Ungahlanganyeli Ezonweni Zabanye
“Angihlali nabantu bamanga, angihambelani nezimbulu.”—IHUBO 26:4.
1. Kungani uJuda ayishintsha injongo yakhe ekubhalweni amaKristu ayekanye nawo?
EMAKHULWINI eminyaka ayishumi nesishiyagalolunye edlule, umfundi uJuda wayehlose ukubhalela akholwa nabo ‘ngensindiso ababeyihlanganyela bonke.’ Kodwa wakuthola kudingekile ukubanxusa ukuba ‘balwele inkolo abayinikelwayo abangcwele kwaba kanye.’ Ngani? Ngoba abathile “abangamesabi uNkulunkulu” babengene ngokunyenya ebandleni futhi “bephendukezela umusa kaNkulunkulu wethu ube-ngamanyala.”—Juda 3, 4.
2. Nakuba kungokuqabulayo ukuxoxa ngensindiso, ngezinye izikhathi yini okumelwe siyicabangele ngomthandazo?
2 Yeka ukuthi kuqabula kanjani ukuxoxa ngensindiso esiyihlanganyela sonke! Ukuzindla ngalesosigijimi kuletha ukwaneliseka okukhulu, futhi sithola injabulo uma sicabanga ngazo zonke izibusiso zaleyonsindiso. Nokho, kunezikhathi lapho, esikhundleni sokukhuluma ngensindiso, sibhekane nesidingo sokucabangela ezinye izindaba ezingathi sína. Uma zingalungiswa, zingonakalisa ukholo lwethu futhi zisenze singaphumeleli emncintiswaneni wethu wokuphila. Njengoba nje isixwayiso sikaJuda ngokuziphatha okubi sasinamandla futhi siqinile, kanjalo amaKristu namuhla kumelwe ngezinye izikhathi acabangele ngomthandazo iseluleko esingokomBhalo esiqondile, esishaya emhloleni.
Izono Zethu Siqu
3. Kungani sidinga iseluleko, futhi kumelwe samukelwe kanjani?
3 Umhubi uDavide wathi: “Bheka, ngazalelwa ebubini, umame wangithabatha esonweni.” (IHubo 51:5) Sonke sazalwa siyizoni. (Roma 5:12) Umphostoli uJohane wabhala: “Uma sithi asinasono siyazikhohlisa, neqiniso alikho kithi.” (1 Johane 1:8) Njengezoni kunezikhathi lapho sidinga khona iseluleko ukuze siqondise inkambo yethu. Iseluleko esinjalo sivela kuJehova ngeZwi lakhe, iBhayibheli, nangenhlangano yakhe. Iseluleko sakhe siyasiqondisa futhi sisisize ukuba sihambe ngokulunga phambi kwakhe. Njengoba umphostoli uPawulu aphawula: “Ukulaya konke okwamanje kungathi akusikho okwentokozo, kepha kungokosizi, kodwa ngasemuva kuyabathelela isithelo esihle sokulunga labo abahlakahliswé yikho.” (Heberu 12:11) Ngokucabangela isithelo esihle seseluleko esinjalo, kumelwe ngempela sisamukele ngenjabulo.
4. Singanikezwa nini iseluleko, futhi ungaba yini umphumela waso?
4 Iseluleko sikaJehova singase sinikezwe lapho sisayiqala nje inkambo engaholela esonweni esikhulu. (Galathiya 6:1) Ngezinye izikhathi, iseluleko singafika ngemva kokuba sesingene shí enkambweni embi. Iseluleko esinjalo kungenzeka sibe buhlungu, njengalapho umphostoli uPawulu encengisisa abaseKorinte ukuba bathathe isinyathelo ngokumelene nesifebe ebandleni. (1 Korinte 5:1-5) Kuzo zombili lezici, kunikezwa iseluleko ukuze umenzi wobubi aphenduke, aguquke, futhi athathe inkambo engayisi ezifisweni ezimbi eziholela ebubini obungathi sína. (Qhathanisa nezEnzo 3:19.) Izinceku zikaJehova ziyasijabulela iseluleko esinjalo, njengoba nje owayesolwa eKorinte lasendulo ayezuza futhi ngokusobala wayebuyiselwa ebudlelwaneni obunothando nebandla.—2 Korinte 2:5-8.
