Imibuzo Evela Kubafundi

◼ Ingabe oFakazi BakaJehova bazizwa ngokunamandla ngokufanayo ngokuminza phakathi kwamalungu abo njengoba benjalo ngomkhuba kagwayi oyingozi?

OFakazi BakaJehova bathatha ukuma okusekelwe eBhayibhelini ngokumelene nogwayi, futhi sikwamukela ngendlela efanayo ukulahla kwemiBhalo ukuminza.

Sikholelwa ukuthi ukubhema kuwukwephula izimiso zeBhayibheli: Ukubhema kuhilela ukuluthwa ngokweqile. Ngokungaphezulu, akukhona okwemvelo ukudonsela intuthu emaphashini. Ukubhema kungcolisa umzimba, kubangele izinkinga zempilo, futhi kuye kwafushanisa ukuphila okumelwe ngabe kusetshenziselwa ukudumisa uNkulunkulu. Ukubhema futhi kungcolisa ngokuyingozi umoya ophefumulwa abanye; ngokuqinisekile lokho akulona uthando ngomakhelwane.—2 Korinte 7:1; Roma 12:1; Marku 12:33.

Nokho, kuthiwani ngokuminza ekudleni? Ngokuqondile, iBhayibheli liyakulahla ukuminza, okuwukweqisa ngokuhaha ekudleni, noma ukudla ngokweqile ngokuhaha. Indodana engumIsrayeli ngokungaphenduki ‘eyayiyisiminzi nesidakwa’ kwakumelwe ibulawe. (Duteronomi 21:18-21, NW) IzAga ziyaxwayisa ‘ngokuba umngane weziminzi.’ (IzAga 28:7; 23:20, 21) Ukuminza futhi akulungile njengoba sitshelwe ukuthi “nabahahayo” abayikulidla ifa lombuso kaNkulunkulu. (1 Korinte 6:9, 10; qhathanisa neyoku-1 Petru 4:3; Filipi 3:18, 19.) Ababonisi abangamaKristu kumelwe ‘bazithibe,’ bangabi “yiziminzi ezivilaphayo.” (Thithu 1:8, 12) Lokhu kungokungathi sína kangangokuba abanye ababonisi baye bagudluzwa ngenxa yokudla ngokungenakuzithiba.

Nokho, kumelwe kuqashelwe ukuthi akulula ukubona ukuthi ukuminza kukhona yini. Ukudla (uma kuqhathaniswa nokudonsela intuthu kagwayi emaphashini) kungokwemvelo futhi kufanele. Futhi ukukhuluphala akusona okuwukuphela kwesici okungabonwa ngaso ukuminza; umuntu ozace kakhulu angase abe yisiminzi. Akukhona ukukhuluphala kakhulu iBhayibheli elikulahlayo, kodwa kunalokho ukudla ngokweqile, okungenzeka noma kungenzeki ukuba kuholele ekukhuluphaleni.

Abanye abantu bakhuluphale kakhulu ngenxa yezifo noma ukungasebenzi kahle kwezindlala, nakuba uProfesa Judith Rodiri ethi ‘amaphesenti amahlanu azo zonke iziguli zokukhuluphala abangelwa ngokuyinhloko izinkinga zokwelapha.’ Noma ufuzo lungase lwenze umuntu abe mkhulu. UDr. William Bennett uyaphawula: “Abantu abaningi abakhuthele bahlala bekhuluphele ngokudla cishe lokho okudliwa umuntu onomzimba olungene, . . . Bahlukile ngokwendlela yokwakhiwa komzimba wabo.” Abanye ososayensi banomuzwa wokuthi uma umuntu ekhuluphele edla kancane, umzimba wakhe ‘uyasehlisa isilinganiso sokusebenza kwawo ukuze ashise ama-calories kancane kakhulu.’ Kodwa ngisho noma umuntu okhuluphele engesona isiminzi ngomqondo wokuba odla ngokuhaha, angase adinge ukusebenzisa iseluleko sikaNkulunkulu ngokungathi sína ngokwengeziwe.

