Ungakulungiselela Yini Manje Ukushushiswa?
“Uma bengizingele mina, nani bayakunizingela.”—JOHANE 15:20.
1, 2. Isiphi isinyathelo esingalindelekile abanye ohulumeni abaye basithatha ngokumelene noFakazi BakaJehova?
AKE uzicabange ucambalele embhedeni ekuseni ngolunye usuku. Uzibuza uphethwe ubuthongo ukuthi kumelwe uvuke masinyane yini noma uthi ukuphumula isikhashana. Kodwa okokuqala, uvulela izindaba zasekuseni emsakazweni. Ngokushesha, umsakazi ubuqeda nyá ubuthongo. Uyamemezela: “Ngokomthetho kahulumeni, ihlelo elaziwa ngokuthi oFakazi BakaJehova alisafuneki neze kulo lonke izwe.” Akusenakuba khona ukuphumula kuwe!
2 Lokhu, noma okunye okufana nakho, kuye kwaba okuhlangenwe nakho kwamaKristu kwamanye amazwe ezikhathini zanamuhla. Ngokuvamile, kuye kwaba nezixwayiso zalokho okungenzeka. Kodwa ngezinye izikhathi ukuvinjelwa kuye kwaba okungalindelekile neze. Ingabe lokhu kumelwe kusimangaze?
3. Ikuphi okuhlangenwe nakho okuphikisanayo uJesu Kristu akuthola ngo-33 C.E.?
3 Eqinisweni akumelwe. Okufanayo kwenzeka ekhulwini lokuqala. Khumbula indlela uJesu Kristu, ekuqaleni kwentwasahlobo ka-33 C.E., angena ngayo eJerusalema egibele imbongolo. Abantu bamhalalisela ngenjabulo, bendlala izingubo zabo endleleni ayezohamba kuyo. Kodwa yini eyenzeka ezinsukwini ezimbalwa kamuva? UJesu wayethetha icala phambi kukaPontiyu Pilatu, futhi isixuku esivela emzini ofanayo samemeza ngentukuthelo enkulu: “Makabethelwe . . . makabethelwe!” (Mathewu 21:6-9; 27:22, 23) Isimo sase sishintshe ngokushesha.
4. Njengabalandeli bakaJesu, ikuphi ukuphathwa okumelwe sikulindele?
4 Ngakho-ke, kumelwe singamangali uma, kwamanye amazwe namuhla, isimo sishintsha futhi ushushiso luphakama ngokungalindelekile. Khumbula, uma ngempela singabalandeli bakaJesu, kumelwe silulindele ushushiso. (Johane 15:20) Lokhu kuqokomisa ukubaluleka kwamazwi kaJesu, “Lindani.”—Mathewu 24:42.
5. Imiphi imibuzo manje okumelwe siyicabangele?
5 Singakwenza kanjani lokhu? Ingabe ikhona indlela esingalungiselela ngayo, uma kwenzeka sehlelwa ngokubi kakhulu?
Lungisa Ingqondo Nenhliziyo Yakho
6, 7. (a) Kungani kunzima ukwenzela ushushiso amalungiselelo abonakalayo? (b) Iliphi ilungiselelo elibaluleke kakhulu elingenzelwa ushushiso?
6 Kunzima ukwenzela ushushiso amalungiselelo abonakalayo ngoba awazi ukuthi siyoba yini isimo. Kuze kube yilapho ukuvinjelwa kwenzeka ngokoqobo, awazi ukuthi kuyoba okuqine kakhulu yini noma okungconywana, noma ukuthi yini eyovinjelwa. Mhlawumbe kuyovinjelwa umsebenzi wokushumayela endlini ngendlu kuphela, noma mhlawumbe imihlangano engokwenkolo. Mhlawumbe kuqedwe inhlangano engokomthetho yoFakazi BakaJehova, noma kuboshwe ngokushesha abathile. Singacabanga ngezindawo ezihlukahlukene lapho izincwadi zingafihlwa khona uma kunesidingo. Kodwa ngalé kwalokho, akukho lutho esingalwenza ngokuqondene namalungiselelo abonakalayo.