5. Ngokuvamile enzani amaKristu ahileleka esonweni esingathi sína?
5 Iningi lalabo abazinikezele kuJehova basiqaphela kakhulu isidingo sokuhamba ngendlela efanelekile phambi kukaNkulunkulu. Uma kwenzeka behileleka esonweni esingathi sína, baphenduka masinyane enkambweni embi, baye kwabadala abamisiwe, futhi banikeze ubufakazi bokuphenduka kwangempela. (Jakobe 5:13-16) Iqiniso lokuthi bambalwa ngokuqhathaniswa oFakazi BakaJehova abasuswayo unyaka ngamunye liwubufakazi bokuthi bayakuzonda okubi bathanda okuhle.—IHubo 34:14; 45:7.
Izono Zabanye
6, 7. Abanye abenzi bobubi bazama kanjani ukuthonya abanye?
6 Nokho abathile ngokusobala abakuthandayo okuhle babonakala bevumela izinhliziyo zabo ukuba zibakhohlise, ngoba babonakala bengakuzondi okubi. (IHubo 97:10; Amose 5:15) Ngenxa yalokho, bahileleka ekwenzeni izinto ezimbi futhi abazigcini belwela ukwenza okuhle. Ngezinye izikhathi, bangenza ngisho nokwengeziwe, befuna ukuhilela abanye enkambweni yabo embi. Yeka ukuthi kubaluleke kanjani ukwenqaba ukusikisela okunjalo!—Qhathanisa nezAga 1:10-15.
7 Ngezinye izikhathi labo ngokusobala abangakuzondi okubi bakhuluma kamnandi kangangokuthi isifiso sokwenza okubi singase sakheke ezinhliziyweni zalabo abalalele. Isikhuthazo singase sibe esokuhileleka ekuziphatheni okubi noma esenzweni esithile esihilela ukuziphatha okungavunyelwa uNkulunkulu. Noma umuntu angase ancengwe ukuba ahileleke esimweni esingase sibe yingozi ngokomoya. Labo abazama ukuncenga abanye kanjalo bangase bathi uJehova unguNkulunkulu onothando oyoba nomusa uma sona. Ukukhohlisa okunjalo kwenhliziyo kungabangela ukulimala okuhlala njalo. (Jeremiya 17:9; Juda 4) Ngokuqinisekile, kumelwe ‘sinqande izinyawo zethu emikhondweni yabo!’—IzAga 1:15.
lokuhlanganyela Ezonweni Zabanye
8. Imiphi imibuzo edinga ukucatshangelwa?
8 Kodwa ake sithi siyabona ukuthi inkambo esikiselwayo ayilungile. Ingabe ukwenqaba kwethu ngempela kuyasikhulula emthwalweni owengeziwe wendaba? Uma ngazi ukuthi labo abasikisela inkambo embi bahilelekile kuyo, yini okumelwe siyenze?
9. Kungani abanye bengase bahluleke ukubika ububi babanye, kodwa kungani lokhu kuyindaba engathi sína?
9 Abanye abaziyo ngobubi obenziwa abanye bangase bakhethe ukungabusho kulabo abanomthwalo wemfanelo oyinhloko wokugcina ibandla lihlanzekile. Ngani? Mhlawumbe abafuni ukubhekwa njengezimpimpi. Noma, ngenxa yombono oyiphutha wokufuna ukwethenjwa, bangase bangayithi vú lendaba noma bangase bayikhulume kuphela kulabo abathembisa ukuyigcina iyimfihlo. Lesi isenzo esingathi sína. Ngani? Ngoba empeleni singaphumela ekuhlanganyeleni ezonweni zabanye.
10, 11. (a) Yini umphostoli uJohane ayisho ngokuhlanganyela ezonweni zabanye? (b) Uma sazi ngobubi obenziwe ilungu lebandla, yini esingazibuza yona?
10 Umphostoli uJohane wabonisa ukuthi kungenzeka ukuhlanganyela esonweni somunye umuntu. Wabhala: “Lowo oweqisayo engemi ekufundiseni kukaKristu akanaye uNkulunkulu. . . . Uma kufika umuntu kini ongalethi lokhokufundisa, ningamamukeli endlini yenu, ningambingeleli; ngokuba ombingelelayo uhlanganyela naye emisebenzini yakhe emibi.” (2 Johane 9-11) Ohlubukayo “ekufundiseni kukaKristu” wayengenakuba ngumngane omuhle, futhi ngisho nangokungambingeleli, umKristu oqotho wayeyokugwema ukuba ngohlanganyela naye ebubini bakhe.
