elisizayo, nyanga zonke iminyaka eyishumi futhi washumaela emizini eminingi, ngokuvamile ephathwa kabi izakhamuzi. Nokho, lapho amaphayona nezithunywa zevangeli zifakaza kulezozindawo kamuva, abantu abaningi beza kuzo bacela izifundo zeBhayibheli. Ngakho, ukusebenza kanzima kwalomzalwane oshisekayo kwaphumela ezintweni ezinhle. Wabulawa ikhensa eneminyaka engama-92 kodwa wasebenza amahora angama-40 enkonzweni ngayo kanye inyanga ashona ngayo.

18. (a) Yini okumelwe siyenze ukuze sijabulele umusa waphezulu? (b) Yimiphi imivuzo esiyoyithola uma sizigcina ‘sihamba ngokukholwa, hhayi ngokubona’?

¹⁸ Nathi, futhi, kumelwe sibekezele naphezu kwezinkinga nobunzima. (Mathewu 24:13) Uma sifuna ukujabulela umusa waphezulu, kubalulekile ukusebenzisa iseluleko sikaNkulunkulu, sithembele kuye futhi sihlale sihlukile ezweni, emibonweni yalo, nasezindleleni zalo. (IHubo 37:5; 1 Korinte 2:12; Jakobe 1:27) Ngakho masilwele ukulingisa iSibonelo sethu, uJesu Kristu. Masizidele futhi sizimisele ukuzikhandla enkonzweni kaJehova ekhazimulayo. Njengoba senza lokhu, singabheka ngethemba ekugcwalisekeni kwezithembiso ezinhle zikaBaba wethu wasezulwini kubakhulekeli bakhe abathembekile. Futhi yeka izibusiso ezimangalisayo lokhu okuyoholela kuzo oHlelweni lwakhe Olusha! Ngaphezu kwakho konke, “ukuhamba ngokukholwa, hhayi ngokubona” kuyosilethela umvuzo wokuhlanganyela ekulweleni ukubusa kukaJehova kwendawo yonke.

Uyakhumbula?

◻ Ziyini izingozi ‘zokuhamba ngokubona’?

◻ Okuhlangenwe nakho kwamaIsrayeli kubanika siphi isixwayiso abantu bakaJehova namuhla?

◻ Esikhundleni sokuzitotosa, yini esidinga ukuyenza?

◻ ‘Ukuhamba ngokukholwa’ kusho ukuthini?

[Izithombe ekhasini 12]

Lapho ofakazi bakaJehova okanye nabo behlanganyela imisebenzi engokwasezulwini, ingabe wena nomkhaya wakho njalo niya endaweni yokuzilibazisa?

[Isithombe ekhasini 14]

UJesu Kristu wasibekela isibonelo esihle ngokuvelele. Ingabe nawe ‘uhamba ngokukholwa’ njengaye?