7 Nokho, ungayilungiselela ingqondo nenhliziyo yakho, futhi lokhu kubaluleke kakhulu. Cabanga ngokuthi kungani ukushushiswa kuvunyelwa futhi kungani ungase uyiswe phambi kwababusi. UJesu wathi, “kube ngubufakazi.” (Mathewu 10:16-19) Uma inhliziyo yakho izimisele ngempela ukuhlala ithembekile kunoma iziphi izimo, uJehova angembula indlela yokuhlakanipha ongayisebenzisa uma kuphakama isidingo. Ngakho-ke, singazilungiselela kanjani ushushiso thina ngokwethu ngokomoya?
Usebenzelana Kanjani Nabantu?
8. UPawulu wayengasho kanjani ukuthi ‘wathola injabulo ekuphathweni kabi’?
8 Umphostoli uPawulu wathi: “Nginamile ebuthakathakeni, nasekuphathweni kabi, nasekusweleni, nasekuzingelweni, nasekubandezekeni ngenxa kaKristu.” (2 Korinte 12:10) Ingabe uPawulu wakujabulela ukuphathwa kabi? Ngokuqinisekile akunjalo. Kodwa ushushiso ngokuvamile luhilela ukuphathwa kabi, futhi uma kuyilokhu okwakudingeka ukuze alethe udumo egameni likaNkulunkulu, khona-ke uPawulu wayekujabulela ukukubekezelela.
9. Singakulungiselela kanjani kwamanje ukubekezelela “ukuphathwa kabi . . . ngenxa kaKristu”?
9 Nathi, futhi, singaqiniseka ngokuthi ngolunye usuku kuyodingeka ukuba sibekezelele “ukuphathwa kabi . . . ngenxa kaKristu.” Singaphathwa kabi ngamazwi, noma ngisho nangokomzimba. Siyobekezela yini? Nokho, sizibheka kanjani manje? Ingabe asifuni ukuthintwa futhi sisabela ngokushesha ekuphathweni kabi kwangempela noma esicabanga ukuthi kuyikho? Uma kunjalo, kungani ungalweli ukuhlakulela ‘ukubekezela, . . . ubumnene, nokuzithiba’? (Galathiya 5:22, 23) Lokhu kuyoba ukuziqeqesha okuhle kakhulu ngomKristu ophilayo manje, futhi kungasindisa ukuphila kwakho ngezikhathi zoshushiso.
Uyibheka Kanjani Inkonzo Yasensimini?
10. Ikuphi ukusabela okufanelekile okungokomBhalo lapho umsebenzi wethu uvinjelwe?
10 Ngokuvamile, into yokuqala evinjelwayo ukushunyayelwa kwasobala ‘kwezindaba ezinhle.’ Nokho ukushumayela nokwenza abafundi kubalulekile kulezinsuku zokugcina. Iyiphi enye indlela abantu abangazi ngayo ngoMbuso kaNkulunkulu? Ngakho-ke, ukusabela okuhle ekuvinjelweni okunjalo yilokho okwaboniswa abaphostoli, ngesikhathi abaholi benkolo bobuJuda bezama ukuvimbela umsebenzi wabo wokushumayela. (IzEnzo 5:28, 29) Ngaphansi kokuvinjelwa, izindlela ezithile zokushumayela zingase zivalwe. Kodwa, ngandlela-thile, umsebenzi kumelwe wenziwe. Ungaba nawo yini amandla okuqhubeka ushumayela ungaphansi kokucindezela koshushiso?
11, 12. Ungazi kanjani ukuthi uyoba namandla adingekile okuqhubeka ushumayela lapho ushushiswa?
11 Nokho, uwubheka kanjani manje umsebenzi wokushumayela? Ingabe uvumela izithiyo ezincane ukuba zikuvimbele futhi zikwenze ungabi ngovame njalo enkonzweni yasensimini? Uma kunjalo, yini oyoyenza ngaphansi kokuvinjelwa? Uyabesaba yini abantu manje? Ingabe uzimisele ukushumayela endlini ngendlu emgwaqweni wakini? Ingabe uyesaba ukusebenza uwedwa? Kwamanye amazwe, abantu ababili abasebenza ndawonye ngokuvamile baphawulwa kakhulu ngabantu. Ngakho-ke, lapho kulondeke khona ukwenza kanjalo, kungani ungasebenzi wedwa manje ngezikhathi ezithile? Kuyoba ukuziqeqesha okuhle.