11 Njengoba lokhu kunjalo ngesihlubuki, ngokuqinisekile ngeke sithande ukuba ngabahlanganyela ebubini babanye esibabona benza izenzo ezimbi. Kuthiwani-ke, uma sazi ukuthi ilungu lebandla liye laba isela noma isidakwa? Uma sehluleka ukukhuthaza lowomuntu ukuba acele intethelelo kuJehova futhi avume isono sakhe kwabadala, ingabe asinacala nakancane? Akunjalo, ngoba sinomthwalo wemfanelo ongathi sína.
Inhlanzeko Nokuvikela Kubalulekile
12. Kungani sibonisa ukukhathalela ngokuhlanzeka okungokomoya kwebandla?
12 Kumelwe ngamunye wethu abe nokukhathalela inhlanzeko engokomoya yebandla. Yeka ukuthi lokhu kwagcizelelwa kahle kanjani ngesikhathi izithunjwa ezingamaJuda sezizophuma eBabiloni ngekhulu lesithupha B.C.E.! Umyalo kaNkulunkulu wawuthi: “Mukani, mukani, niphume lapha, ningathinti okungcolileyo, niphume phakathi kwalo [iBabiloni], nizihlambulule nina eniphatha izitsha zikaJehova.”—Isaya 52:11.
13. UJuda wakubonisa kanjani ukuthi kumelwe sikukhathalele ukuvikela abantu bakaJehova kubenzi bobubi?
13 Kumelwe futhi sikukhathalele ukuvikela abantu bakaJehova kulabo abangase bafune ukubayengela ebubini. “Abantu abangamesabi uNkulunkulu” bosuku lukaJuda bafuna ‘ukuphendukezela umusa kaNkulunkulu ube-ngamanyala,’ kodwa lowomfundi oqotho wathatha isinyathelo sokuxwayisa akholwa nabo futhi kanjalo ebavikela. Wabakhumbuza ngezibonelo eziyisixwayiso zamaIsrayeli angathembekile, izingelosi ezingalaleli, nabanye. Funda incwadi yakhe ephefumlelwe ngokwaphezulu, futhi uyobona ukuthi amaKristu aqotho ngeke ayekelele lapho inhlanzeko yebandla isongelwa noma lapho abantu bakaNkulunkulu bedinga ukuvikelwa kubantu ababi abanezisusa ezimbi.
14. Uma umenzi wobubi ehluleka ukuvuma isono sakhe kwabadala, iHubo 26:4 lingasisiza kanjani ekunqumeni okumelwe sikwenze?
14 Nokho, ake sithi siye samkhuthaza umenzi wobubi ukuba acele intethelelo kuNkulunkulu futhi avume isono sakhe kwabadala, kodwa ulokhu eqhubeka engakwenzi lokhu noma engasiboni isidingo sokuthatha lezinyathelo. Ingabe kumelwe sizithele ngabandayo? Abanye bangase babe nomqondo wokuthi abafuni ukuhileleka. Bangase bangakuthandi ukulahlekelwa ubungane balowo owonile. Futhi bangase bangathandi ukacatshangelwa njengabantu abangenasifuba ngokutshela abadala. Kodwa lona umbono ongalungile. Umhubi uDavide wathi: “Angihlali nabantu bamanga, angihambelani nezimbulu.” (IHubo 26:4) Khona-ke, ngokuqinisekile, ngeke sithande ukuzenza abangane “nezimbulu.”
15. ULevitikusi 5:1 uwubonisa kanjani umthwalo wethu wemfanelo ngemva kokunikeza isoni isikhathi eside ngokwanele sokuba sibonane nabadala ngobubi baso?
15 Ngakho-ke, ngemva kokunikeza isoni isikhathi eside ngokwanele ukuba sibonane nabadala ngesenzo saso esibi, kungumthwalo wethu phambi kukaJehova ukuba singahlanganyeli esonweni saso. Kudingeka sazise ababonisi abanomthwalo wemfanelo ukuthi lowomuntu uye wabuveza ububi obungathi sína obudinga ukunakekelwa yibo. Lokhu kuyovumelana noLevitikusi 5:1, othi: “Uma umuntu ona lapho ezwa izwi lesifungo, engufakazi wokuthile, noma ekubonile noma ekwazi, engakusho nokho, khona wothwala ububi bakhe.” Yebo, kumelwe sikugweme ukugijimela ukuthatha izinyathelo ngokwenziwa kobubi esingaqiniseki ngakho.