Ngokwesibonelo, amaKristu kumelwe ahlakulele ukuzithiba, okusebenza nasekudleni futhi. (Galathiya 5:22, 23; 2 Petru 1:5-8) Umphostoli uPawulu wanxusa amaKristu ukuba abe njengomgijimi ‘ozithibayo ezintweni zonke.’ UPawulu ‘wawutuba umzimba wakhe, ewenza isigqila, ukuba angaliwa.’ (1 Korinte 9:24-27) Umuntu okhuluphele angase abe nesizathu ‘sokutuba umzimba wakhe’ ngokuqondene nokuthi udla okungakanani, kudla kuni, nini futhi kanjani.a

Ukukhuluphala kungaba yingozi. Imibiko ibonisa ukuthi ukukhuluphala kungaholela ezingeni eliphakeme lokufutha kwegazi kanye namafutha amaningi emzimbeni, isifo sikashukela esiqala lapho umuntu engena ebudaleni, izinhlobo ezihlukahlukene zomdlavuza, isifo senhliziyo nesenyongo, isifo sokuqaqamba kwamalunga, nezinkinga zokuphefumula. “Umuntu okhuluphele ngokweqile ngamaphesenti angama-20 ubhekene nesilinganiso sokufa esiphakeme ngengxenye eyodwa kwezintathu kunesilinganiso esivamile labo abakhuluphele ngokweqile ngamaphesenti angama-30 nangama-50, izilinganiso zokufa ziphakeme ngamaphesenti angama-50 nayi-100, ngokwehlukana.” (The New York Times, February 27, 1985) Imibiko efanayo yezinkinga zempilo ivela eNgilandi, eJalimane naseItaly.

Ngokuqinisekile umKristu ufuna ukuthanda iNkosi, ‘uNkulunkulu wakhe ngayo yonke inhliziyo yakhe, umphefumulo [noma, ukuphila], ingqondo namandla.’ (Marku 12:30) Abaningi, lapho befunda ngobuKristu, bayeka ukubhema ukuze balondoloze impilo yabo nokuphila. Ingabe amaKristu akumelwe yini akhathazeke ngokuthi ukukhuluphala kakhulu ngenxa yokweqisa bekungalimaza impilo yawo nokuphila kwawo okunikezelwe kuJehova?

Abanye abantu badla kakhulu lapho bedabukile, bekhungathekile, bebodwa noma bethukuthele. Nakuba ukuba umKristu kungayivimbeli ngokuphelele imizwa enjalo, kunokuthola ikhambi ekudleni okungadingekile, umKristu angaphendukela kuNkulunkulu nakubafowabo. Ngokuphathelene nalokhu, funda abaseFilipi 4:6, 7, 11-13. Ngisho nososayensi abathi umuntu unokuthambekela okungokwemvelo ngasesisindweni esithile bayavuma ukuthi lokhu kungashintshwa. Bagcizelela ukwehliswa kokudla okunamafutha amaningi nokwandiswa kokusetshenziswa komzimba. Ngokuthakazelisayo, ezindaweni eziningi umKristu ohlanganyela njalo enkonzweni yendlu ngendlu uhamba kakhulu ngezinyawo futhi akhuphuke, okuyimpilo. UPawulu, naye, ‘wayekhandleka futhi ekhathazeka’ enkonzweni.—2 Korinte 11:26, 27.

Ngakho-ke, oFakazi BakaJehova abakuvumeli ukuminza ngenxa yalokho iBhayibheli elikushoyo. Kungakhathaliseki ukuthi siyini isisindo sabo, balwela ‘ukulinganisela ezintweni zonke,’ kuhlanganise nokudla. Lokhu ngokuyinhloko akungenxa yombono wempucuko yesimanje, kodwa kungenxa yokuthi bafuna ukuphila ngezimiso zeBhayibheli futhi babe amaKristu akhuthele enokuvunyelwa uNkulunkulu.

[Umbhalo waphansi]