12 Ingabe uyahlanganyela emsebenzini wasemgwaqweni kamagazini? Unaso yini isibindi nekhono lokuvula amathuba okushumayela ngokwethukela? Uyayisebenza yini insimu yamabhizinisi? Ingabe uyesaba ukushumayela kubantu abacebile noma abadumile? Uma uhlanganyela ezinhlotsheni ezithile kuphela zokushumayela, yini oyoyenza uma, ngaphansi kokuvinjelwa, lolohlobo lokushumayela lungasenakwenzeka?
13. Yini ongayenza manje ngenkonzo yakho ukuze ube nokukulungela ukushumayela ngezikhathi zoshushiso?
13 Ingabe uyaqaphela ukuthi ubuthakathaka kwezinye izinto? Manje isikhathi sokubunqoba. Funda ukuthembela kuJehova futhi ube yisikhonzi esifanelekayo. Kanjalo uyohlonyiselwa kangcono ukushumayela manje futhi ukulungele kangcono ukubekezela ngezikhathi zoshushiso.
Ingabe Uthembekile?
14, 15. (a) Luhlobo luni lwamaKristu okuqala okungenzeka ukuthi ayeyithonya elihle eliqinisayo lapho kugqashuka ushushiso? (b) Inceku kaJehova yosuku lwanamuhla ingafana kanjani nalawomaKristu okuqala ayeqinile?
14 Kuyo yonke imiBhalo yamaKristu yesiGreki, kuphawulwa abathile ababeyizinsika zamandla ebandleni. Ngokwesibonelo, uOnesiforu ngesibindi wasiza uPawulu ngesikhathi esejele eRoma. (2 Thimothewu 1:16) UFebe watuswa ngenxa yokusebenza kwakhe kanzima ebandleni laseKenikreya. (Roma 16:1, 2) Amadoda anjalo nabesifazane kumelwe ukuthi ayeyithonya elihle eliqinisayo lapho kugqashuka ushushiso. Bahlala ‘begxilile ekukholweni, bengamadoda, benamandla.’—1 Korinte 16:13.
15 Onke amaKristu, ikakhulukazi abadala, kumelwe bazame ukuthuthuka futhi bafane namaKristu okuqala ayeqinile. (1 Thimothewu 4:15) Funda ukugcina izindaba eziyimfihlo nokwenza izinqumo ezisekelwe ezimisweni ezingokomBhalo. Ziqeqeshele ukubona izimfanelo zobuKristu kwabanye ukuze wazi ukuthi ubani oyothembeka ngaphansi kokucindezelwa. Sebenza, ngamandla kaJehova, ukuze ube yinsika ebandleni lakini, umuntu osiza abanye kunokuba kube uyena odinga njalo usizo.—Galathiya 6:5.
Usebenzelana Kanjani Nabantu?
16, 17. Ukusebenzisa manje abaseKolose 3:12, 13 kungakusiza kanjani ukuba ulungiselele ushushiso?
16 Umphostoli uPawulu wasikhuthaza: “Yembathani ububele benhliziyo, nesisa, nokuzithoba, nobumnene, nokubhekakade, nibekezelelane, nithethelelane.” (Kolose 3:12, 13) Ingabe lokhu kulula ngawe? Noma ingabe ukungapheleli kwabanye abantu kukucasula ngokungafanele? Ingabe usheshe uthukuthele noma udumazeke? Uma kunjalo, lena enye yezindawo lapho amalungiselelo kumelwe enziwe khona.
17 Emazweni lapho imihlangano ivinjelwe khona, amaKristu ahlangana njalo ndawonye ngamaqenjana. Ezimweni ezinjalo, ukushiyeka kwabo kuba sobala kakhulu. Khona-ke kungani ungaziqeqeshi kwamanje ukubekezelela ubuthakathaka babanye, njengoba ngokungangabazeki bebubekezelela obakho? Ungabi ngogxeka kakhulu abanye kanjalo ubadumaze kakhulu. Futhi, ziqeqeshe wena nabantwana bakho ukuhlonipha impahla yabanye ngesikhathi niseziFundweni zeNcwadi zeBandla. Ngaphansi koshushiso, inhlonipho enjalo iyothuthukisa ubuhlobo nokuthula.