16. Ikuphi okubaluleke kakhulu kunokwethembeka kumngane owenqaba ukuveza ububi bakhe obungathi sína kwabadala abamisiwe?
16 Ezweni lanamuhla, ukusibekela ububi babanye kuwumkhuba ovamile. Abaningi bavele bangawuthi vú uma kuziwa ekwambuleni ububi babanye kulabo okumelwe bazi ngezenzo ezinjalo. Kudinga isibindi sobuntu bobuKristu ukutshela abadala abamisiwe ngesono esingathi sína salowo esikholwa naye. Kodwa uma sifuna ukuvunyelwa uJehova, akumelwe sivumele ubuhlobo bomuntu siqu busenze singabuboni ububi obenziwe ngomunye. Ubuhlobo bethu noNkulunkulu bubaluleke kakhulu kunokwethembeka kumngane onecala lobubi obungathi sína futhi ongafuni ukuyiveza indaba kwabadala abamisiwe.
Inkinga Sonke Okumelwe Siyicabangele
17. Yini ebonisa ukuthi intsha ethile esikanye nayo idinga ukuqaphela ukuba ingahlanganyeli ezonweni zabanye?
17 Inkinga yokuhlanganyela ezonweni zabanye ngezinye izikhathi iba khona phakathi kwentsha ethile esikanye nayo. Ingase ithule futhi ingafuni ukutshela labo okumelwe baziswe uma abanye benza izinto ezingase zilimaze ibandla futhi ezingaphumela ekulahlekelweni umusa kaJehova. Ukusibekela ububi babanye kuyinto ejwayeleke kakhulu ezikoleni zezwe. Kodwa uma lombono ugcwala ebandleni, kungaphumela ezinkingeni eziningi. Kuye kwaba nemibiko yentsha ehlangana ndawonye ukuze ihlanganyele ekuziphatheni okubi kanjalo igqibane yodwa ukuze abadala nabazali bangazi ngesenzo esinjalo. Ukuvumela ukucindezela kontanga nesifiso sokufuna ukwamukelwa iqembu kuye kwabangela lentsha, abazali bayo, nabanye ebandleni inhliziyo ebuhlungu lapho ububi sebutholakele. Kumelwe sikhumbule ukuthi akukho okufihlekile okungayikwembulwa, futhi omunye wemisebenzi yethu eyinhloko ngaphambi kukaJehova uwukusiza ukugcina inhlangano yakhe ihlanzekile.—Luka 8:17.
18. Abazali abangamaKristu kumelwe benzeni uma abantwana babo benza okubi?
18 Zonke izinceku zikaJehova kumelwe zikuqaphele kakhulu ukungahlanganyeli ezonweni zabanye. Abanye abazali bazama ukuvuna ukuziphatha okubi kwabantwana babo, bazame ukubavikela. Kodwa abazali abangamaKristu akumelwe babe nombono wokuthi wonke umuntu umelene nabantwana bakhe uma benza okubi. Kunalokho, abazali abesaba uNkulunkulu kumelwe basize isizukulwane sabo esonayo ukuba samukele, sivume, futhi sizuze kunoma isiphi iseluleko esidingekile esiseZwini likaNkulunkulu.
19. (a) Ngokuqondene nobubi obungathi sína, yini imibhangqwana eshadile engamaKristu okudingeka ukuba iyiqaphele? (b) Yini abadala okumelwe bayenze uma omunye wabo noma inceku ekhonzayo enza isono esingathi sína?
19 Imibhangqwana eshadile engamaKristu nayo futhi idinga ukuqaphela ukuthi ayiwephuli umthetho kaNkulunkulu ngokusibekela izono ezingathi sína zomunye nomunye. Kumelwe bakhumbule indaba ka-Ananiya noSafira, abaceba ukusibekela isono esingathi sína kodwa bangaphumelela. (IzEnzo 5:1-11) Abadala kumelwe futhi baqaphele ukuba bangavikelani bodwa noma izinceku ezikhonzayo uma omunye wabo enze isono esingathi sína esingaphumela ekususweni. Kumelwe balandele isimiso esabekwa uPawulu, owabhala: “Ungasheshi ubeke izandla noma kubani, futhi ungahlanganyeli izono zabanye, uzigcine ube-mhlophe.”—1 Thimothewu 5:22.