Ingabe Unosikisiki Lokwazi?
18. Kungani ngezinye izikhathi kulondekile ukwazi kuphela lokho okudingeka ukuba ukwazi?
18 Ngokwemvelo, abanye bethu banosikisiki olukhulu lokufuna ukwazi. Ngeke sikumele ukungabi “abaziyo.” Ingabe unjalo? Uma kunjalo, cabangela lokhu: Ngezinye izikhathi, uma umsebenzi woFakazi BakaJehova uvinjelwe, abaphathi bazama ukuthola indlela izinto ezihleleke ngayo namagama ababonisi abanomthwalo wemfanelo. Uma ubungumuntu ozaziyo lezizinto, ubuyophathwa kabi bezama ukukuphoqelela ukuba uziveze. Futhi uma uziveza, umsebenzi wabafowenu ubuyothinteka kakhulu. Ngakho-ke, ngezinye izikhathi kungokulondekile ukwazi kuphela lokho okudingeka ukuba ukwazi hhayi okungaphezulu.
19. Ikuphi okungakusiza kwamanje ukuba ugweme ukuveza izindaba eziyimfihlo lapho kunoshushiso?
19 Ingabe ungaziqeqeshela lokho manje? Yebo. Ngokwesibonelo, uma kunecala eliye lathethwa ikomiti lokwahlulela ebandleni, umuntu ngamunye kumelwe aneliswe yilokho abadala abakubona kufanelekile ukukusho futhi angagubhi ukuze athole noma imiphi imininingwane. Abafazi nabantwana babadala akumelwe bazame ukubacindezela ukuba baveze izindaba eziyimfihlo. Ngazo zonke izindlela, kumelwe sifunde ukungabi ‘abazigaxa kokungasifanele.’—2 Thesalonika 3:11, NW.
Ingabe Ungumfundi WeBhayibheli?
20, 21. Ukutadishisisa iBhayibheli manje kungakusiza kanjani uma umsebenzi uvinjelwe?
20 IBhayibheli liyisisekelo sokuqina komKristu ngokomoya. Limnikeza izimpendulo emibuzweni yakhe ebalulekile futhi limholele endleleni yokuhlakanipha kukaNkulunkulu. (2 Thimothewu 3:14-16) Onke amaKristu ayakuqaphela lokhu ngokwesimiso, kodwa iyiphi indima iBhayibheli ngempela eliyifezayo ekuphileni kwakho? Ingabe ulitadisha njalo futhi ulivumele ukuba likuqondise kukho konke okwenzayo?—IHubo 119:105.
21 Ngokuvamile, indlela yokuthola izincwadi zethu zeBhayibheli iyaqedwa lapho umsebenzi uvinjelwe. Ngezinye izikhathi, kuba nzima ngisho nokuthola amaBhayibheli. Ngaphansi kwezimo ezinjalo, umoya ongcwele uyokukhumbuza ngezinto oye wazifunda esikhathini esidlule. Kodwa ngeke ukukhumbuze ngezinto ongazifundanga! Ngakho-ke, uma utadisha kakhulu manje, kuningi futhi okuyolondolozwa engqondweni yakho nasenhliziyweni ukuze umoya ongcwele ukukhiphe ngezikhathi zesidingo.—Marku 13:11.
Ingabe Uyathandaza?
22. ‘Ukuqinisela njalo emkhulekweni’ kungaba usizo kanjani ekulungiseleleni ushushiso?
22 Lona umbuzo obalulekile uma sicabanga ngoshushiso. IBhayibheli liyeluleka: “Ekukhulekeni niqinisele njalo.” (Roma 12:12) Umthandazo uwukuxhumana okuqondile noJehova uNkulunkulu. Ngawo singacela amandla okubekezelela ubunzima futhi senze izinqumo eziqondile, futhi sakhe ubuhlobo bomuntu siqu noJehova uNkulunkulu. Ngisho nakuba abaphikisi besiphuca izincwadi zethu, amaBhayibheli ethu, nokuhlangana kwethu namanye amaKristu, ngeke neze basiphuce ilungelo lethu lokuthandaza. Ejele elinonya olukhulu, umKristu angaxhumana noNkulunkulu. Khona-ke, ukusebenzisa ngokugcwele ilungelo lomthandazo, kuyindlela enhle yokulungiselela noma ikuphi ikusasa elisiphathele khona.