Ukuhlakanipha Kokuzigcina Ungenasici
20. Kunokusibekela noma ukuhlanganyela ezonweni ezingathi sína zabanye, yini okumelwe siyenze?
20 Izinceku zikaJehova kumelwe zingahlanganyeli futhi zingazilingisi izindlela ezimbi zalelizwe. Ebhalela uGayu, umphostoli uJohane wathi: “Sithandwa, ungalandeli okubi kodwa okuhle. Owenza okuhle ungokaNkulunkulu; owenza okubi akambonanga uNkulunkulu.” (3 Johane 11) Yeka ukuthi kuhle kanjani ukuqondiswa yiZwi likaNkulunkulu eliqinisekile futhi kanjalo wenze okuhle! Ngakho-ke, kunokusibekela noma ukuhlanganyela ezonweni ezingathi sína zabanye, kumelwe sizimisele ukukhanya njengezinkanyiso, singabi nasici nacala. (Filipi 2:14, 15) Inceku ngayinye kaNkulunkulu inomthwalo wemfanelo wokugcina ibandla lihlanzekile, kuyilapho nayo izigcina ingenasici. (2 Petru 3:14) Kodwa kuthiwani uma ukhathazwa isenzo esingokoqobo esenziwe ngothile? Kumelwe uzizwe ukhululekile ukukhuluma nabadala futhi uthole ukuqondiswa ngenkambo eqondile okumelwe uyilandele.
21. (a) Uthando lukaKristu ngebandla lakhe luyisibonelo kanjani kithi? (b) Ngokuqondene nobubi babanye, imuphi umthwalo wemfanelo okumelwe siwuthwale?
21 Uthando lwethu ngenhlangano kaJehova kumelwe lulingise uthando lukaJesu Kristu ngomakoti wakhe ongokomoya, ibandla. “Ulithandile ibandla, wazinikela ngenxa yalo ukuba alingcwelise, alihlambulule ngesigezo samanzi ngezwi, ukuze azimisele ibandla elinenkazimulo, lingenasisihla, nambimbi, nanto enjalo, kodwa libe-ngcwele lingenacala.” (Efesu 5:25-27) Ngokufanayo, uthando lwethu ngenhlangano kaJehova kumelwe lusishukumisele ukuba senze okusemandleni ethu ukuba siligcine lihlanzekile. Kwangathi singelokothe senze noma yini ehlambalaza uNkulunkulu noma inhlangano yakhe noma sithalalise ububi babanye ebandleni. Kunalokho, masikhuthaze abenzi bobubi ukuba balungise ukuziphatha kwabo futhi bacele usizo lwabadala. Uma behluleka ukwenza lokhu phakathi nesikhathi eside ngokwanele, asithwale umthwalo wethu wemfanelo wokubikela ababonisi abamisiwe. Ngalendlela, siyokugwema ukuhlanganyela ezonweni zabanye nokuthwala umthwalo ngokuziphatha kwabo okubi.
22. (a) Ukuze sizuze insindiso, yini okumelwe siyenze? (b) Imiphi imibuzo okusamelwe icatshangelwe?
22 Insindiso esiyihlanganyela sonke iyingcebo engenakulinganiswa. Ukuze siyizuze kumelwe siqhubeke sihamba phambi kukaNkulunkulu ngendlela efanelekile. Ngakho-ke, asisizane ukwenza kanjalo, singalokothi sihlanganyele ezonweni zabanye. UJehova ngothando uye walungiselela ilungiselelo elingokwenhlangano ukuba lisisize kulemizamo, futhi kulokhu abadala abamisiwe bafeza indima ebaluleke kakhulu. Kodwa bamlingisa kanjani uJehova neNdodana yakhe, uMalusi Omuhle? Iluphi usizo abadala abangasinikeza lona endleleni eya ekuphileni? Isihloko esilandelayo sizophendula lemibuzo.
Ungakhumbula?
◻ Kumelwe usibheke kanjani iseluleko?
◻ Uma okholwa naye ekutshela ukuthi uye wenza isono esingathi sína, yini okumelwe umkhuthaze ukuba ayenze?
◻ Yini okumelwe uyenze uma wazi ukuthi umenzi wobubi akakasivumi isono sakhe kwabadala abamisiwe?
◻ Kungakhathaliseki ukuthi singabadala, sishadile, noma singabantwana, singakugwema kanjani ukuhlanganyela ezonweni zabanye?
[Isithombe ekhasini 20]
Umphostoli uJohane waxwayisa ngokuhlanganyela ezonweni zabanye