Ingabe Uyalithemba Igunya?
23. Kungani kumelwe ube nokwethemba abadala abamisiwe ‘nenceku ethembekileyo neqondayo’?
23 Ukwakha lokhu kwethemba nakho futhi kubalulekile. Abadala ebandleni bayingxenye yelungiselelo likaNkulunkulu lokusivikela. Abadala kumelwe baziphathe ngendlela efanelwe ukwethenjwa, futhi lonke ibandla kudingeka lifunde ukubethemba. (Isaya 32:1, 2; Heberu 13:7, 17) Okubaluleke ngisho nangokwengeziwe, kumelwe sifunde ukwethemba “inceku ethembekileyo neqondayo.”—Matheweu 24:45-47.
24. Yini engenziwa ukulungiselela ukumelana nokuhlasela okungamanga kwezitha zabantu bakaJehova?
24 Izitha zingase zisakaze amanga ngenhlangano kaNkulunkulu. (1 Thimothewu 4:1, 2) Kwelinye izwe, amanye amaKristu akhohliswa ukuba akholelwe ukuthi iNdikimba Ebusayo yoFakazi BakaJehova iye yabushiya phansi ubuKristu, kuyilapho bona ngokwabo babesalokhu bethembekile kuyo. Indlela enhle yokulungiselela ukumelana nokuhlasela okunjengalokhu iwukwakha uthando olujulile ngabazalwane bakho nokufunda ukuthembela endleleni kaJehova yokuhlela izinto.—1 Johane 3:11.
Unganqoba
25. Yini eyosisiza ukuba sinqobe lapho sishushiswa?
25 Umphostoli uJohane owayesekhulile, ngemva kokushushiswa, wasitshela: “Konke okuzelwe nguNkulunkulu kuyalinqoba izwe; lokhu kuyinqobo enqobé izwe: ukukholwa kwethu.” (1 Johane 5:4) Ngeke unqobe ngamandla akho. USathane nezwe lakhe banamandla ngaphezu kwakho. Kodwa abanawo amandla adlula akaJehova uNkulunkulu. Ngakho-ke, uma silalela imiyalo kaNkulunkulu, sikhulekela umoya wakhe ukuba usisekele futhi sithembele ngokuphelele kuye ukuba asinikeze amandla okubekezela, khona-ke singanqoba.—Habakuki 3:13, 18; IsAmbulo 15:2; 1 Korinte 15:57.
26. Ngisho nakuba ungekho ngaphansi koshushiso manje, yini okumelwe uyenze?
26 Kuwo wonke amazwe, kunamaKristu ashushiswayo, kungaba ngabangane bomshado abaphikisayo noma ngenye indlela. Kwamanye amazwe, zonke izinceku zikaNkulunkulu ziyahlupheka ngenxa yezinyathelo ezingokomthetho ezithathwe uhulumeni wakuleyondawo. Kodwa ngisho nakuba, kwamanje, wena siqu ungekho ngaphansi kokuphikiswa noma ubunzima obumangalisayo, khumbula ukuthi kungenzeka noma ngasiphi isikhathi. UJesu wathi ukushushiswa kwamaKristu kwakuyoba yingxenye yesibonakaliso sesikhathi sokuphela; ngakho-ke, kumelwe sikulindele njalo. (Mathewu 24:9) Ngakho-ke kungani ungakulungiseleli manje? Zimisele ngokuthi, noma yini engaba ngaphambili, ukuziphatha kwakho kuyoletha udumo njalo kuBaba wasezulwini, uJehova uNkulunkulu.—IzAga 27:11.
Ziyini Izimpendulo Zakho?
◻ Luhlobo luni lwamalungiselelo oshushiso ongawenza kwamanje?
◻ Yini ongayenza manje ukuze uhlakulele amandla adingekile okuba uqhubeke ushumayela ngesikhathi soshushiso?
◻ Ukusebenzisa kwamanje abaseKolose 3:12, 13 kungaba usizo kanjani lapho kufika ushushiso?
◻ Kungani kumelwe ube nokwethembela kwabadala abamisiwe ‘nenceku ethembekileyo neqondayo’?
◻ Unganqoba kanjani lapho ungaphansi koshushiso?